Bajec ATA: Zatrymany ŭ Minsku sapraŭdy vajavaŭ. My dumali, što jon varjat, ci ahient

Biełaruski śledčy kamitet paviedamiŭ padrabiaznaści pra zatrymańnie 26 listapada na čyhunačnym vakzale Minska uzbrojenaha mužčyny, jaki pryjechaŭ z Ukrainy. Byli apublikavanyja fotazdymki kanfiskavanych rečaŭ: broniekamizelka, samarobnaja hranata, pistalet Makarava, niekalki pašpartoŭ…

Pavialičyć

Pa dadzienym fakcie raspačataja kryminalnaja sprava za «Niezakonnyja dziejańni ŭ dačynieńni zbroi, bojeprypasaŭ i vybuchovych rečyvaŭ».

Hetaja infarmacyja vyklikała šmat pytańniaŭ. Niaŭžo realny ŭdzielnik bajavych dziejańniaŭ, jaki znachodziŭsia ŭ zonie bajavych dziejańniaŭ nie bolš za paŭtara miesiacy, moža lohka prajechać biełaruskuju miažu sa zbrojaj i chadzić ź pistaletam pa minskim vakzale, pryčym, u broniekamizelcy pad kurtkaj.

Na sajcie SK byŭ apublikavany zdymak daviedki pra toje, što zatrymany braŭ udzieł u bajavych dziejańniach na terytoryi Ukrainy z 6 kastryčnika hetaha hoda. Paviedamlajecca, što mužčyna — 28-hadovy uradženiec Viciebščyny, navučaŭsia va ŭniviersitecie ŭ Navapołacku.

Źviartajemsia niepasredna ŭ «Pravy siektar» z pytańniem, ci sapraŭdy zatrymany — ich bajec.

Arciom Skarapadski, pres-sakratar arhanizacyi, paśla našaha telefanavańnia źviazaŭsia z kamandziram taktyčnaj hrupy imia kapitana Vałavika, u jakoj, pavodle daviedki, vajavaŭ zatrymany. Kamandzir infarmacyi pra zatrymańnie ich bajca na momant telefanavańnia nie mieŭ. Pavodle słoŭ Skarapadskaha, usie bajcy-biełarusy z «Pravaha siektara» znachodziacca ŭ miescach niasieńnia słužby. Taksama pres-sakratar padkreśliŭ, što apublikavanuju daviedku lohka padrabić. Usiu nazvanuju infarmacyju Skarapadski nazvaŭ papiaredniaj.

Z ananimnych krynic Jeŭraradyjo atrymała fotazdymak zatrymanaha na čyhunačnym vakzale. Pakazvajem fota bajcu-biełarusu, jaki biare ŭdzieł u ATA na baku ukrainskich vojskaŭ. Krynica niečakana paznaje čałavieka na zdymku.

«Heta nie fejk, sapraŭdy, taki chłopiec isnuje. Jon z «Pravaha siektara». Pra jaho adjezd nichto nie viedaŭ. My mieli ź im kantakt, ale nie bolej za toje. Aścierahalisia hetaha čałavieka, bo jon dziŭna siabie pavodziŭ. My pamiž saboj žartavali: jon ci z prusakami ŭ hałavie, ci ahient biełaruskich śpiecsłužbaŭ. Ci adno i druhoje adnačasova», — dzielicca infarmacyjaj krynica.

Jeŭraradyjo: Čamu vy padazravali hetaha čałavieka?

Udzielnik ATA: U Biełaruś jon jeździŭ nie ŭ pieršy raz za ŭvieś karotki čas, što jon tut znachodziŭsia. Najpierš, z hetaj pryčyny my jaho aścierahalisia. Kali ščyra, fotazdymki zbroi, jakuju ŭ jaho nibyta kanfiskavali, vielmi ździŭlajuć. Pistalet Makarava tut redkaść. Na čornym rynku jon kaštuje bolš za 1000 dołaraŭ. Našy chłopcy z vyviedki nabyvali PM. I toje, treba było pašukać. Kab vy razumieli, aŭtamat ci kulamiot znajści ŭ razy praściej. A štuka baksaŭ — durnyja hrošy! AKS-74 (małahabarytnaja madel aŭtamata Kałašnikava, — Jeŭraradyjo), naprykład, kaštuje ad 300 da 700 baksaŭ. My ličym, što jaho mahli ŭziać «hołym», ale z dakumientami. A inšaje da spravy ŭžo prykłali.

Udzielniki «Taktyčnaj hrupy «Biełaruś», jakaja ŭvachodzić u strukturu «Pravaha siektaru», taksama paznali čałavieka na fota:

«Heta bajec z pazyŭnym «Duk». Jon nie ŭvachodziŭ u šerahi našaha padraździaleńnia, tamu my nie možam adkazvać za jaho dziejańni. Pakul heta ŭsio, što možam prakamientavać». 

• 0
• 0
• 0
• 0
• 0
• 0
• 0
• 0