Hrašovyja dachody nasielnictva praciahvajuć padać

Hrašovyja dachody nasielnictva Biełarusi za studzień—lipień 2016 hoda, zhodna sa źviestkami Nacyjanalnaha statystyčnaha kamiteta, źnizilisia na 7% u paraŭnańni z anałahičnym letašnim pakazčykam.

Jak raniej paviedamlałasia, za studzień—lipień i studzień—maj 2016 hoda padzieńnie dachodaŭ taksama skłała 7% i stała samym značnym sa studzienia 2015 hoda.

Dachody nasielnictva padajuć z pačatku 2015 hoda: u studzieni — na 1,4% u paraŭnańni z takim ža pieryjadam 2014 hoda; u studzieni—lutym — na 2,3%; studzieni—sakaviku — na 4%; studzieni—krasaviku — na 4,1%; studzieni—mai — na 4,7%; studzieni—červieni — na 5,3%; studzieni—lipieni — na 5,4%; studzieni—žniŭni — na 5,5%; studzieni—vieraśni i studzieni—kastryčniku — na 5,6%; studzieni—listapadzie — na 5,5%; u studzieni—śniežni — na 5,9%. U studzieni 2016 hoda źnižeńnie skłała 5,4% da studzienia 2015 hoda, u studzieni—lutym — 6,4%, studzieni—sakaviku — 6,5%, studzieni—krasaviku — 6,8%.

Za siem miesiacaŭ u ahulnym ab`iomie hrašovych dachodaŭ apłata pracy zajmaje 61,7%, dachody ad pradprymalnickaj i inšaj dziejnaści, jakaja prynosić dachod, — 8,2%, tranśfierty nasielnictvu (piensii, dapamohi, stypiendyi i inšyja tranśfierty nasielnictvu) — 24,1%, dachody ad ułasnaści i inšyja dachody — 6%.

Na dumku ekśpiertaŭ, rost dachodaŭ nasielnictva ŭ 2016—2020 hadach budzie vielmi ścipłym. «U hetaj piacihodcy možna raźličvać na vielmi ścipły rost dachodaŭ nasielnictva pry adsutnaści ekanamičnych reformaŭ. I navat kali jany adbuducca, efiekt my adčujem niachutka, tak što i ŭ hetym vypadku praryvaŭ u častcy pavieličeńnia dachodaŭ nasielnictva ŭ 2016—2020 hadach čakać nie varta», — ličyć ekśpiert Biełaruskaha ekanamičnaha daśledča-adukacyjnaha centra (BEROC) Kaciaryna Barnukova.

«Jak miarkujuć, u 2016—2020 hadach ekanomika budzie raści na ličanyja pracenty. Nijakich resursaŭ, kab pavyšać dachody nasielnictva bolš chutkimi tempami, u dziaržavy siońnia (va ŭmovach značnych vypłat pa ŭnutranych i źniešnich daŭhach) niama», — zaŭvažaje dyrektar Daśledčaha centra IPM Alaksandr Čubryk.

Miž tym Minekanomiki čakała, što realnyja najaŭnyja hrašovyja dachody nasielnictva ŭ pieršym kvartale 2016 hoda źniziacca na 1,5% da adpaviednaha pieryjadu 2015 hoda, a ŭ pieršym paŭhodździ buduć na letašnim uzroŭni. Pry hetym pavodle vynikaŭ dzieviaci miesiacaŭ vyrastuć na 0,1%, pavodle vynikaŭ 2016 hoda — na 0,5%.

• 0
• 0
• 0
• 0
• 0
• 0
• 0
• 0