Niadaŭnija dapaŭnieńni i źmieny ŭ Praviły pažarnaj biaśpieki ŭ Biełarusi nie zabaraniajuć palić śviečku ŭ pamiaškańni ŭ padśviečniku abo ŭ admysłovym prystasavańni, paviedamiŭ pres-sakratar MNS Biełarusi Vital Navicki.
«Kali śviečka znachodzicca ŭ padśviečniku ci lubym inšym admysłovym prystasavańni — heta nie adkryty ahoń. Jak i kaminy, piečy abo lubyja ŭstanoŭki dla padrychtoŭki ježy», — rastłumačyŭ Vital Navicki.
Jon taksama rastłumačyŭ, što va ŭstanovach hramadskaha charčavańnia nie dapuskajucca niebiaśpiečnyja truki z ahniom pry padačy straŭ abo kaktejlaŭ.
«Na žal, u Biełarusi byli vypadki, kali ludzi atrymlivali apioki ŭ takich situacyjach», — dadaŭ pradstaŭnik MNS.
«Samaja typovaja niebiaśpiečnaja situacyja z vykarystańniem adkrytaha ahniu — heta kali ŭ ciomnaj šafcy śviečkaj sprabujuć padśviacić pakazańni ličylnika hazu», - taksama adznačyŭ Vital Navicki.
Akramia taho, pradstaŭnik viedamstva źviarnuŭ uvahu, što MNS pastajanna źbiraje prapanovy pa mahčymych źmienach praviłaŭ pažarnaj biaśpieki. Ich možna nakiroŭvać praz sajt ministerstva. Taksama pry MNS dziejničaje hramadska-kansultacyjnaja rada.
Jak paviedamlałasia, dapaŭnieńni i źmieny ŭ Praviły pažarnaj biaśpieki ŭ Biełarusi nabyli moc 1 maja. U pryvatnaści, u budynkach, zbudavańniach i pamiaškańniach zabaraniajecca raspalvać połymia, u tym liku vykarystoŭvać śviečki, pachodni i inšyja ahniavyja efiekty navat u sceničnych pastanoŭkach. Jość niekatoryja vyklučeńni — u tym liku nabaženstvy ŭ cerkvach i vykarystańnie śviečak doma.
Taksama zaraz kureńnie na abjektach dapuskajecca tolki ŭ śpiecyjalna adviedzienych, abstalavanych i paznačanych pakazalnikami miescach, vyznačanych zahadam kiraŭnika subjekta haspadarańnia.
Kamientary