Zapraŭki «Biełarusnafty» pieraŭtvorać u infarmacyjna-turystyčnyja centry

U pierśpiektyvie AZS kampanii «Biełarusnafta» płanujecca pieraŭtvaryć u infarmacyjnyja, resursnyja i ekipirovačnyja centry dla arhanizacyi vandravańniaŭ, paviedamiŭ namieśnik hienieralnaha dyrektara VA «Biełarusnafta» Siarhiej Kamornikaŭ 28 maja ŭ Minsku na prezientacyi prajekta Belarus N pa sadziejničańni raźvićciu turyzmu. 

Pavodle jaho słoŭ, siońnia ŭ sietku «Biełarusnafty» ŭvachodziać 546 AZS, što składaje 70% ad usich stancyj u Biełarusi. Štodnia na ich zapraŭlajecca pryblizna 300 tys. aŭtamabilaŭ. «My chočam raźvivać unutrany i ŭjazny turyzm, chočam padtrymlivać mały i siaredni biźnies», — adznačyŭ Kamornikaŭ. Sutnaść prajekta zaklučajecca ŭ tym, što vandroŭcy, jakija zajazdžajuć na AZS, zmahli atrymać usiu infarmacyju pra tematyčnyja maršruty ŭ najbližejšym rehijonie — pra słavutyja miaściny, muziei, ahrasiadziby, kupić katałoh pa maršrutach, turystyčnuju ekipiroŭku. Siarod tematyčnych maršrutaŭ praduhledžvajucca «syrnyja», «jahadnyja», «rycarskija», «vodnyja», «łaźnievyja» i inšyja. 

U miežach prahramy płanujecca stvareńnie śpiecyjalnaha partała, na jakim buduć raźmieščany katałohi, prezientavany maršruty, źjavicca mahčymaść anłajn-braniravańnia. Taksama miarkujecca stvaryć mabilnyja dadatki. «Hety partał stanie svojeasablivym turystyčnym navihataram pa Biełarusi», — adznačyŭ Kamornikaŭ. Pavodle jaho słoŭ, u pierśpiektyvie sajt i katałohi buduć na anhlijskaj movie. 

Prahramu płanujecca zapuścić u červieni-lipieni hetaha hoda na 50 AZS, paśla čaho, pavodle jaho słoŭ, prykładna praz hod budzie praviedzieny konkurs sa składańniem rejtynhu tych ci inšych maršrutaŭ. 

Dyrektar kamunikacyjnaha ahienctva «Hrupa NEF», jakaja raspracavała i płanuje prasoŭvać hety prajekt, Aleh Ramanaŭ zaklikaŭ mały, siaredni i bujny biźnies, biełaruskija pradpryjemstvy, haspadaroŭ ahrasiadzibaŭ, žurnalistaŭ, pradstaŭnikoŭ dziaržorhanaŭ uziać udzieł u prajekcie, u pryvatnaści ŭ raspracoŭcy maršrutaŭ. Pry hetym jon adznačyŭ, što infarmavańnie pra maršruty na partale budzie biazvypłatnym. «Adzinaje, što vy možacie zrabić, heta davać skidki turystam, jakija padarožničajuć pry dapamozie našaha prajekta», — skazaŭ jon. 

«Heta novaja chvala, pra jakuju my maryli z samoha pačatku. Mienavita partniorstva z bujnym biźniesam viadzie da pośpiechu ahraturyzmu i hramadskich arhanizacyj. Heta niezvyčajna cikavy inavacyjny prajekt. Takoha pakul niama ni ŭ adnoj krainie śvietu. Sens u tym, što zapraŭki buduć pieraŭtvoranyja ŭ infarmacyjna-turystyčnyja centry. Ludzi zmohuć tam vypić kavu, paznajomicca z turystyčnymi maršrutami, adpravicca ŭ vandravańnie. Heta novy sposab prasoŭvańnia ahraturyzmu. Kali ŭ ciabie jość turyst, to ŭ ciabie jość biźnies. Ja liču ahraturyzm adnym z samych paśpiachovych u našaj krainie, tamu što jon zasnavany na ludziach, na tradycyjach, historyi, i ja vielmi vieru ŭ jaho pośpiech», — skazała staršynia praŭleńnia biełaruskaha hramadskaha abjadnańnia «Adpačynak u vioscy» Valeryja Klicunova.

• 0
• 0
• 0
• 0
• 0
• 0
• 0
• 0