Partyja pracoŭnych padtrymała vyłučeńnie Kalakina kandydatam u prezidenty
Arhkamitet pa stvareńni Biełaruskaj partyi pracoŭnych padtrymaŭ vyłučeńnie lidara Biełaruskaj partyi levych «Spraviadlivy śviet» Siarhieja Kalakina kandydatam u prezidenty na vybarach 2015 hoda.
Pra heta paviedamiŭ staršynia arhkamiteta Alaksandr Buchvostaŭ.
Pavodle jaho słoŭ, u levych siłach apošnim časam «adbyłasia peŭnaja intehracyja». «Tamu paśla rašeńnia źjezda partyi «Spraviadlivy śviet» ab vyłučeńni Kalakina kandydatam u prezidenty my sabrali arhkamitet partyi, praviali pajmiennaje hałasavańnie i bolšaściu padtrymali jaho ŭdzieł u vybarach», — skazaŭ Buchvostaŭ.
«Kalakin — čałaviek, jaki maje palityčny, kiraŭničy vopyt, rozum, jon umieje analizavać. U jaho jość danyja, kab zajmać pasadu prezidenta», — padkreśliŭ jon.
Buchvostaŭ razumieje, što ŭ situacyi, kali sumlennych vybaraŭ niama, možna čakać falsifikacyj, vykarystańnie administracyjnaha resursu. «Heta vyklikaje sumnieńni ŭ nieabchodnaści ŭdziełu ŭ vybarach. Ale heta palityčnaja baraćba. Da taho ž pravieści efiektyŭny bajkot vybaraŭ asobna ŭziataj partyjaj ci kaalicyjaj nielha», — skazaŭ jon.
Buchvostaŭ taksama ličyć, što sabrać 100 tysiač podpisaŭ apazicyjnamu kandydatu na vybarach hetaha hoda budzie vielmi ciažka. «Ciapier u apazicyi naŭrad ci znojducca siły, jakija zmohuć ich sabrać. Ale jość nadzieja: u Kalakina dziejučaja partyja, u jaje jość dastatkovaja kolkaść ludziej u rehijonach», — adznačyŭ jon.
Rašeńnie pra vyłučeńnie Siarhieja Kalakina kandydatam u prezidenty było pryniata 24 maja na XVIII spravazdačna-vybarnym źjeździe Biełaruskaj partyi levych «Spraviadlivy śviet».
Alaksandr Buchvostaŭ u 1993—2004 hadach uznačalvaŭ Biełaruskuju partyju pracy. U žniŭni 2004 hoda jana była likvidavanaja Viarchoŭnym sudom na padstavie pretenzij Miniusta da jurydyčnaha adrasa i kolkaści arhanizacyjnych struktur. Ciapier arhanizacyja dziejničaje ŭ statusie arhkamiteta Biełaruskaj partyi pracoŭnych.
Čarhovyja prezidenckija vybary pavinny prajści ŭ Biełarusi nie paźniej za 20 listapada. Najbolej vierahodnaj dataj ich praviadzieńnia ŭ CVK nazvali 15 listapada.
Pra namier vyłučacca kandydatami ŭ prezidenty ŭžo zajavili staršyni Libieralna-demakratyčnaj partyi Siarhiej Hajdukievič i Abjadnanaj hramadzianskaj partyi Anatol Labiedźka, pieršy namieśnik staršyni hramadskaha abjadnańnia «Tavarystva biełaruskaj movy imia Franciška Skaryny» (TBM) Alena Anisim, a taksama aktyvistka kampanii «Havary praŭdu», člen Biełaruskaj sacyjał-demakratyčnaj partyi (Hramada) Taćciana Karatkievič.
Kamientary