Śviatłana Aleksijevič achviaravała na lačeńnie Leanida Marakova tysiaču dalaraŭ

Piśmieńnika i daśledčyka stalinskich represij Leanida Marakova pieravodziać z hośpisu ŭ Dom miłasernaści.

Lekary dyjahnastavali ŭ piśmieńnika puchlinu hałaŭnoha mozhu, jakaja raźviłasia paśla ciažkaha insultu. Laŭreatka Nobeleŭskaj premii Śviatłana Aleksijevič 7 listapada pieradała na lačeńnie Leanida Marakova tysiaču dalaraŭ. Ale znachodžańnie i lačeńnie ŭ Domie miłasernaści płatnaje, i srodki spatrebiacca jašče.

Leanid Marakoŭ maje syna i dačku, ale jany vučacca ŭ Polščy. Dapamahajuć piśmieńniku nieabyjakavyja ludzi — Natalla Samatyja, Aleś Makajeŭ, Vadzim Prakopčyk dy inšyja.

Natalla Samatyja raspaviała Svabodzie pra stan Leanida Marakova:

«Siońnia vyhladaje Leanid lepiej, aciočnaść na tvary spała, uśmichajecca, sam siabie praciraje vilhotnaj survetkaj. Trymajecca za maju ruku davoli mocna. Havoryć davoli zrazumieła. U paraŭnańni z tym, što było niekalki dzion tamu, vyhladaje Leanid značna lepš. Adzinaje, maje niezdarovy rumianiec. Ale słuchaje mianie, pytajecca, chto pryjaždžaŭ. Ja padbadziorvaju, raspaviadaju, što ŭsie za jaho chvalujucca, pieražyvajuć.

Pryjechaŭ Aleś Makajeŭ, my zrabili hihijeničnyja pracedury.

My taksama damovilisia z Domam miłasernaści, tam jość płatnaje miesca — 35 rubloŭ za sutki. Tam umovy, biezumoŭna, lepšyja, čym u hośpisie. Jość daktary, labaratoryja.

Pahavaryli siońnia my ź lekaram. Toj paćvierdziŭ, što dyjahnaz — ankalohija čaćviortaj stupieni (puchlina mozhu). Jon taksama paviedamiŭ, što aperacyi bolš niemahčyma rabić (raniej užo rabili).

Vieličezny dziakuj Śviatłanie Aleksijevič — jana ŭčora pieradała 1 tysiaču dalaraŭ.

Pampersy, vilhotnyja survetki jość. Ale znachodžańnie ŭ Domie miłasernaści daviadziecca apłačvać, tak što srodki patrebnyja», — kaža Natalla Samatyja.

Dapamahčy Leanidu Marakovu možna, pieraličyŭšy srodki na rachunak № 5351 0410 8976 2734 u MTBanku (kartka dziejničaje da 02|19).

Leanid Marakoŭ (nar. u 1958 hodzie) — inžyner-radyjoelektronik, u 1990-ja staŭ vyvučać bijahrafiju svajho dziadźki, paeta Valera Marakova, jaki byŭ rasstralany 29 kastryčnika 1937 hodu. Vynikam pracy stała maštabnaje daśledavańnie stalinskich represijaŭ u Biełarusi — padrychtavany i častkova vydadzieny 10-tamovy encyklapedyčny daviednik pad nazvaj «Represavanyja litaratary, navukoŭcy, rabotniki aśviety, hramadzkija i kulturnyja dziejačy Biełarusi. 1794—1991». Usiaho sabranyja źviestki pra 20 tysiač achviaraŭ. Leanid Marakoŭ — aŭtar dośledu «Achviary i karniki», asobna vyjšła kniha źviestak pra represavanych u Biełarusi pravasłaŭnych śviataroŭ. U 2014 hodzie vyjšła jahonaja manahrafija «Hałoŭnaja vulica Minska. 1880—1940».

• 0
• 0
• 0
• 0
• 0
• 0
• 0
• 0