Siońnia ŭ švajcarskim Ńjonie prajšło losavańnie Lihi čempijonaŭ i Kubku UEFA dla «słabych i biednych». BATE jedzie znoŭ u krainu hiejzieraŭ, MTZ-RIPA - u Słavakiju, «Homiel» - u Polšču.
BATE na pieršym etapie zhulaje ź iślandzkim «Valuram» (Rejkjavik). Pieršy matč projdzie ŭ Barysavie 16 abo 17 lipienia. Hulnia ŭ adkaz 23-24 lipienia ŭ Rejkjaviku.
BATE, zaznačym, trapiŭsia ci nia samy lohki supiernik: mahli ž narvacca, prykładam, na zahrabskaje «Dynama», «Hioteborh» ci ciraspalski «Šeryf».
Ciapier «Valur» idzie ŭ čempijanacie svajoj krainy na šostym miescy: pieršynstvo Iślandyi taksama razyhryvajecca pa systemie viasna - vosień, u čempijanacie biaruć udzieł 12 kamand. «Valur» adstaje ad «Chafnafjordziura» na 9 punktaŭ.
Ź iślandzkimi klubami biełarusami hulali ŭ eŭrakubkach dvojčy. Letaś u druhim raŭndzie barysaŭcy sustrakalisia z «Chafnafjordziuram» i ź lohkaściu razhryźli hety arešak, jašče ŭsio vyrašyŭšy ŭ pieršym matčy. BATE tady ŭ haściach vyjhraŭ 3:1, a doma praz tydzień zhulaŭ uničyju - 1:1.
U 1996 h. u kvalifikacyi tady jašče Kubku kubkaŭ mazyrski MPKC hulaŭ z «Rejkjavikam» i pa sumie dvuch matčaŭ prajhraŭ: 2:2, 0:1.
U druhim raŭndzie pieramožca pary BATE - Valur zhulaje z belhijskim «Anderlechtam». A heta ŭžo surjozny supiernik.
Matčy druhoha raŭndu projduć 29/30 lipienia - 5/6 žniŭnia.
12/13 i 26/27 žniŭnia projduć matčy 3‑ha adboračnaha raŭndu (jaho losavavańnie - 1 žniŭnia). Hrupavy turnir startuje 16/17 vieraśnia.
Finał Lihi čempijonaŭ projdzie ŭ Rymie 27 traŭnia 2009 h.
Letaś barysaŭski BATE dabraŭsia da 3‑ha raŭndu kvalifikacyi, dzie prajhraŭ «Ściaŭa» z Bucharestu.
***
U pieršym raŭndzie Kubku UEFA «Homiel» zhulaje z varšaŭskaj «Lehijaj» (pieršy matč u haściach), a MTZ-RIPA - sa słavackaj «Žylinaj» (pieršy matč u Miensku).
Palakam biełarusy nie prajhravali, a voś słavacki barjer nie pieradolvali. U 2001 h. bracisłaŭski «Inter» vybiŭ z 2-ha raŭndu Lihi čempijonaŭ mazyrskuju «Słaviju» - 1:0, 1:0. U tym ža, 2001 h., «Ružamberak» vybiŭ z papiaredniaha raŭndu Kubku UEFA «Biełšynu» - 3:1, 0:0. A pazaletaś mienskaje «Dynama» u druhim raŭndzie kvalifikacyjnym Kubku UEFA prajhrała bracisłaŭskaj «Artmedyi» - 1:2, 2:3.
Hulni pieršaha raŭndu projduć 17 i 31 lipienia.
Finał Kubku UEFA projdzie ŭ Stambule na stadyjonie Šokrju Saračohłu, na jakim hulaje «Fienierbachče» — kamanda z uschodniaha (anatalijskaha) bierahu Basforu.
***
Siońnia ŭ Vienie taksama prajšło losavańnie handbolnaj Lihi čempijonaŭ. U adboračnym raundzie Bieraściejskamu handbolnamu klubu imia Miaškova (BHK) trapiŭsia kaŭnaski «Hranitas». Matčy 6-7 i 13-14 vieraśnia. Pieršy matč - u Litvie.
Aryštavany 75‑hadovy Źmicier Sańko — vieteran-vydaviec3
Kamientary