Učastkovaja vybarčaja kamisija, jakuju ŭznačalvaje viadomy biźniesmien Pavieł Tapuzidzis, pryniała rašeńnie vydalić ŭsich naziralnikaŭ z učastka dla hałasavańnia №347 Sucharaŭskaj vybarčaj akruhi № 101 u Minsku.
Hetamu rašeńniu papiaredničaŭ incydent z aktyvistam ruchu «Za Svabodu» Piatrom Markiełavym — adnym z naziralnikaŭ, vyłučanych ad vybarščykaŭ. Naziralnik patrabavaŭ u členaŭ kamisii prademanstravać jamu prapisku niekatorych vybarščykaŭ, jakich jon padazravaŭ u hetak zvanaj karusieli. Pry hetym Markiełaŭ zdymaŭ členaŭ kamisii i milicyjanieraŭ fotaaparatam. U vyniku naziralnika pavieźli z učastka čatyry vyklikanych milicyjaniera. Členy vybarčaj kamisii pazbavili Markiełava akredytacyi.
Paśla hetaha staršynia kamisii Tapuzidzis vynies na hałasavańnie pytańnie ab vydaleńni z učastka dla hałasavańnia ŭsich naziralnikaŭ — 11 čałaviek, siarod jakich pradstaŭniki «Biełaj Rusi», BRSM, Čyrvonaha Kryža, Fondu miru, Biełaruskaha sajuza žančyn, Sacyjalna-spartyŭnaj partyi, Ahrarnaj partyi, Ruchu «Za svabodu», Abjadnanaj hramadzianskaj partyi, a taksama naziralniki ad vybarščykaŭ.
Kamisija adnahałosna padtrymała hetuju prapanovu, paśla čaho bolšaja častka naziralnikaŭ pajšła. Pakinuć učastak dla hałasavańnia admovilisia tolki dva naziralniki — aktyvist ruchu «Za Svabodu» Aleś Łahviniec i naziralnik ad AHP Bahdan Sakałoŭ. Svaju admovu jany arhumientavali tym, što kamisija nie aznajomiła ich z pratakołam hałasavańnia, jaki śviedčyć ab pryniatym rašeńni vydalić naziralnikaŭ z učastku.
Paśla incydentu na ŭčastak prybyli dvoje naziralnikaŭ ad misii ABSIE.
Namieśnik staršyni vybarkama zapatrabavała ad karespandenta BiełaPAN pakinuć učastak, niahledziačy na toje što bolšaja častka členaŭ kamisii praihnaravali dadatkovaje hałasavańnie pa pytańni prysutnaści žurnalistaŭ. Varta zaŭvažyć, što ŭžo paśla hetaha dla pracy na ŭčastku zmahli akredytavacca dvoje žurnalistaŭ, jakija pryjšli paźniej za astatnich.
BiełaPAN paviedamiŭ pra incydent sakrataru Centrvybarkama Mikałaju Łazaviku. Pytańnie ab hetaj situacyi taksama budzie ŭźniataje na čarhovaj pres-kanfierencyi z udziełam kiraŭnika CVK Lidzii Jarmošynaj.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary