Śniežań byŭ ciaplejšy za normu na 1,5 hradusa, a studzień — na 5,6 hradusa
Pačatak viasny naŭrad ci budzie adroźnivacca ad kanca lutaha.
Hetaja zima była nadzvyčaj ciopłaj, raspaviała «Našaj Nivie» Alena Kamaroŭskaja, načalnik adździeła klimatu Hidramietcentra. Siaredniaja tempieratura ŭ śniežni 2014 hoda pa Biełarusi skłała -2,5°C, što vyšej za normu na 1,5 hradusa.
Značna adchiliŭsia ad normy studzień, na cełych 5,6 hradusa — siaredniaja tempieratura za miesiac skłała –1,1°C.
Tak ciopła ŭ studzieni byvaje prykładna raz na 15 hadoŭ.
Maksimalnaja tempieratura ŭ studzieni nazirałasia ŭ Breście 17 studzienia — +9°C. Hetki tempieraturny režym charakterny dla sakavika.
Vierahodna, i luty pieravysić normu — u pieršaj dekadzie siaredniaja tempieratura była na 4 hradusy vyšej za normu, druhaja dekada taksama była dastatkova ciopłaja. Poŭnaja infarmacyja pa lutym i ŭsioj zimie budzie viadomaja na nastupnym tydni. Takaja ciopłaja zima ŭpisvajecca ŭ ahulnuju tendencyju.
«Zaraz usie kažuć ab paciapleńni klimatu, my ab hetym kažam taksama.
U Biełarusi paciapleńnie, jak my ličym, pačałosia anamalna ciopłym 1989 hodam, jaki byŭ adnym z samych ciopłych, i praciahvajecca jano dahetul», — kaža Alena Uładzimiraŭna.
Adzinaje vyklučeńnie — 1996 hod, kali siaredniehadavaja tempieratura była krychu nižejšaj za normu.
Minuły, 2014 hod trapiŭ u piaciorku samych ciopłych. «Vierahodna, paciapleńnie budzie i dalej praciahvacca», — miarkuje jana.
Možna ličyć, što zima ŭ Biełarusi skončyłasia. Śniežnaje pokryva zastałosia zbolšaha tolki na poŭnač ad linii Minsk — Vilnia i na paŭnočnaj častcy Viciebščyny.
U bližejšyja dni pa źviestkach Hidramietcentra pa bolšaj častcy Biełarusi tempieratura nie budzie apuskacca nižej za nul udzień, unočy dasiahnie —2°C. Da kanca kalandarnaj zimy budzie pieravažna vobłačna, mahčymyja daždžy i mokry śnieh.
Na pačatku sakavika tempieratura taksama budzie trymacca kala nula, soniečna stanie praz tydzień.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie7
Kamientary