Minułaja zima ŭ Biełarusi ŭvajšła ŭ dziasiatku samych ciopłych za čas nazirańnia
Siaredniaja tempieratura była na 3,6 hradusy vyšej za normu.
Z 1945 hoda, kali pačalisia rehularnyja nazirańni za tempieraturaj u Biełarusi, zima 2014-2015 hoda była šostaj pa ciepłyni.
Siaredniaja tempieratura za try miesiacy skłała –1,6°C, što na 3,9 hradusy vyšej za klimatyčnuju normu, raspaviała «Našaj Nivie» Alena Kamaroŭskaja, načalnik adździeła klimatu Hidramietcentra. Usie try miesiacy byli nadzvyčaj ciopłymi.
Samaja nizkaja tempieratura za zimu, –23,4°C, nazirałasia na stancyi Jeziaryšča (Viciebskaja vobłaść) 28 śniežnia. Samaja vysokaja, +11,5°C — u Hrodnie 19 śniežnia.
Ale za apošnija piać hod heta nie rekordna ciopłaja zima. U 2007-2008 hodzie zima była ciaplejšaja, u siaredniem tempieratura skłała tady –1°C.
Apadkaŭ vypała 106% normy, što narmalna. Pieršyja dva miesiacy zimy byli dastatkova vilhotnymi. Ale luty byŭ dastatkova suchi, apadkaŭ vypała tolki 56% normy, 19 mm apadkaŭ u siaredniem pa Biełarusi.
Tak sucha ŭ lutym byvaje raz na 12 hod.
Śniežnaje pokryva ŭstalavałasia jašče ŭ siaredzinie listapada, ale praź niaŭstojlivaje nadvorje jano tajała i znoŭ utvarałsia. Da kanca zimy jano ŭtrymlivałasia tolki na poŭnačy.
Jak raniej adznačała Alena Uładzimiraŭna, ciopłyja hody ŭpisvajucca ŭ ahulnuju tendencyju z 1989-ha. Tolki 1996 hod byŭ u Biełarusi krychu chaładniejšym za normu. Hetaja tendencyja ŭ svaju čarhu jość častkaj hłabalnaha paciapleńnia.
Pa prahnozach Hidramietcentru, u bližejšyja dni pa Biełarusi tempieratura budzie trymacca kala nula. U čaćvier u Minsku projdzie mokry śnieh, taksama vilhotnymi buduć vychodnyja.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć26
Kamientary