«Naša niva» stała «niemetazhodnaj» za toje, što jaje redaktar namiervaŭsia nakarmić mitynhoŭcaŭ
Minharvykankam paličyŭ raźmiaščeńnie haziety «Naša Niva» ŭ Minsku «niemetazhodnym». Mienavita takaja farmuloŭka paznačana ŭ liście, jaki atrymała siońnia redakcyja haziety. List padpisany načalnikam ideałahičnaha adździeła Minharvykankama Hienadziem Kurbiekam.
– Vidać, ułady prydumali niejkuju novuju praceduru źniščeńnia niezaležnych vydańniaŭ, – havoryć hałoŭny redaktar «Našaj nivy» Andrej Dyńko. – Pavodle ŭkaza kiraŭnika dziaržavy my pavinny byli da 1 lutaha ŭnieści źmieny ŭ naš statut. Što my i zrabili. Statut byŭ adpraŭleny na ŭzhadnieńnie ŭ jurydyčny adździeł Minharvykankama, ale na praciahu niekalkich miesiacaŭ nijakaj reakcyi adtul nie było. I voś zaraz my raptam atrymlivajem ź Minharvykankama list, dzie havorycca, što «raźmiaščeńnie «Našaj Nivy» ŭ Minsku» źjaŭlajecca niemetazhodnym». Što heta aznačaje, patłumačyć ciažka. Ale ŭ vyniku hetaha rašeńnia my akazvajemsia bieź jurydyčnaha adrasu, što daje padstavy adpaviednym orhanam padać pazoŭ na likvidacyju našaj haziety.
Kamientavać svajo rašeńnie adnosna «Našaj Nivy» ŭ ideałahičnym adździele Minharvykankama admovilisia:
– Zvonitie v riedakciju haziety «Naša Niva»– u nich jesť oficialnoje piśmo, pusť oni vam i pojaśniajut, – paraiła karespandentu «Salidarnaści» namieśnik načalnika ideałahičnaha adździeła Ullana Stesina.
– U jurydyčnym sensie takaja farmuloŭka prosta nonsiens, – adznačaje Andrej Dyńko. – U liście Minharvykankama adzinaj arhumientacyjaj dadzienaha rašeńnia staŭ toj fakt, što 22 sakavika hałoŭny redaktar byŭ pakarany na 10 sutak aryštu. Heta prykładna toje ž samaje, što začynić uvieś marharynavy zavod za toje, što jaho dyrektar byŭ aštrafavany za prajezd na čyrvonaje śviatło.
Andrej Dyńko byŭ aryštavany za toje, što nios pradukty ŭ namiotavaje miastečka na Kastryčnickaj płoščy.
Zaraz «Naša Niva» źbirajecca abskardžvać rašeńnie Minharvykankama ŭ sudzie. Akramia taho, redakcyja haziety maje namier źviarnucca da ŭrada Litvy i inšych dziaržaŭ z prośbaj chadajničać pierad JUNIESKA ab ŭniasieńni «Našaj Nivy», jakoj sioleta spaŭniajecca 100 hadoŭ, u śpis niemateryjalnaj spadčyny.
– Tolki heta moža dać niejkuju bazu dla našaha dalejšaha isnavańnia, – kaža Andrej Dyńko. – Pakul ža budziem pracavać, jak i pracavali – vydavać hazietu i vychodzić u Internecie.
Anastasija Zielankova
Kamientary