Prezident ZŠA Barak Abama zaviaršyŭ svoj piacidzionny vizit u Afryku. Naprykancy jon papiaredziŭ lidaraŭ afrykanskich dziaržaŭ, što im treba zabiaśpiečyć źmianialnaść ułady.
«Nichto nie pavinien zastavacca prezidentam usio žyćcio», — skazaŭ Abama, vystupajučy ŭ štab-kvatery Afrykanskaha sajuza ŭ stalicy Efiopii Adys-Abiebie.
«Ja nie razumieju, čamu niekatoryja tak doŭha žadajuć zastavacca va ŭładzie, asabliva, kali ŭ ich stolki hrošaj», — skazaŭ Abama, vystupajučy pierad 54 členami sajuza.
U hetaj frazie možna ŭłavić davoli adkryty namiok na afrykanskich lidaraŭ. Abama asabliva padkreśliŭ, što heta tyčycca Burundzi, čyj prezident Pjer Nkurunziza byŭ pieraabrany na treci termin.
«Časam vy čujecie, jak lidary krain kažuć: ja — adziny, chto moža zabiaśpiečyć adzinstva nacyi. Kali heta praŭda, tady padobny lidar u realnaści paprostu nie spraviŭsia z zadačaj budaŭnictva nacyi», — dadaŭ Abama.
Pavodle jaho słoŭ, demakratyja — heta bolš, čym prosta pravodzić vybary. «Kali žurnalistaŭ kidajuć za kraty za vykanańnie svaich prafiesijnych abaviazkaŭ, a aktyvistam pahražajuć u ramkach baraćby z hramadzianskaj supolnaściu, vy možacie nazyvać heta demakratyjaj, ale heta nie demakratyja», — skazaŭ Abama.
Akramia taho, prezident ZŠA pažartavaŭ z nahody svaich ułasnych šancaŭ pieraabracca na treci termin (taki varyjant zabaraniaje amierykanskaja kanstytucyja).
«Naohuł, ja dumaju, što ja davoli dobry prezident. I kali ja vyłučusia na vybarach, ja mahu vyjhrać. Ale ja nie mahu vyłučycca!» — skazaŭ jon.
Kamientary