Ukraina rychtujecca da ŭviadzieńnia vajennaha stanovišča na vučeńniach «Paŭdniovy viecier—2016»
Uvieś hety tydzień na terytoryi Ukrainy prachodziać vučeńni «Paŭdniovy viecier» — stratehičny etap kompleksnych kamandna-štabnych vučeńniaŭ, paviedamiŭ sajt Ministerstva abarony krainy.
U «Paŭdniovym vietry» udzielničajuć orhany kiravańnia stratehičnaha i apieratyŭna-stratehičnaha ŭzroŭniu - to bok samyja hałoŭnyja ŭkrainskija štabnyja struktury - a taksama asobnyja vajskovyja čaści i padraździaleńni ŭsich kampanientaŭ Uzbrojenych sił Ukrainy.
Asobaja ŭvaha nadajecca pytańniam terytaryjalnaj abarony i pracesu płanavańnia i kiravańnia siłami i srodkami va ŭmovach režymu vajennaha stanovišča.
Tydzień tamu sakratar Nacyjanalnaj Rady biaśpieki i abarony Ukrainy Alaksandr Turčynaŭ nie vyklučyŭ, što vajennaje stanovišča moža być uviedzienaje ŭ suviazi z abvastreńniem situacyi na linii raźmiežavańnia z terytoryjaj, akupavanaj rasijskimi bajevikami.
«Asnoŭnaj metaj padrychtoŭki źjaŭlajecca ŭdaskanaleńnie dziejnaści orhanaŭ vajskovaha kiravańnia i ŭzajemadziejańnia apieratyŭnych, apieratyŭna-taktyčnych hrupovak padčas praviadzieńnia stratehičnych dziejańniaŭ u vyznačanych apieracyjnych zonach», — paviedamlaje Minabarony.
Akramia čysta štabnych vučeńniaŭ, buduć pravodzicca bajavyja strelby, desantavańnie i rejdy Vysokamabilnych desantnych vojskaŭ, pieraadoleńnie vodnych pieraškod. Buduć taksama adpracoŭvacca dziejańni avijacyi i supraćpavietranaj abarony.
Kamientary