Kampazicyja «Heta ziamla» hurtu Navi imkliva pakaraje sercy biełarusaŭ usich uzrostaŭ. 18 studzienia hurt Navi zavitaje da dzietak z art-studyi «Zialony jabłyk» (v. Baraŭlany, Minski r-n), jakija vielmi chočuć, kab pieśnia prahučała na jašče adnym mižnarodnym konkursie. Z 26 pa 28 maja ŭ h.Suvałki (Polšča) budzie prachodzić dziciačy vakalna-tancavalny konkurs «Muszelki Wigier», na jakim hurt art-studyi «Zialony jabłyk» vykanaje pieśniu «Heta ziamla».
Hurt Navi, jaki byŭ zasnavany dva hady tamu, chutkimi tempami nabyvaje papularnaść. U hetym hodzie małady duet uvajšoŭ u dziasiatku finalistaŭ nacyjanalnaha adboru na «Jeŭrabačańnie-2016». Kampazicyja «Heta ziamla» ŭ ich vykanańni — adzinaja biełaruskamoŭnaja pieśnia siarod usich udzielnikaŭ. Svajoj ščyraściu, soniečnaściu i dabrynioj pieśnia pryvabiła i dzietak z «Zialonaha jabłyka».
Art-studyja «Zialony jabłyk» u Baraŭlanach pracuje ŭžo 4 hady. Tut pravodziacca zaniatki dla dzietak i padletkaŭ pa akciorskim majsterstvie, vakału, chareahrafii. Supracoŭniki studyi stvarajuć atmaśfieru, u jakoj dzieci mohuć znajści i raskryć schavanyja zdolnaści i talenty, raźvić i pašyryć svaje mahčymaści. Voś užo bolš za hod u art-studyi staviać vyklučna biełaruskamoŭnyja pjesy i śpiektakli. Bo i vykładčyki, i dzieci ličać, što pradstaŭlać svaju krainu na mižnarodnych konkursach treba tolki na rodnaj movie.
Sustreča z hurtam Navi adbudziecca ŭ paniadziełak, 18 studzienia ŭ 19.00. pa adrasie: v. Baraŭlany, vuł. 40 hod Pieramohi, 34.
Padčas sustrečy ŭ dzietak budzie mahčymaść nie tolki pačuć najlepšyja pieśni ŭ vykanańni lubimych Navi, ale i sfatahrafavacca z muzykami i atrymać aftohrafy.
Padtrymać adzinuju biełaruskamoŭnuju pieśniu ŭ finale nacyjanalnaha adboru na «Jeŭrabačańnie-2016» možna, pryniaŭšy ŭdzieł u akcyi #myzvamiNavi, jakuju raspačała ŭ sacsietkach kampanija Prastora.by. Raźmiaščajcie fotazdymki z chešteham #myzvamiNavi ŭ sacyjalnych sietkach i atrymajcie źnižku 5% na lubuju pakupku ŭ kramie «Biełaruskaja Prastora» u handlovym centry «Maskoŭska-Vienski» (pr-t Niezaležnaści, 58, druhi pavierch, paviljon 205).
Kamientary