Polskaja siabroŭka žury Premii Hiedrojcia zapatrabavała źniać z sajta premii recenziju Maryi Martysievič na Viktara Kaźko
«Prašu źniać z aficyjnaha sajta Premii Hiedrojcia recenziju Maryi Martysievič na knihu Viktara Kaźko «Čas źbirać kości», — havorycca ŭ adkrytym liście Małhažaty Buchalik, adpraŭlenym na adras PEN-Centra i ŭ ŚMI.
— Kniha była abranaja žury premii adnoj z najlepšych knih hoda, a heta aznačaje, što acenki siabroŭ žury całkam razychodziacca z acenkami spadaryni Martysievič. Admoŭnaja recenzija, źmieščanaja na aficyjnym sajcie premii, supiarečyć asnoŭnaj mecie premii — pramocyi mienavita najlepšych knih. Ja liču, što aficyjny sajt premii pavinien nabližać ich da čytača, a nie stanavicca polem zmahańnia i rastłumačvańnia siabram žury ichnich abaviazkaŭ».
Małhažata Buchalik — polskaja pierakładčyca biełaruskaj litaratury. Jana taksama pierakładaje z rasiejskaj movy i piša recenzii dla vydaviectvaŭ.
Recenzii na knihi z šort-lista i łonh-lista na sajcie premii traplali pad ahoń krytyki i raniej. Na dumku krytykaŭ, častka recenzientaŭ, zamiest taho, kab tłumačyć knihu, adkryvać sens i adšukvać važnyja baki, samavyražajecca i, bolš za toje, naŭmysna «topić» mocnyja tvory z-pa-za staličnaj tusoŭki peŭnaha pakaleńnia. Adnak raniej takija hałasy hučali na forumach, upieršyniu zajavu zrabiła siabroŭka žury.
Raniej spn.Buchalik vystupała z krytykaj pryncypu padboru žury i nieprazrystaści jaho dziejnaści. Paśla hetaha ŭ pracedurach prysudžeńnia premii adbylisia pieramieny.
Siarod pretendentaŭ na Premiju Hiedrojca hetaha hoda nazyvajuć akurat knihu žyvoha kłasika biełaruskaj litaratury Viktara Kaźko. Ź im supierničajuć «Dzieci Alindarki» Alhierda Bachareviča, fantasmahoryja Siarhieja Dubaŭca i pieršaja kniha Taćciany Barysik z Mahilova. Ani žančyny, ani litaratary najstarejšaha pakaleńnia jašče ni razu nie zdabyvali pačesnaj premii.
Kamientary