Jak ukrainski prahramist kiruje haspadarkaj u vioscy praź internet FOTA
Kaža, heta jak hulać u Warcraft.
IT-śpiecyjalist z Kijeva (Ukraina), viadomy tolki pad niknejmam «2234424», užo dva hady raspaviadaje na forumie stroimdom.com.ua pra toje, jak praź internet i videakamiery kiruje haspadarkaj u 200 kiłamietrach ad domu. Jaho historyju pieradaje ain.ua.
Mužčyna pracuje na troch pracach pa 14-16 hadzin na dzień. Na zaharadnuju haspadarku času nie staje, a siamju karmić śviežymi naturalnymi praduktami chočacca. Dapamahli IP-kamiery i najomnyja rabočyja.
U 2011 hodzie IT-šnik pryhladzieŭ učastak u 200 km ad Kijeva, što kaštavaŭ jamu kala 10 tysiač dalaraŭ. Ale jon nie mieŭ času navat źjeździć i pahladzieć na jaho pierad pakupkaj — adasłaŭ kurjera z fotazdymačom. Jamu spadabalisia dom i ŭčastak, a taksama najaŭnaść lesu niepadaloku. Praz try miesiacy arendy ŭčastak byŭ vykupleny.
Abkładzieny cehłaj draŭlany dom staić u vioscy z 3500-4000 žycharoŭ, maje ahulnuju płošču 50 m², žyłuju — 27 m². Na ŭčastak praviedzienaja elektryčnaść, ale aciapleńnie na drovach i hazie, vada z kałodzieža, a prybiralnia na dvare.
Pieršaje leta jon pravioŭ u novym domie razam z žonkaj, ale praca jamu heta «nie daravała» — uzimku pryjšłosia «łatać biudžet». Ale spraŭ na ŭčastku było bahata. Pryjšłosia naniać miascovych žycharoŭ, kab dahladać za aharodam i žyviołami, a taksama rabić ramont u domie.
Spačatku jon abstalavaŭ učastak dźviuma IP-kamierami ŭ haścioŭni i vannym pakoi (kab najomnyja rabočyja nie mieli biaspłatnaj łazieńki dla ŭsioj siamji), videarehistrataram, roŭtaram i mademam sa źniešniaj antenaj na dachu. Stabilnaj karcinki nie atrymlivałasia, dachodzili tolki karcinki ŭ vypadkach, kali ŭ kadry naziraŭsia ruch. Ale ŭžo heta dazvalała kantralavać vykanańnie zadač najomnymi rabočymi.
Ź ciaham času ramont prasoŭvaŭsia, kamier dadavałasia bolš, sihnał stanaviŭsia lepšym, a zadačy — cikaviejšymi. Siońnia kamiery (u tym liku načnyja) dazvalajuć kiravać haspadarkaj, mieć aharod, śvińniaŭ i kurej. Uradžaj haspadaru pieradajuć praz kiroŭcaŭ mižharodnich maršrutak. A za rabočymi jon moža jak sačyć u realnym časie, tak i prahladać archiŭ kadraŭ za dzień. Zadačy im staviacca pa elektronnaj pošcie.
Užo čatyry hady IT-šnik paśpiachova viadzie haspadarku praź internet. Apošni raz u vioscy jon fizična byŭ dva hady tamu, a ŭ adpačynak apošni raz sychodziŭ 10 hod tamu.
Pradavać kvateru ŭ Kijevie i pierajazdžać u viosku jon nie płanuje. Kaža, hałoŭnaje dla jaho — karmić siamju praduktami vysokaj jakaści, bo na rynku, na jaho dumku, niama ekałahična čystaj ježy.
«Mnie heta nahadvaje hulniu ŭ Warcraft — zdabyvaješ zołata (pracuješ u Kijevie) i vydatkoŭvaješ jaho. A rabočyja budujuć pabudovy», — piša jon.
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary