Pebble vypuścić razumny hadzińnik z kalarovaj elektronnaj papieraj
Za niekalki hadzin na novy hadzińnik Pebble Time było sabrana bolš za 3 młn dalaraŭ.
Kampanija Pebble pačała na Kickstarter zbor hrošaj na vypusk novaha pakaleńnia hadzińnikaŭ Pebble Time. Z patrebnych 500 tysiač dalaraŭ za niekalki hadzin sabrana kala 3,1 młn. Kampanija pa zbory srodkaŭ budzie doŭžycca jašče 31 dzień.
Hadzińniki na momant publikacyi zamovili bolš za 15 tysiač čałaviek.
Pieršy błok papiarednich zamoŭ za 159 dalaraŭ užo razyšoŭsia — na momant publikacyi hadzińniki možna zamović za 179 dalaraŭ.
Pebble Time — razumny hadzińnik z kalarovym E-ink («elektronnaja papiera») dyspłejem. Jak abiacajuć raspracoŭščyki, hadžet vytrymaje da 7 dzion biez padzaradki.
U novaha pakaleńnia hadzińnikaŭ budzie abnoŭleny interfiejs «Timeline» i mikrafon dla prymańnia hałasavych kamand. Akramia taho, novy Pebble Time vodaŭstojlivy. Hadžet sumiaščalny z prahramami, napisanymi dla papiarednich hadzińnikaŭ Peeble.
Hadzińnik budzie vypuščany ŭ troch kolerach: čornym, biełym i čyrvonym. Jon budzie sumiaščalny z iOS 8 i naviejšymi, Android 4.0 i naviejšymi.
***
Papiaredni hadzińnik Pebble sabraŭ na Kickstarter 10 młn dalaraŭ u siaredzinie 2012 hoda, u prodažy jon źjaviŭsia napačatku 2013 hoda. U 2014 hodzie była pradstaŭlenaja viersija hadzińnika ŭ stalnym korpusie Pebble Steel. Na kaniec 2014 hoda było pradadziena bolš za 1 młn hadzińnikaŭ.
Hadzińnik Pebble — druhi pa paśpiachovaści prajekt na Kickstarter. Bolš za jaho (13,28 młn) sabraŭ tolki pieranasny chaładzilnik Coolest Cooler. Da Pebble nabliziŭsia prajekt kartačnaj hulni Exploding Kittens, što sabraŭ 8,78 młn dalaraŭ.
Kamientary