MUS: Zabarony na zdymku administracyjnych budynkaŭ niama, ale milicyja moža vami pacikavicca

Unutranaje ŭkazańnie Ministerstva ŭnutranych spraŭ Biełarusi nakont zdymki administracyjnych budynkaŭ nie praduhledžvaje zabarony takich dziejańniaŭ.

Pra heta zajaviŭ pres-sakratar MUS Kanstancin Šalkievič, kamientujučy niadaŭnija incydenty padčas zdymak žurnalistami takich abjektaŭ i zvarot u suviazi z hetym Biełaruskaj asacyjacyi žurnalistaŭ (BAŽ). 

Nahadajem, BAŽ paprasiła MUS pradastavić kopiju dakumienta ab zabaronie na fatahrafavańnie administracyjnych budynkaŭ paśla taho, jak supracoŭnika «KP v Biełarusi» zatrymali za fatahrafavańnie budynka Akademii navuk.

«Unutranaje ŭkazańnie nakiravana na pavyšeńnie pilnaści supracoŭnikaŭ orhanaŭ unutranych spraŭ u častcy praduchileńnia mahčymych pahroz roznaha charaktaru — ad pravakacyj da terarystyčnych aktaŭ, — skazaŭ pradstaŭnik MUS. — Pry hetym havorka nie idzie pra zabaronu videa- ci fotazdymki administracyjnych budynkaŭ. Jano rehuluje vyklučna dziejańni supracoŭnikaŭ orhanaŭ unutranych spraŭ». 

Razam z tym, padkreśliŭ Šalkievič, hramadzianie ci pradstaŭniki ŚMI pavinny viedać, što ŭ supracoŭnikaŭ milicyi, jakija niasuć słužbu pa achovie budynkaŭ, jość prava pacikavicca, u jakich metach pravodzicca zdymka. 

«Hetyja previentyŭnyja miery skiravany vyklučna na padtrymańnie biaśpieki ŭ krainie, — zapeŭniŭ jon. — U vypadku ŭźniknieńnia padazreńnia na dačynieńnie hramadzianina da pravakacyjnaj abo inšaj pahražalnaj hramadskaj biaśpiecy dziejnaści supracoŭniki orhanaŭ unutranych spraŭ majuć prava dziejničać u adpaviednaści z zakanadaŭstvam, až da dastaŭleńnia hramadzianina ŭ adździeł unutranych spraŭ i praviadzieńnia razboru». 

Šalkievič źviarnuŭ uvahu, što ŭ adpaviednaści z artykułam 25 zakona «Ab orhanach unutranych spraŭ Respubliki Biełaruś» ad 17 lipienia 2007 hoda supracoŭniki milicyi ŭ metach vykanańnia zadač u miežach svajoj kampietencyi majuć prava praviarać u hramadzian pry padazreńni va ŭčynieńni imi złačynstvaŭ, administracyjnych pravaparušeńniaŭ dakumienty, jakija śviedčać ich asobu, a taksama dakumienty, nieabchodnyja dla pravierki vykanańnia imi praviłaŭ, nahlad i kantrol za vykanańniem jakich uskładzieny na orhany ŭnutranych spraŭ. 

A ŭ adpaviednaści z punktam 5 pałažeńnia ab dakumientach, jakija śviedčać asobu, zaćvierdžanaha ŭkazam prezidenta № 294 ad 3 červienia 2008 hoda, uładalnik dakumienta, što śviedčyć asobu, abaviazany pradjaŭlać jaho pa patrabavańni słužbovych asob dziaržaŭnych orhanaŭ, upaŭnavažanych na takija dziejańni. 

«Nieabchodna adznačyć, što ŭ adpaviednaści z punktam 3 častki 2 artykuła 8.2 Pracesualna-vykanaŭčaha kodeksa ab administracyjnych pravaparušeńniach u metach ustanaŭleńnia asoby moža prymianiacca takaja miera, jak administracyjnaje zatrymańnie na termin da troch hadzin. Takim čynam, unutryviedamasnaje ŭkazańnie znachodzicca ŭ miežach pravavoha pola», — zajaviŭ pradstaŭnik MUS. 

Pry hetym, adkazvajučy na šmatlikija zapyty ab pradastaŭleńni roznym ŚMI aryhinała hetaha dakumienta, Šalkievič skazaŭ: «Pradastaŭleńnie srodkam masavaj infarmacyi ŭnutryviedamasnych dakumientaŭ, jakija vyznačajuć pracu supracoŭnikaŭ, abaviazkovym nie źjaŭlajecca». 

«Nieabchodnaść takoha ŭkazańnia vyklikana ŭ pieršuju čarhu tym, što apošnim časam mieli miesca fakty zdymki hramadzianami, u tym liku nie našaj krainy, administracyjnych budynkaŭ z metaj nastupnaj dyskredytacyi orhanaŭ dziaržaŭnaj ułady. U asobnych vypadkach zdymka supravadžała adkryta chulihanskija dziejańni», — zajaviŭ pradstaŭnik MUS.

• 0
• 0
• 0
• 0
• 0
• 0
• 0
• 0