«Nie, nie abmiarkoŭvałasia» — Łukašenka viartajecca z Maskvy biez avijabazy i kredytu
Alaksandr i Mikałaj Łukašenki ŭ Maskvie. Fota Rojterz.
Avijabaza? «Nie, nie abmiarkoŭvałasia», — skazaŭ pres-sakratar prezidenta Rasii Dźmitryj Piaskoŭ paśla pieramoŭ Alaksandra Łukašenki i Uładzimira Pucina.
U siaredzinie vieraśnia Pucin daručyŭ Minabarony i MZS pravieści ź Minskam pieramovy i pa vynikach padpisać pahadnieńnie ab stvareńni ŭ Biełarusi rasijskaj avijabazy. Adnak Alaksandr Łukašenka vystupiŭ suprać hetaj idei. Varta adznačyć, što suprać bazy kateharyčna vystupiła biełaruskaja apazicyja, u Minsku prajšli akcyi pratestu.
U adkaz Rasija pryniała rašeńnie nie vydzialać Biełarusi kredyt z padkantrolnaha joj jeŭrazijskaha Antykryzisnaha fondu. Tym časam Minsk prasunuŭsia ŭ pieramovach ź Mižnarodnym valutnym fondam ab vydzialeńni kredytu takoha ž pamieru, ale pad nižejšy pracent.
Pierad pieramovami ŭ Maskvie analityki razychodzilisia ŭ dumkach, ci vykrucić Pucin Łukašenku ruki. U vyniku, jak vyhladaje, pieramovy skončylisia ničym: ni bazy, ni hrošaj. Padpisanaja tolki małaznačnaja zajava ni pra što.
Zrešty, abodva kiraŭniki krain vysoka acanili pieramovy. Łukašenka skazaŭ, što pamiž Biełaruśsiu i Rasijaj nie zastałosia nivodnaha pytańnia, jakoje patrabuje dadatkovaj prapracoŭki. Łukašenka dadaŭ, što «absalutna daviaraje» svajmu rasijskamu kalehu.
Pucin ža adznačyŭ, što pieramovy byli kanstruktyŭnymi i dziełavymi. Pa mierkavańni prezidenta Rasii, supracoŭnictva ź Biełaruśsiu maje stratehičny charaktar.
Pucin padkreśliŭ, što Biełaruś i Rasija «majuć blizkija pazicyi pa Ukrainie i Siryi». Źviartaje na siabie ŭvahu «blizkija», a nie «adnolkavyja».
Paśla hetaha była dastatkova raspłyvistaja fraza: «U metach umacavańnia rehijanalnaj stabilnaści i biaśpieki damovilisia aktyŭna raźvivać vajskovaje i vajskova-techničnaje supracoŭnictva», — dadaŭ Pucin.
21 śniežnia adbudziecca jašče adna sustreča kiraŭnikoŭ Biełarusi i Rasii. Na hety raz u ramkach samita ADKB.
Taksama Pucin zrabiŭ nastupnuju zajavu, što dla hramadzian Biełarusi nie treba budzie zdavać ekzamien na viedańnie ruskaj movy, historyi i asnovaŭ zakanadaŭstva, kab žyć i pracavać u Rasii.
«Uličvajučy asablivy charaktar rasiejska-biełaruskich suviaziaŭ, my pryniali pryncypovaje rašeńnie nie raspaŭsiudžvać dziejańnie hetych normaŭ na hramadzian Biełarusi. Dla hetaha spatrebicca ŭnieści papraŭki ŭ dziejučaje zakanadaŭstva. Adpaviedny zakonaprajekt užo padrychtavany i razhladajecca ŭ Dziaržaŭnaj Dumie», — skazaŭ Pucin.
Łukašenka zaprasiŭ kiraŭnika Rasii nanieści vizit u adkaz u Biełaruś.
Kamientary