U Minsku płanujuć stvaryć reabilitacyjny centr dla raniej sudzimych

Pa heta paviedamiŭ staršy inśpiektar upraŭleńnia nahladna-vykanaŭčaj dziejnaści MUS Siarhiej Drazdoŭ na forumie pa pytańniach resacyjalizacyi byłych źniavolenych 17 listapada ŭ Minsku. 

Centr płanujecca adkryć pry Domie načnoha znachodžańnia asob biez peŭnaha miesca žycharstva, dapamoha budzie akazvacca asobam, jakija vyzvalilisia ź miescaŭ źniavoleńnia i stracili sacyjalnyja suviazi. «Jany mała čym adroźnivajucca ad tak zvanych bamžoŭ. Dla ich resacyjalizacyi i pavinien isnavać centr», — skazaŭ Drazdoŭ.

Jon padkreśliŭ, što pazicyja MUS takaja: «Kanstruktyŭnaje ŭzajemadziejańnie orhanaŭ unutranych spraŭ, Ministerstva pracy i sacyjalnaj abarony, miascovych vykanaŭčych orhanaŭ, hramadskich arhanizacyj u pytańniach sacyjalnaj adaptacyi asob, jakija majuć sudzimaść, vystupiła b najvažniejšym faktaram, jaki strymlivaje źjaŭleńnie recydyvu, i spryjała viartańniu ludziej da narmalnaha ładu žyćcia». 

Namieśnik dyrektara doma načnoha znachodžańnia Łarysa Vałaščuk zaznačyła, što MUS mieła padobny centr, ale jaho zakryli. Ciapier jaho funkcyi sprabujuć uskłaści na Dom načnoha znachodžańnia — ustanovu, jakaja znachodzicca ŭ padparadkavańni kamiteta pa pracy, zaniataści i sacyjalnaj abaronie Minharvykankama. 

«Ludzi, jakija vyzvalilisia ź miescaŭ źniavoleńnia, časta nie hatovy žyć u hramadstvie, majuć patrebu ŭ adaptacyjnym pieryjadzie, — skazała Vałaščuk. — Miž tym my dajem tolki načleh. Akramia taho, ich znachodžańnie ŭ domie moža pravakavać šerah kanfliktaŭ. U nas na adnaho čałavieka prypadaje 2,1 kv. m. Jašče adna prablema — psichołahi, jakija pracujuć u centrach sacyjalnaha absłuhoŭvańnia, nie majuć vopytu pracy z byłymi źniavolenymi. Časta heta vypusknicy VNU, ź jakimi byłyja asudžanyja pavodziać siabie nachabna».

U suviazi z hetym namieśnik načalnika ŭpraŭleńnia nahladna-vykanaŭčaj dziejnaści MUS Siarhiej Alaškievič ukazaŭ na vopyt Hiermanii, dzie padobnyja centry pracujuć na praciahu dziesiacihodździaŭ. U vypadku kanfliktaŭ abo supraćpraŭnych dziejańniaŭ źviartajucca ŭ palicyju. Jon padkreśliŭ, što złačynstvy učyniajuć jak raniej sudzimyja, tak i ludzi biez sudzimaści. 

«U nas jość baza, na jakoj možna stvarać centr, — heta Dom načnoha znachodžańnia. Hetuju bazu treba napaŭniać śpiecyjalistami, napracoŭvać vopyt, pry ŭźniknieńni prablem možna vychodzić z zakanadaŭčaj inicyjatyvaj. Samy vostry pieryjad — heta pieršyja try miesiacy, na praciahu jakich asudžany vybiraje ład žyćcia», — skazaŭ Alaškievič.

• 0
• 0
• 0
• 0
• 0
• 0
• 0
• 0