Prezident RF Uładzimir Pucin nazvaŭ krušeńnie Su-24 nad Siryjaj udaram u śpinu, jaki byŭ naniesieny Rasii pamahatymi terarystaŭ.
«Hetaja padzieja vychodzić za ramki zvyčajnaj baraćby z teraryzmam. Viadoma, našy vajskoŭcy viaduć hieraičnuju baraćbu z teroram, nie škadujučy siabie i nie škadujučy svajho žyćcia. Ale siońniašniaja strata źviazanaja z udaram, jaki nam nanieśli ŭ śpinu pamahatyja terarystaŭ. Pa-inšamu ja nie mahu kvalifikavać toje, što siońnia zdaryłasia», — skazaŭ Pucin na sustrečy z karalom Iardanii Abdałoj II.
Jon zajaviŭ, što Su-24 byŭ źbity nad terytoryjaj Siryi rakietaj «pavietra-pavietra» z tureckaha samalota F-16 na vyšyni 6000 mietraŭ za kiłamietr ad tureckaj terytoryi, a ŭpaŭ na siryjskaj terytoryi za čatyry kiłamietry ad miažy.
Pa słovach Pucina, źbity samalot pravodziŭ apieracyju pa baraćbie ź ID u harach paŭnočnaj Łatakii, «dzie skancentravanyja bajeviki, u asnoŭnym vychadcy z Rasijskaj Fiederacyi». «U hetym sensie jany vykonvali svaju niepasrednuju zadaču previentyŭnych udaraŭ pa terarystach, jakija ŭ lubuju siekundu ŭ luby čas mahli viarnucca ŭ Rasiju. Heta, viadoma, ludzi, jakich treba naŭprost adnosić da mižnarodnych terarystaŭ», — skazaŭ Pucin.
«Hetaja trahičnaja padzieja budzie mieć surjoznyja nastupstvy dla rasiejska-tureckich adnosin. My zaŭsiody stavilisia da Turcyi jak nie prosta da blizkaha susieda, a jak da družalubnaj dziaržavy. Nie viedaju, kamu było patrebna toje, što zroblena siońnia, va ŭsiakim razie nie nam.
Zamiest taho kab nieadkładna naładzić z nami nieabchodny kantakt, nakolki nam viadoma, turecki bok źviarnuŭsia da svaich partnioraŭ pa NATA dla abmierkavańnia hetaha pytańnia, jak byccam heta my źbili ich samalot, a nie jany naš», — skazaŭ Pucin.
Jon taksama zajaviŭ, što ŭ Maskvie «daŭno fiksavali toj fakt, što na terytoryju Turcyi idzie vialikaja kolkaść nafty i naftapraduktaŭ z zachoplenych terytoryj — adsiul i vialikaje hrašovaje padsiłkoŭvańnie bandfarmavańniaŭ».
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary