Westki.info: Na Viciebščynie zatrymki zarobkaŭ na vioscy pastavili ludziej na miažu adčaju

Z roznych miescaŭ Viciebskaj vobłaści dachodziać viestki, što pradpryjemstvy sielskaj haspadarki mocna zatrymlivajuć vypłatu zarobkaŭ. Na dvary kaniec lutaha, a mnohija haspadarki nie raźličylisia z rabotnikami jašče za listapad. Sami zarobki ŭpali našmat nižej za aficyjna ŭstanoŭlenuju minimalnuju zarpłatu, ich častkova vydajuć praduktami abo čekami na nabyćcio tavaraŭ u sietcy Biełkaapsajuza.

Praz sacyjalnyja sietki my sabrali śviedčańni pra niavypłatu zarobkaŭ u bolš jak dziasiatku haspadarak u Hłybockim i Dokšyckim rajonach. Viestki pra zatrymku zarobkaŭ i ich vypłatu praduktami dachodzili i ź Miorskaha rajona, i z Šarkaŭščynskaha, i z Brasłaŭskaha. Vyhladaje, što takaja situacyja skłałasia ŭ bolšaści ahrapradpryjemstvaŭ Paazierja, i zakranuła dziasiatki tysiač ludziej.

«U AAT «Załataja padkova» (vioska Babičy [Hłybocki rajon]) pierad Novym hodam kiraŭnictva atrymała pa 500.000 rubloŭ, rabočyja — pa 200.000 — 300.000».

«U KUHSP «Dokšycki» [Kruleŭščyna, Dokšycki rajon] niadaŭna vypłacili 70% zarobku za kastryčnik. Dyrektar kaža rabotnikam, što rajon nie daje hrošaj. Amal u kožnym kałhasie takaja situacyja».

«AAT «Załataja padkova». U dajarki zarobak 700.000, vypłočvajuć 500.000. Apošni zarobak ja atrymała za listapad. Elektryčnaści na rabocie niama [adklučyli za niavypłatu?]. Adnosiny kiraŭnikoŭ da padnačalenych – žachlivyja».

«U AAT «Sielcy» [Hłybocki rajon] zarobak składaje 500.000 — 800.000 rubloŭ. Na 200 tysiač vydajecca pradukcyjaj».

U studzieni ŭ sacyjalnych sietkach było apublikavana fota raźlikovaha listka. Pavodle taho, chto publikavaŭ, heta – zarobak supracoŭnika AAT «Załataja padkova» za listapad 2015 hoda. Za pracu, pahadzinna i ździelna, za staž i za vychodnyja i śviaty naličana 696.294 rubloŭ. Ale ŭ nastupnym radku čytajem: «Źniata z-za adsutnaści vyručki» – 283.955 rubloŭ. Jašče 4.413 rubli adniali na inšyja patreby. «Da vydačy na ruki» zastałosia ŭsiaho 407.926 rubloŭ.

«U SVK «Strynadki» [Hłybocki rajon] nie vypłacili 70% pracentaŭ zarobka za lipień i 100% za žnivień. Kožny miesiac treba vybirać u mahazinie Biełkaapsajuza tavary na 30% zarobku. Niadaŭna dali zarobak za listapad. Na miasakambinacie ŭ Hłybokim zahadvajuć vybirać u kramach Biełkaapsajuza i ŭ kramie pradpryjemstva na 30% zarobku. Kali nie vybraŭ hetuju sumu, to dajuć tušonku na reštu sumy».

«Svajaki žyvuć u Strynadkach, Padśvilski sielsaviet. Tam taksama nie całkam vydajuć zarobak. Dajuć pa 20 pracentaŭ. Dali «pracenty» za śniežań i pradukcyju. I pa 100.000 na mahazin. Za leta zusim «skrucili» hrošy… Spadziajusia, majo imia nidzie nie ŭspłyvie».

«U AAT «Hłybocki ahrasiervis», dzie ja pracuju, na siońnia nie vypłačany zarobak za śniežań. Pracoŭnaje miesca stała ŭsiaho tolki ŭmoŭnaściu, za jakuju mnohija trymajucca».

U AAT «Tarhuny» [Dokšycki rajon] ludzi čakajuć zarobak za śniežań. Ja čuŭ, što ŭ inšych kałhasach zatrymki bolšyja, čym u nas».

«Sitcy [AAT «AhraSitcy», Dokšycki rajon] — heta niešta. Za kastryčnik kamu dali zarobak, kamu nie dali, kamu na kramu pieraličyli. Tam bieznadziejnaść».

«Ludzi ŭ rospačy. Bačyŭ, jak płakali žančyny, bo hrošaj niama. Na Novy Hod dali kožnamu pa torcie — i ŭsio. Buchhałtary napisali zajavy na zvalnieńnie. Nie padpisali im. Kiraŭnik pryhraziŭ: chto zvolnicca, nie dazvolać nidzie bolš uładkavacca», — piša jašče adzin žychar vioski Sitcy.

Nam paviedamlajuć taksama pra zatrymku zarobkaŭ u KUHSP «Za Radzimu» (Udzieła, Hłybocki rajon), DP «Aziarcy» (Hłybocki rajon), filijale «Proškava» AAT «Hłybocki rajahraservis», AAT «Barsučanka» (Dokšycki rajon) u haspadarkach Brasłaŭskaha, Šarkaŭščynskaha rajonaŭ.

21 studzienia na pramuju liniju namieśnika staršyni Viciebskaha abłvykankama Uładzimira Biełavusava telefanavaŭ rabotnik fiermy z Dokšyckaha rajona i raspavioŭ, što žyvie biez zarobku z kastryčnika. Hetaksama skardziłasia, što nie atrymała zarobku za kastryčnik, rabotnica fiermy, maci traich dziaciej ź Miorskaha rajona.

Infarmacyjnaja ahiencyja BiełTA paviedamiła, što hetyja pytańni «ŭziatyja na kantrol». Miesiac kantrolu prajšoŭ, ale situacyja z zarobkami ŭ ahrapradpryjemstvach nie źmianiłasia.

Apytanka

• 0
• 0
• 0
• 0
• 0
• 0
• 0
• 0