Jak maskvič Daŭšan supracoŭničaŭ ź biełaruskim KDB — repartaž z zały suda

Sudziać byłych kiraŭnika Biełkaapsajuza Siarhieja Sidźko, načalnika ŭpraŭleńnia kapitalnaha budaŭnictva Biełkaapsajuza Dźmitryja Kałodzieznaha i jaho namieśnicu Eleanoru Sizuk, namieśnika dyrektara firmy «Adonisbudservis» Uładzimira Lenskaha, dyrektara firmy «Sanata-Bud» Alaksandra Drańkova, hramadzianina Ukrainy Andreja Turčanku, supracoŭnicu ahienctva pa nieruchomaści Łarysu Braździeckuju. Adny, zhodna z abvinavačańniem, vymahali chabar, druhija — davali, trecija — brali.

Pra pačatak pracesu «Naša Niva» raskazvała raniej.

Ciapier dapytali Braździeckuju, jakaja prachodzić pa epizodzie z vymahańniem 500 tysiač dalaraŭ dla kiraŭnictva Biełkaapsajuza. Žančyna, darečy, kala dvuch hadoŭ była ŭ vyšuku, pakul viałosia rasśledavańnie.

Armija z pasrednikaŭ

Łarysa Braździeckaja naradziłasia ŭ 1963 u Novačarkasku. U Biełaruś pryjechała pa raźmierkavańni paśla hieołaharaźviedvalnaha technikuma. Raźviedzienaja. Ad 1999-ha pačała pracavać u ryełtarskich ahienctvach.

«Ja kantaktavała sa mnohimi ahientami: u nas pryniata abmieńvacca infarmacyjaj. A ŭ toj čas [pačatak 2013] stała nieruchomaść — nie było prodažaŭ. I mnie patelefanavała Volha Vareńnikava: skazała pra budynak na vulicy Tatarskaj, 1200 kvadratnych mietraŭ, jaki pradaje jaje znajomy. Ja pačała ŭsim raskazvać pra hety abjekt. Im zacikaviŭsia ahient Siarhiej Cierykaŭ», — raskazała žančyna.

Joj paabiacali kamisijnyja ($10,000), kali znojdzie klijenta. Budynak pradavali za 1,5 miljona dalaraŭ. Ale z umovaj, što tracinu treba pieradać u vyhladzie zadatku, astatniaje ž pieraličyć na rachunak Biełkaapsajuza paśla padpisańnia damovy.

Pavialičyć

U Cierykava akurat źjaviŭsia patencyjny klijent. Cierykaŭ prapanavaŭ vystavić canu $1,68 miljona: maŭlaŭ, buduć tarhavacca, kab było z čaho skinuć, a što zastaniecca zvyš — pojdzie na kamisijnyja.

Takaja voś ryełtarskaja schiema: Vareńnikava — Braździeckaja — Cierykaŭ. I kožny pasiarednik raźličvaŭ atrymać kuš. Ale heta nie ŭsio. Braździeckaja atrymlivała źviestki pra budynak ad Vareńnikavaj, taja — ad Arsiena Parchimoviča (vyhladaje, što heta taksama pasiarednik), Parchimovič — ad Andreja Turčanki (nazyvaŭsia rabotnikam Biełkaapsajuza, ale nie byŭ im), apošni źviazvaŭsia ŭžo ź Dźmitryjem Kałodzieznym.

I ŭ hetaj schiemie kožny taksama raźličvaŭ na hrošy. Braździeckaja paśla pačała kantaktavać z Parchimovičam i Turčankam naŭprost.

Pieršym patencyjnym pakupnikom u lutym 2013 staŭ Illa z Maskvy. Praŭda, jon nie moh zrazumieć, jak pieravieści 500 tysiač zadatku. Tady ŭźnikła schiema z bankam u Ryzie: hrošy kładuć na rachunak, ź jakoha pradaviec zmoža ich źniać tolki paśla zaklučeńnia damovy ab prodažy. Ale biznesoviec chacieŭ ubačyć aryhinały dakumientaŭ na budynak pierad pieravodam hrošaj. A ich tak i nie pakazali. U vyniku ŭhoda nie adbyłasia.

