Ministerstva transpartu i kamunikacyj sumiesna ź Ministerstvam finansaŭ i Bankam raźvićcia Biełarusi vyrašaje pytańnie ab dadatkovym finansavańni dla zaviaršeńnia budaŭnictva druhoj Minskaj kalcavoj aŭtadarohi va ŭstanoŭleny termin — da 1 studzienia 2017 hoda, paviedamiŭ 20 maja na pres-kanfierencyi pieršy namieśnik ministra transpartu i kamunikacyj Alaksiej Aŭramienka.
Jon adznačyŭ, što srodki dla zaviaršeńnia druhoha etapu budaŭnictva MKAD-2 praduhledžanyja dziaržaŭnaj inviestycyjnaj prahramaj, a taksama finansavańniem z boku Banka raźvićcia. «Na siońniašni dzień dla ŭvodu MKAD-2 srodkaŭ niedastatkova. Tamu my sumiesna ź Ministerstvam finansaŭ i Bankam raźvićcia prapracoŭvajem pytańnie ab dadatkovym finansavańni ŭ metach biezumoŭnaha ŭvodu hetaj darohi da 1 studzienia 2017 hoda», — udakładniŭ Aŭramienka.
«Srodki pieršapačatkova byli zapłanavanyja nie ŭ poŭnym abjomie z toj umovaj, što my niedzie blizu leta znoŭ da hetaha pytańnia vierniemsia. Kab skončyć, nam jašče nieabchodna 1,4 trłn. rubloŭ», — skazaŭ pieršy namieśnik ministra.
Pavodle jaho słoŭ, ahulny košt MKAD-2 aceńvajecca ŭ 5,4 trłn. rubloŭ. Pakul intensiŭnaść ruchu na ŭžo adkrytym učastku MKAD-2 nievialikaja, ale ŭ Mintransie raźličvajuć, što situacyja źmienicca najpierš z-za pieraaryjentacyi tranzitnych patokaŭ.
U liku pieravah vykarystańnia MKAD-2 Aŭramienka vyłučyŭ adsutnaść siezonnych vahavych abmiežavańniaŭ na prajezd ciažkavahavaha transpartu, bo aŭtadaroha vykananaja ŭ cemientabietonnym pakryćci. Akramia taho, trasa biaspłatnaja, što skaračaje vydatki pieravozčykaŭ, daroha novaja i kamfortnaja dla ruchu. Siońnia pieravozčyku, kali jon tranzitam pierasiakaje Biełaruś z Hrodna, i tańniej, i zručniej jechać pa MKAD-2, čym vykarystoŭvać pieršuju kalcavuju. «Heta značyć asnoŭny raźlik na tranzitny transpart, nu i hramadzianam vakoł Minska taksama budzie zručniej pieramiaščacca», — padkreśliŭ pieršy namieśnik ministra transpartu.
Rašeńnie ab ŭźviadzieńni druhoj MKAD było pryniataje jašče ŭ 2010 hodzie, ale jaje aktyŭnaje budaŭnictva pačali ŭ 2014 hodzie paśla daručeńniaŭ Alaksandra Łukašenki. Meta prajekta — razhruzić stalicu ad tranzitnaha patoku aŭtamabilaŭ, palepšyć ekałahičnaje stanovišča.
16 śniežnia 2015 hoda byŭ całkam adkryty ruch pa druhoj kalcavoj na ŭčastku ad aŭtamabilnaj darohi R28 Minsk — Maładziečna — Narač da aŭtamabilnaj darohi M6 Minsk — Hrodna. Dla aŭtatranspartu stali dastupnymi prykładna 47 kiłamietraŭ novaj aŭtatrasy, što spałučyła viciebskuju i hrodzienskuju šašy. Heta pieršy etap uźviadzieńnia MKAD-2, jaki byŭ padzieleny na piać čerhaŭ. Na pieršych troch ź ich raboty byli zavieršanyja raniej — 6 kastryčnika adbyłosia ŭračystaje adkryćcio darohi z udziełam Łukašenki.
Na druhim etapie stvareńnia MKAD-2 płanujecca pabudavać darohu praciahłaściu 41,4 kiłamietra, jakaja złučyć hrodzienskuju i bresckuju šašy. Hetyja raboty miarkujecca zaviaršyć da 1 studzienia 2017 hoda. Ahulnaja praciahłaść MKAD-2 składzie prykładna 160 km: novaje budaŭnictva — pryblizna 90 kiłamietraŭ, a taksama isnyja ŭčastki aŭtadaroh M1/Je30, M2 i R80 — 70 kiłamietraŭ.
Čatyrochpałosnaja daroha z cemientabietonnym pakryćciom adpaviadaje sučasnym patrabavańniam: pa dźvie pałasy ruchu ŭ kožnym kirunku, masty i šlachapravody, jakija padzialajuć transpartnyja patoki, dvuchbakovaja barjernaja aharodža pa vosi darohi dla vyklučeńnia łabavych sutyknieńniaŭ, sietkavaja zaharoda ad žyvioł ŭzdoŭž trasy ŭ rajonie lasnych masivaŭ, śvietłavyja tabło dla infarmavańnia vadzicielaŭ pra situacyju na darozie.
Kamientary