Biełaruś padała dakumienty na adnaŭleńnie pastavak rybnaj pradukcyi ŭ Rasiju

Biełaruś padała dakumienty na adnaŭleńnie pastavak rybnaj pradukcyi ŭ Rasiju z čatyroch pradpryjemstvaŭ, paviedamiŭ žurnalistam 7 červienia ŭ Minsku ŭ miežach Forumu rehijonaŭ Biełarusi i Rasii ministr sielskaj haspadarki i charčavańnia Leanid Zajac.

Pavodle jaho słoŭ, terminy adnaŭleńnia pastavak zaležać ad rašeńnia Raśsielhasnahlada. «Tyja pradpryjemstvy, jakija padrychtavanyja da taho, kab pastaŭlać na rasijski rynak, najbližejšym časam buduć razhledžanyja śpiecyjalistami rasijskaha viedamstva», — adznačyŭ Zajac.

Pry hetym jon padkreśliŭ, što syravina, ź jakoj vyrablajecca rybapradukcyja ŭ Biełarusi, pastaŭlajecca z dazvołu Raśsielhasnahlada z atestavanych pradpryjemstvaŭ. Biełaruskija pradpryjemstvy jaje pierapracoŭvajuć i ŭžo sa źmienienym handlovym kodam u novym vyhladzie pastaŭlajuć na charčovy rynak Rasii.

Ministr adznačyŭ, na siońniašni dzień rynak Rasii zakryty dla vaśmi biełaruskich rybapierapracoŭčych pradpryjemstvaŭ. «U Rasii jość, viadoma, pretenzii da našaha boku. I, jak praviła, da pradpryjemstvaŭ pryvatnaj formy ŭłasnaści. My viadziem hłybokuju sanitarna-vieterynarnuju pravierku z boku biełaruskich słužbaŭ. Vystaŭlenyja niekatoryja patrabavańni ŭłaśnikam hetych vytvorčaściaŭ z toj metaj, kab jany vypravili hetuju situacyju niepasredna ŭ siabie na vytvorčaści. Što da rasijskaha boku, to dla ich rynku adkrytyja pastaŭki z takich pradpryjemstvaŭ, jak «Biełrasmorapradukt», «Santa Bremar», «Leor Płastyk», «Biełryba», «Čyzmajstar» i inšych. Usie hetyja pytańni znachodziacca pad kantrolem, ale ŭmovy nieabchodna vykonvać i ŭłaśnikam pradpryjemstvaŭ, a mienavita — hałoŭnyja sanitarnyja praviły, jakija dyktuje charčovy rynak», — adznačyŭ Zajac.

***

Nahadajem, u kastryčniku minułaha hoda Raśsielhasnahlad zajaviŭ pra nieadpaviednaść pradukcyi šerahu biełaruskich rybapierapracoŭčych pradpryjemstvaŭ vieterynarna-sanitarnym patrabavańniam. U śpisie rasijskaha viedamstva fihuravała vosiem pierapracoŭščykaŭ z roznych rehijonaŭ krainy: STAA «Čyzmajstar», AAT «Mahiloŭryba», KVUP «Farelevaha haspadarka «Łachva», SP TAA «Leor Płastyk», STAA «Smak ryby plus», PVHUP «Ivasi-Plus», TAA «Suzor`ie», TDA «Viciebskryba».

U kancy maja kiraŭnik Minsielhascharča Leanid Zajac, adkazvajučy na pytańni parłamientaryjaŭ, zajaviŭ, što biełaruskija rybapierapracoŭčyja pradpryjemstvy majuć sur`ioznyja ciažkaści z-za rasijskaha embarha na impart praduktaŭ z krain Jeŭrasajuza. Jon skazaŭ, što ŭ 2015 hodzie słužby Raśsielhasnahlada prainśpiektavali ŭsie biełaruskija pradpryjemstvy rybnaj haliny, paśla čaho dziesiać pradpryjemstvaŭ byli zakrytyja dla pastavak.

• 0
• 0
• 0
• 0
• 0
• 0
• 0
• 0