Padsadny maskvič

Ale ŭžo ŭ sakaviku 2013 Braździeckaj patelefanavaŭ Valeryj Žaŭniaroŭski — šukaŭ pamiaškańnie pad ofis dla svajho rasijskaha kampańjona. Z prapanavanych spyniŭsia akurat na budynku pa Tatarskaj.

Tut i akazałasia, što Braździeckaja ŭžo była pad nahladam śpiecsłužbaŭ. Andrej Turčanka na sudzie zajaviŭ, što paśla znajomstva z materyjałami spravy ŭbačyŭ cikavuju detal: u sakaviku 2013 razmovy Braździeckaj prasłuchoŭvalisia. «Tam havorycca Žaŭniaroŭskamu i Daŭšanu kankretna: treba davać chabar kiraŭnictvu Biełkaapsajuza», — heta da pytańnia pra toje, ci viedała žančyna pra chabar. Bo sama jana ciapier admaŭlaje: maŭlaŭ, 500 tysiač dalaraŭ usprymała zvyčajnym, choć i vialikim, zadatkam.

Pavialičyć

«Jany [Žaŭniaroŭski i Daŭšan] viedali [pra chabar], inačaj hetych ludziej prosta nie ŭźnikła b», — ličyć Turčanka.

Vychodzić, telefon maskviča Illi mahli prasłuchoŭvać. I pačuli tam pra vializny chabar, jaki jamu prapanoŭvali dać u vyhladzie zadatku, zacikavilisia. Mahčyma, jamu prapanavali supracoŭničać. A kali jon admoviŭsia, uviali novych pakupnikoŭ. Sama Braździeckaja kaža, što Žaŭniaroŭski — sapraŭdny biznesoviec, Piotr Daŭšan — «supracoŭnik KDB».

Daŭšan admoviŭsia ad schiemy z ryžskim bankam: prapanoŭvaŭ biełaruski, ale jaho zabrakavali ŭžo pradaŭcy. «Choča — možam u čamadančyku ad noŭtbuka prynieści hrošy. Ale kab była sumlennaja i zakonnaja ŭhoda», — uzhadvaje słovy maskviča Braździeckaja. Prapanoŭvaŭ navat pajechać u Rasiju, kab «adličyć hrošy».

A paśla prasiŭ u jakaści harantyi sustreču sa słužbovaj asobaj. Jana prajšła ŭ Biełkaapsajuzie 4 krasavika 2013. Tolki biznesoŭcaŭ papiaredzili, kab nijakich razmoŭ pra hrošy nie było. Prymaŭ ich Kałodziezny. Ale kantrakt usio zaciahvaŭsia i ryełtarka pačała adychodzić ad raboty. Jana ŭžo nie spadziavałasia atrymać svaje premijalnyja za budynak. «Letam, nie pomniu daty, patelefanavaŭ mužčyna, nazvaŭsia z KDB. Ale dzie ja, a dzie KDB. Jon skazaŭ, što zaraz padjeduć pahavaryć. Ja paprasiła vysłać pozvu».

Mabilnik tady adklučyła, a zatym i zhubiła, kaža. Svaju kvateru vyrašyła zdavać, a dla siabie ŭ znajomaj źniała pakoj. Tam jaje i zatrymali ŭ studzieni 2015.

Aryšty ž pa spravie Biełkaapsajuza adbylisia jašče ŭ lipieni 2013. U pracesie abvieščany pierapynak na niavyznačany termin: Kałodziezny loh u balnicu. Miž inšym, ni jon, ni Siarhiej Sidźko jašče nie davali pakazańniaŭ na sudzie.

Hladzicie taksama: U Minsku «čornyja łabisty» brali adkat u pamiery 10% ad padradu za pieramohu ŭ dziaržaŭnych tendarach

• 0
• 0
• 0
• 0
• 0
• 0
• 0
• 0