Hałoŭny IT-forum Biełarusi staŭ faktyčna «teatram dvuch akcioraŭ».
Na ŭračystym adkryćci TIBO-2015 premjer-ministr Biełarusi Andrej Kabiakoŭ začytaŭ tradycyjnaje pasłańnie Łukašenki ŭdzielnikam forumu, a ministr suviazi Siarhiej Papkoŭ raspavioŭ ab źmienie pryjarytetaŭ TIBO: ciapier u centry ŭvahi forumu elektronny ŭrad i ličbavaja ekanomika.
Imavierna, naviednikam forumu, źviazanym z hetaj tematykaj, było čym zaniacca — na TIBO było napraŭdu mnostva zamiežnych haściej i vieličezny stend karejcaŭ. Śpiecyjalistaŭ u halinie telekamunikacyj vabili stendy Huawei, Nokia i Cisco (apošni — u hruzaviku).
Ale šerahovym «hikam» na TIBO najbolš uvahi nadali tolki dźvie kampanii: Huawei i MTS.
Apieratar MTS pradstaviŭ testavuju placoŭku 4G. Luby achvočy moh pasprabavać chutkasny mabilny internet nastupnaha pakaleńnia praz LTE-sietku. Na stendzie praz mabilny telefon možna było dasiahnuć chutkaści 140 Mbit/s.
Praŭda, za miežy TIBO 4G usio jašče nie vychodzić: mabilnyja apieratary zajaŭlajuć pra hatoŭnaść, ale bolš siońnia zaležyć ad kampanii beCloud, što maje adzinuju ŭ krainie licenziju na LTE-častoty i vystupić infrastrukturnym apierataram (to značyć, budzie kantralavać budaŭnictva sietki).
Akramia taho, MTS pradstaviŭ mabilnuju prahramu «Moj MTS» dla Android i iOS, što dazvolić kantralavać taryf i dadatkovyja pasłuhi. Na stendzie možna było aznajomicca z prajektami elektronna-ličbavaha podpisu pa sim-karcie (zakanadaŭstva pakul nie dazvalaje šyroka vykarystoŭvać elektronny podpis zamiest pašpartu ŭ realnym žyćci), elektronnaha dziońnika dla školnikaŭ (supolna sa Schools.by), elektronnaj biblijateki ź vializnym naboram knih (za 1200 rubloŭ za dzień dostupu) dy šlemam virtualnaj realnaści Oculus Rift (prosta dla zabavy).
Ale najbolšaja ŭvaha na stendzie MTS dastałasia elektramabilu Tesla S — takich u Biełarusi tolki paru štuk. Pradavać ich MTS nie źbirajecca — na prykładzie «Tesły» demanstravałasia budučynia «internet-rečaŭ», dzie praktyčna całkam (za vyklučeńniem ułasna jazdy) kantralavać aŭtamabil možna choć z telefona.
Šmat uvahi na siabie źviartaŭ i Huawei. Centralnaje miesca na ich stendzie zajmaŭ novy fłahmanski smartfon Huawei P8, naščadak raspaŭsiudžanych u Biełarusi Ascend P6 i P7.
Novy smartfon kitajcaŭ maje paznavalny dyzajn, prasunutuju kamieru (lepšyja fota pry słabym aśviatleńni, mocnaja aptyčnaja stabilizacyja, funkcyja malavańnia śviatłom, «režym režysiora» z adnačasovaj zdymkaj z čatyroch aparataŭ i h.d.), dapracavanuju dvajnuju antenu (sihnał nie zabłakavać rukoj, jak telefon nie ŭchapi, sihnał nie zhubić navat na chutkaści 300 km/h). Zabaŭnaja asablivaść smartfona — dva słoty dla sim-kartak, adzin ź jakich moža pieratvarycca ŭ słot dla kartak pamiaci (druhuju simku pry hetym nie ŭstavić). Pieršy čas (aryjentyrovačna — z červienia) smartfon budzie pradavacca ekskluziŭna ŭ MTS pa canie, blizkaj da suśvietnaj (kala 500 jeŭra).
Akramia taho, Huawei vabiŭ paŭmietrovym robatam, jaki achvotna razmaŭlaŭ z naviednikami, razumnym hadzińnikam z kruhłym dyspłejem dy telekamunikacyjnym abstalavańniem.
Druhi mabilny apieratar, velcom, pradstaviŭ chiba anałah internet-TV ZALA pad nazvaj voka — u astatnim žoŭta-bieły stend demanstravaŭ užo znajomyja technałohii i taryfy dy słužyŭ kaviarniaj.
Hałoŭny kankurent Huawei, kitajskaja ža ZTE, hučnymi prezientacyjami nie paciešyŭ. Ich susiedzi MTIS ź cikavaha šerahovamu naviedniku pakazali chiba pryhožych dziaŭčyn-pramoŭtaraŭ.
«Biełtelekam» u svaju čarhu pakazaŭ chatni internet z chutkaściu 1 Hbit/s. Možna było by skazać, što biełarusaŭ takoj prapanovaj nie ździvić — šerah apierataraŭ užo prapanujuć hihabitnyja chutkaści. Dy naviedniki ździŭlalisia — vidać, prapanovy pakul nadta łakalnyja i darahija.
Ahromistym stendam adznačyłasia «Biełpošta». Dy z navinak na im tolki terminał samaabsłuhoŭvańnia, što dazvolić adasłać zakazny list ci banderol. Pryłada vyhladaje jak elektronnyja šali, spałučanyja sa zvyčajnym płaciožnym terminałam «Biełpošty». U chutkim časie taki źjavicca ŭ minskim paštamcie i, jak abiacajuć, paźniej raspaŭsiudzicca paŭsiul, dzie pošta maje płaciožnyja terminały.
«Haryzont» prademanstravaŭ nažyvuju «miehapłanšet» — ahromnisty vuličny ekran ź infarmacyjaj dla turystaŭ. Takija majuć źjavicca ŭ centry Minska ŭ chutkim časie. Što cikava, usio, aproč ekrana i centralnaha pracesara vyrablaje «Haryzont», zborka taksama pravodzicca na pradpryjemstvie. Razam z «miehapłanšetam» byŭ prademanstravany i jaho małodšy brat, «infarmacyjny kub», jakim, u pryvatnaści, cikaviłasia biełaruskaja čyhunka.
Biełaruskija instytuty i Akademija navuk vystaŭlali ŭžo zvykłych robataŭ ułasnaj raspracoŭki, a NDI EVM pachvaliłasia abaronienymi noŭtbukami i płanšetami, što vykarystoŭvajucca ŭ tym liku na rasijskich padłodkach i mašynach palicyi.
Najbujniejšy pryvatny pravajdar «Atłant-Telekam» i mabilny apieratar life:) praihnaravali TIBO. Nie było i tradycyjna šumnaha stenda Wargaming, a razam ź im i natoŭpu junych i nie vielmi «tankistaŭ». TIBO vydaŭsia nadziva cichim forumam.
***
Vystava prachodzić z 22 pa 25 krasavika ŭ Futbolnym maniežy. Kvitki pradajucca na ŭvachodzie za niekalki dziasiatkaŭ tysiač (cana zaležyć ad dnia).
Ciapier čytajuć
Biełaruskaja i rasijskaja armii na biełaruskaj terytoryi trenirujucca nanosić jadzierny ŭdar16
Kamientary