U Kazachstanie za niekalki dzion zahadkava zahinuła pad 100 tysiač sajhakaŭ
Za chvilu stračanaja amal tracina papulacyi. Takoha nie byvała ni ź jakim vidam.
Kala 100 tysiač antyłop-sajhaŭ, albo sajhakaŭ, zahinuła z zahadkavych pryčyn u Kazachstanie. Kali situacyja nie vypravicca, redki vid žyvioł moža źniknuć u bližejšyja tydni, piša IFLScience.
Padziož raptoŭna pačaŭsia ŭ siaredzinie maja i pakul nie spyniŭsia. Vid, što i tak znachodziŭsia ŭ krytyčnym stanie (katehoryja CR pavodle Mižnarodnaha sajuzu achovy pryrody), pad pahrozaj vymirańnia. Čamu — zahadka.
80-85 tysiač pamierłych sajhakaŭ — prybliznaja ličba na piatnicu, 22 maja, pa Kastanajskaj vobłaści Kazachstana. Viadoma, što na toj dzień bolš za 7 tysiač sajhakaŭ zahinuła ŭ Akmalinskaj Akciubinskaj abłaściach.
Ahułam kazachskaja papulacyja naličvała na 2014 hod 256 tysiač. Značna mienšaja papulacyja sajhakaŭ jość u Rasii i Manholii, adtul źviestak pra padziož nie pastupała.
Mahčymaj pryčynaj padziažu nazyvajecca epidemija pasterelozu, infiekcyjnaj chvaroby, što ŭźnikaje praź źnižeńnie naturalnaj supraciŭlalnaści arhanizmu da ŭzbudžalnikaŭ infiekcyj. Ale niezrazumieła, čamu chvaroba, i tak raspaŭsiudžanaja siarod sajhakaŭ, mahła b pryvieści da masavaj — i raptoŭnaj — hibieli.
Jak śćviardžajuć u ministerstvie sielskaj haspadarki Kazachstana, vymirańni sajhakaŭ zdaralisia i raniej, ale nijak nie ŭ takich maštabach. Raptoŭnaje vymirańnie traciny papulacyi za niekalki dzion — biesprecedentnaje zdareńnie nie tolki dla sajhakaŭ, ale i dla lubych žyvych istot.
Niekali sajhaki žyli na ahromnistaj terytoryi ad Karpataŭ da Manholii i Kitaja. Sučasnyja areały dvuch padvidaŭ u paraŭnańni z raniejšymi — ledź zaŭvažnyja kropki. Ale ź siaredziny XIX stahodździa da 1920-ch čałaviek praktyčna źniščyŭ sajhakaŭ. U 1950-ch papulacyju atrymałasia častkova ŭznavić i davieści da 2 młn, ale da 2010 hoda praz brakańjeraŭ (ceniacca miasa i rohi) jana źmienšyłasia da 12 tysiač.
Heta nie adzinaje anamalnaje źniknieńnie žyvych istot, jakomu čałaviectva nie moža znajści tłumačeńnia. Niešta ciaham niekalkich hod źniščaje pad pałovu pčalinych vulejaŭ u ZŠA.
Kamientary