Žychar rajona, dzie ŭ Łukašenki najbolš hałasoŭ: U nas 3,5 miljony — dobry zarobak
Naraŭlanski rajon na sioletnich vybarach staŭ čempijonam u simpatyjach da dziejnaha kiraŭnika krainy. Za jaho prahałasavała 98,4% vybarščykaŭ. Na padlikach nie było niezaležnych naziralnikaŭ. Hety rajon na Homielščynie paciarpieŭ ad avaryi na Čarnobylskaj AES.
Tut žyvuć 10 tysiač čałaviek, ź ich pracuje 4,5 tysiačy.
Hladzim, što ž vydatnaha zroblena kiraŭnikom krainy dla ludziej u hetym rehijonie, kab mieć takuju padtrymku.
Aficyjnych biespracoŭnych u Naroŭli — 47 čałaviek.
«Niezrazumieła, čaho jany nie chočuć, bo vakansij u nas udvaja bolej. Zarobak na hetych vakansijach — jość 2, jość 3 miljony», — apisvajuć u miascovym upraŭleńni pracy, zaniataści i sacyjalnaj abarony.
Siaredni zarobak u rehijonie za hetyja paŭhoda — 4,9 miljona. 48 vakansij znachodzim na sajcie Minpracy, abiacajuć ad 2 da 6 miljonaŭ.
Krama praduktaŭ kala lakarni ŭ Naroŭli. Pradaviec skardzicca, nabyvajuć mienš praduktaŭ, bo padaje ŭzrovień žyćcia. Siaredni ček na čałavieka 150-200 tysiač.
«U asnoŭnym — kaŭbasa, chleb, małako. Ryba drenna idzie. Ciapier mienš praduktaŭ biaruć, u ludziej zarobki padajuć. Małaka našmat mienš my stali zamaŭlać. Kansiervy, sałaty nie biaruć», — raskazvaje pradaviec.
U miascovaj kramie bytavoj technikaj štodzień robiać da 10 pakupak. U asnoŭnym, šviejnyja i pralnyja mašyny, televizary.
«My handlujem technikaj. Kali ŭ ludziej niešta łamajecca — nabyvajuć. Z bujnoj techniki da 10 čałaviek za dzień. Asabliva na žyćcio ŭ nas ludzi nie skardziacca», — apisvajuć u kramie techniki.
Znachodzim Naraŭlanca Alaksandra, jaki na vybary nie chadziŭ pryncypova, «bo niama sensu». Jon žyvie i pracuje ŭ Naroŭli, a dobrym zarobkam dla svajho horada nazyvaje 3,5 miljona:
«U nas sielskahaspadarčy rehijon. Dy ciapier, vidać, paŭsiul tolki sielskaja haspadarka i vyžyvaje. 3,5 miljona — heta dobry ŭ nas zarobak, a to i mienš».
18,2% pradpryjemstvaŭ rajona — stratnyja. Naraŭlanščyna maje 235 miljonaŭ praterminavanych kredytaŭ, pa źviestkach Biełstat. Nie za Łukašenku tut hałasavała 60 čałaviek na ŭvieś rajon. Heta krychu bolš za kolkaść biespracoŭnych.
Kamientary