Vicis Jurkonis: Maryć pra niejki dyjałoh z Łukašenkam niesurjozna i pamyłkova

Pra heta litoŭski palitołah Vicis Jurkonis zajaviŭ u intervju charter97.org. Pavodle jaho słoŭ, nijakich vybaraŭ nie było, a Alaksandr Łukašenka praciahvaje raźličvać na hrošy ad Kramla.

Pavialičyć

— Jak vy prakamientujecie vyniki «vybaraŭ» u Biełarusi?

— Vybaraŭ nie było, była spłanavanaja imitacyja, jakaja pakazvaje, nakolki ŭłada nie ŭpeŭnienaja ŭ sabie. Daterminovaje hałasavańnie — za 36%, ahulnaja jaŭka — za 85%, nu voś vam i «standarty Łukašenki». I ŭsie apraŭdańni, što narod usio roŭna za jaho hałasavaŭ, nie majuć nijakaj padstavy, pakul ułada ŭ krainie realna nie abirajecca.

Asobnaja razmova pra apazicyju, dzie jany zaraz, što budzie ŭ budučyni. Kali bačyš, što štab Karatkievič śviatkuje i pje šampanskaje, heta vyhladaje jak śviata la mahiły biełaruskaj demakratyi. Tak, jaje realna nikoli nie było, i z takimi namahańniami jaje nie pabuduješ. Ale tady i nie treba ŭdzielničać u hetaj imitacyi. I heta tyčycca i tych, chto bajkatuje na kanapie, i tych, chto kidaje pusty vyklik.

— ES maje namier admovicca ad sankcyj u dačynieńni da Biełarusi i Łukašenki, z čym heta źviazana i ci možna taki krok nazvać pravilnym?

— Hety praces užo pajšoŭ raniej, i ja bolš źviazvaju heta z vyzvaleńniem palityčnych źniavolenych. Tak, represij masavaha charaktaru padčas vybaraŭ nie było, i hetaha dla niekatorych palitykaŭ u ES budzie dastatkova, kab zrabić dadatkovy krok.

Usio heta vielmi časova, režym pieražyŭ hetyja jeŭrapiejskija abmiežavalnyja miery, a sutnaść režymu nie źmianiłasia. Ale davajcie nie budziem kryvadušničać i skažam, što realnych sankcyj suprać Biełarusi nie było, vioŭsia handal, byli inviestycyi ŭ Biełaruś, biźnies i navat palityki sustrakalisia. Admova ad hetych mier — heta admova ad pryncypaŭ i pryznańnie taho, što Jeŭropa vielmi stamiłasia trymacca kaštoŭnasnaj pazicyi adnosna Biełarusi.

— Što vy možacie skazać z nahody zajaŭ Łukašenki ŭ dačynieńni da rasijskaj bazy ŭ Biełarusi?

— Talenavity manipulatar. Vajennyja abjekty RF u Biełarusi ŭžo daŭno isnujuć, a jon usio roŭna ŭmudrajecca padmanvać jak svoj narod, tak i mižnarodnych partnioraŭ. A pa sutnaści spravy, jon prosta klančyć hrošaj u Kramla.

— Ci možna prahnazavać dalejšaje «paciapleńnie adnosin» z Zachadam i jak, na vašu dumku, paviadzie siabie paśla «vybaraŭ» Łukašenka?

— Zachodnija palityki časta vielmi naiŭnyja z nahody ŭschodnich partnioraŭ, časam prosta majuć škurnuju cikavaść, ale paciapleńnie adnosin zaležyć nie ad palitykaŭ u Brusieli, a ad nastrojaŭ u Minsku i pavadka Kramla. Sacyjalna-ekanamičnaja situacyja ŭ hetych partnioraŭ nie vielmi, tak što ŭ dadzieny momant mahčymy patok finansaŭ ad Jeŭropy cikavy. Ale maryć pra niejki dyjałoh ci navat jeŭrapieizacyju — heta prosta niesurjozna i pamyłkova.

• 1
• 0
• 0
• 0
• 0
• 0
• 0
• 0