Rasijski śpiecyjalist: Nijakich značnych paškodžańniaŭ korpus reaktara BiełAES nie atrymaŭ

Śpiecyjalisty AKB «Hidrapres» «samym surjoznym čynam» praanalizavali situacyju, što ŭźnikła pry pieramiaščeńni korpusa reaktara błoka № 1 Biełaruskaj AES. Hetuju zajavu načalnika adździeła tryvałaści kanstruktarskaha biuro Leanida Lakišava pryvodzić pres-ofis hrupy kampanij «Atamstrojekspart».

Pavodle słoŭ rasijskaha śpiecyjalista, padčas analizu vykananaja raźlikovaja acenka napružana-defarmavanaha stanu korpusa reaktara pry sudakranańni eliptyčnaha dna korpusa ź plitoj mantažnaj placoŭki. «Hetaja acenka vykonvałasia z vykarystańniem sučasnych dynamičnych mietadaŭ raźliku ŭ kansiervatyŭnaj pastanoŭcy z padrabiaznym matematyčnym madelavańniem jak elemientaŭ korpusa reaktara, tak i mantažnaj placoŭki, — raskazaŭ Lakišaŭ. — U vyniku atrymana, što pryviedzienyja napružańni ŭ dnie korpusa nie pieravyšali narmatyŭnych napružańniaŭ, jakija dapuskajucca, dla ŭmoŭ narmalnaj ekspłuatacyi, a defarmacyi ŭ mietale korpusa znachodzilisia ŭ pruhkaj vobłaści».

«Takim čynam, nijakich značnych paškodžańniaŭ korpus reaktara ŭ hetaj situacyi nie atrymaŭ», — upeŭnieny pradstaŭnik AKB «Hidrapres».

Situacyju prakamientavaŭ pieršy vice-prezident Sajuza mašynabudaŭnikoŭ Rasii Uładzimir Hucienieŭ. «Užo stała viadoma, što incydent nie pryvioŭ da niejkich surjoznych nastupstvaŭ, — pačaŭ jon. — Usio ž taki korpus atamnaha reaktara — heta nie čajny sierviz, a asabliva tryvałaja kanstrukcyja, raźličanaja na roznyja ŭździejańni na praciahu mnohich dziasiatkaŭ hadoŭ ekspłuatacyi atamnaj stancyi. Korpus reaktara Biełaruskaj AES paśla incydentu prajšoŭ nieabchodnyja pravierki, u tym liku roznymi mietadami defiektaskapii».

Pavodle słoŭ śpiecyjalista, heta najbolš sučasnyja technałohii, jakija dazvalajuć pravieryć ŭnutrany stan mietału i zvarnych złučeńniaŭ. «Ničoha inšaha bolš sučasnaha nie prydumana, — padkreśliŭ Hucienieŭ. — Jak my viedajem, jakaść paćvierdžanaja».

Pry hetym uźnikaje i inšaje pytańnie — ab strachavym vypadku. «Rašeńnie ab strachavoj vypłacie ŭ vypadku paškodžańniaŭ prymajecca strachavoj kampanijaj na asnovie vynikaŭ praviedzienaj ekśpiertyzy, a nie zdahadak naziralnikaŭ, jakija nie źjaŭlajucca śpiecyjalistami. Strachavaja kampanija lohka dakaža, što ŭ hetaj situacyi strachavy vypadak nie nastupiŭ, bo abstalavańnie nie atrymała paškodžańniaŭ, a zamoŭcu daviadziecca iści «naprava» pa terminach uvodu ŭ ekspłuatacyju, a taksama mieć inšyja vydatki i straty», — skazaŭ Hucienieŭ.

Kamientujučy pres-ofisu hrupy kampanij «ASE» toje, što adbyłosia, navukovy supracoŭnik instytuta fiłasofii NAN Biełarusi Piotr Piatroŭski zajaviŭ: «Ukidańni, jakija adbyvajucca z boku litoŭskich i niekatorych biełaruskich ŚMI, inśpiravanyja vyklučna najaŭnaj palityčnaj situacyjaj u susiedniaj krainie. Z adnaho boku, takija ŭkidańni vykarystoŭvajucca pradstaŭnikami nacyjanalistyčnych litoŭskich partyj i sił, jakija spačuvajuć im, dla atrymańnia palityčnych ačkoŭ, a ź inšaha — niehatyŭnaja pazicyja ŭ dačynieńni da BiełAES źjaŭlajecca vynikam taho, što ŭ najbližejšyja piać hadoŭ Biełaruś stanie adzinaj krainaj u rehijonie, zdolnaj ekspartavać enierhiju. Takim čynam, kraina paŭstanie pierad vybaram — ekspartavać tannuju enierhiju ź Biełarusi ci darahuju — ź jeŭrapiejskich krain, raźmieščanych na značnaj adlehłaści».

Pavodle słoŭ Piatroŭskaha, vidavočna, što ekanamičnyja faktary našmat bolš značnyja za palityčnyja, i całkam mahčyma, što, niahledziačy «na ŭvieś hety pakazny šum, praź piać hadoŭ, kali skončacca paŭnamoctvy najaŭnaha prezidenta Litvy, my ŭbačym zusim inšaje staŭleńnie da biełaruskaha prajekta».

Jon taksama adznačyŭ, što «takija ŭkidańni zastanucca nieefiektyŭnymi z pryčyny pryznańnia prajekta BiełAES biaśpiečnym ES, JEK i MAHATE».

Nahadajem, siońnia namieśnik hienieralnaha dyrektara dziaržkarparacyi «Rasatam» Alaksandr Łakšyn zajaviŭ, što «Rasatam» hatovy pry žadańni zamoŭcy zamianić korpus reaktara dla Biełaruskaj AES, ź jakim zdaryŭsia incydent 10 lipienia.

Łakšyn pryznaŭ, što ŭ noč z 9 na 10 lipienia adna z subpadradnych arhanizacyj pry vykanańni apieracyi pa pierasoŭvańni korpusa reaktara dapuściła adchileńni ad instrukcyi, z-za jakich adbyŭsia pierakos hruzu pry jaho ŭzdymańni. «Na vyšyni pryblizna čatyroch mietraŭ (pry daŭžyni vyrabu 11 mietraŭ) uźnikła niaspraŭnaść padjomnaha krana, z-za čaho korpus zastavaŭsia ŭ padviešanym stanie bolš za paŭhadziny. Uvieś hety čas pierakos pastupova pavialičvaŭsia i ŭ vyniku pryvioŭ da taho, što korpus reaktara praśliznuŭ pa stropach i pavis dyjahanalna, sutyknuŭšysia ź ziamloj», — paviedamiŭ pradstaŭnik «Rasatama».

Jon padkreśliŭ, što «navat u momant sutyknieńnia ź ziamloj asnoŭnaja vaha vyrabu — bolš za dźvie traciny — utrymlivałasia kranam». «Tamu vykarystoŭvać takija słovy, jak «udar ab ziamlu» ci «padzieńnie», niapravilna, heta ŭvodzić ludziej u zman, bo skažaje sutnaść taho, što adbyłosia, tamu što chutkaść ruchu korpusa nie pieravyšała chutkaści piešachoda», — śćviardžaje jon.

• 0
• 0
• 0
• 0
• 0
• 0
• 0
• 0