«Uładami adnaznačna ŭziaty kurs na rehistracyju Karatkievič»

Kamandy pretendentaŭ na prezydenctva Viktara Ciareščanki i Siarhieja Hajdukieviča zajaŭlajuć, što ŭžo sabrali nieabchodnyja dla rehistracyi sto tysiač podpisaŭ. Blizka da hetaj ličby padyšoŭ i Mikałaj Ułachovič. Pra što śviedčać hetyja zajavy, pra jaki scenar vybaraŭ? Ci aznačaje heta, što ŭłada, jak i ŭ 2010 hodzie, maje namier zarehistravać faktyčna ŭsich patencyjnych kandydataŭ?

Na hetyja dy inšyja pytańni ŭ pieradačy «Ekspertyza Svabody» adkazvajuć namieśnik redaktara hazety «Naša Niva» Źmicier Pankaviec i publicyst Vadzim Kaznačejeŭ. Viadzie pieradaču Vital Cyhankoŭ.

Cyhankoŭ: Ci vierycie vy dadzienym nakont zboru podpisaŭ, jakija pradstaŭlajuć Ciareščanka, Hajdukievič i Ŭłachovič? Što heta aznačaje? Mahčyma, hetyja kandydaty ŭžo viedajuć, što ich zarehistrujuć?

Pankaviec: Ja nie zusim vieru ŭ hetyja ličby. Što tyčycca Viktara Ciareščanki — ludzi ŭ jaho nie idejnyja, pracujuć za hrošy, pikietaŭ pa horadzie vielmi mała, i ŭ abychodzie kvateraŭ ich nichto nia bačyŭ. Tak što kazać, što Ŭłachovič i Ciareščanka sabrali pa sto tysiač — heta prosta śmiešna.

Śviedčyć heta najpierš pra toje, što hetyja kandydaty viedajuć — jany buduć zarehistravanyja, jany buduć u vybarčych biuleteniach dla hałasavańnia. I tamu asabliva nie saromiacca, nazyvajučy ličby sabranych podpisaŭ.

Kaznačejeŭ: Ja, viadoma, nie mahu skazać, ci byli niejkija kankretnyja pieramovy ŭ hetych kandydataŭ z uładami. Kali i byli, to ź niejkimi drobnymi klerkami — a moža, i zusim nie było. Ale jany adčuvajuć hieneralnuju liniju ŭłady, jakaja nie źmianiajecca ad papiaredniaj kampanii — rehistravać usich i zrabić dosyć vialikuju kolkaść kandydataŭ.

Što da samich ličbaŭ, to Źmicier skazaŭ — «nie zusim vieru». A ja zusim nia vieru. 

Što tyčycca Taciany Karatkievič, tut užo vidać pa peŭnych prykmietach, što kurs adnaznačna ŭziaty na jaje rehistracyju. A z boku Labiedźki i Kalakina — kali ŭłady adčujuć niebiaśpieku, to mohuć ich nie zarehistravać. 

Pankaviec: Isnuje ryzyka sutyknucca z kazachstanskaj sytuacyjaj — kali kandydataŭ nibyta chapaje, ale nichto ź ich realna nie krytykuje ŭładu.

Cyhankoŭ: Ale chiba heta nia samy niepažadany dla Łukašenki scenar?

Pankaviec: A ad jaho ŭžo mała što zaležyć. Kali Labiedźka i Kalakin sumlenna zajaŭlajuć, što jany nie paśpiavajuć sabrać sto tysiač, to i pytańnie adpadzie samo saboj — navat Jarmošyna nia moža namalavać podpisy hetym kandydatam. Tamu ja nie vyklučaju takoha, «kazachstanskaha» varyjantu.

Cyhankoŭ: Kali kazać pra acenku vybaraŭ Zachadam, to jana zaležyć tolki ad vykanańnia peŭnych pracedur, ci najaŭnaść niejkich kandydataŭ taksama maje značeńnie?

Pankaviec: Prysutnaść apazycyjnych kandydataŭ — heta ŭsio ž istotny čyńnik u tym, jak buduć acenienyja hetyja vybary. Kali tam zastanucca Łukašenka z Ułachovičam — heta adna sprava. Kali tam buduć ludzi, jakija pradstaŭlajuć niejkija alternatyŭnyja pohlady — zusim inšaja. Nichto ŭ Eŭropie nia pojdzie na pryznańnie hetych vybaraŭ, nichto nia skaža, što jany prajšli sumlenna i demakratyčna. Ale možna raźličvać, što acenki hetych vybaraŭ buduć miakčejšyja.

Kaznačejeŭ: Mnie zdajecca, tut jość peŭnyja niuansy. U 2010 hodzie peŭnymi eŭrapiejskimi strukturami ŭžo była padrychtavanaja daktryna «adnosnaha pryznańnia» vybaraŭ. I kab nie padziei 19 śniežnia, jana była b uviedzienaja. Kali sioleta ničoha takoha dramatyčnaha nie adbudziecca — a najchutčej jakraz tak — to i budzie niejki varyjant «adnosnaha pryznańnia». I dla hetaha najaŭnaść niejkich apazycyjnych kandydataŭ była b pažadanaja.

• 0
• 0
• 0
• 0
• 0
• 0
• 0
• 0