Unikalnaja paštoŭka z vyjavaj Hłybokaha viarnułasia ŭ horad praz sto hadoŭ FOTA
Žychary Hłybokaha nabyli paštoŭku z vyjavaj svajho miastečka, vydadzienuju pierad I Suśvietnaj vajnoj, i źbirajucca padaravać jaje miascovamu muzieju.
Niezadoŭha da Pieršaj suśvietnaj vajny hłybocki handlar knihami Ł. Rom (darečy, u jahonaj kramie pradavalisia biełaruskija knihi i kalendary) vydaŭ sieryju kalarovych paštovak z vyjavami Hłybokaha. Kalarovaja fatahrafija tady była redkaściu – rabilisia čorna-biełyja zdymki, mastak ich razmaloŭvaŭ, i tolki potym paštoŭku drukavali.
Kalarovyja paštoŭki z vyjavami Bazarnaj płoščy i Dokšyckaj vulicy daŭno viadomyja hłybačanam, jany drukavalisia ŭ niekalkich krajaznaŭčych vydańniach. Paštoŭka z vyjavaj Bieraźvieckaha klaštara zachoŭvajecca ŭ historyka-krajaznaŭčym muziei ŭ Brasłavie.
U śniežni na aŭkcyjonie ay.by była vystaŭlenaja paštoŭka, jakuju nichto ŭ Hłybokim dasiul nie bačyŭ. Na joj bačnyja zabudova miastečka i kaścioł Śviatoj Trojcy, jakija adlustroŭvajucca ŭ spakojnaj pavierchni Kahalnaha voziera. Paštoŭka była adasłanaja z Hłybokaha ŭ Minsk 2 kastryčnika 1915 hoda — usiaho praź niekalki tydniaŭ paśla pieršaj – dvuchtydniovaj – akupacyi miastečka niamieckimi vojskami.
Pradaviec pastaviŭ startavy košt 85 dalaraŭ, ale paźniej źmienšyŭ da 50. Kali krajaznaŭcy daviedalisia pra isnavańnie paštoŭki, to vyrašyli sabrać hrošy i nabyć. Kaardynavaŭ zbor hrošaj i nabyvaŭ paštoŭku nastaŭnik i ekskursavod Juryj Kałbasič.
«Kali žychary Biełarusi vykupili Statut VKŁ za 45 000 dalaraŭ, to čamu žychary Hłybokaha nie mohuć vykupić paštoŭku za 85 dalaraŭ? U hłybačanaŭ chapiła patryjatyzmu, arhanizavanaści i achviarnaści dla takoj spravy», — kaža Juryj Kałbasič.
Na paštoŭku achviaravali kala piatnaccaci čałaviek – hramadskija aktyvisty, krajaznaŭcy, dy prostyja hłybačanie, jakija daviedalisia pra zbor hrošaj u sacyjalnych sietkach. 4 studzienia paštoŭka była nabytaja za 52 dalary. Dniami jana budzie pieradadziena ŭ historyka-etnahrafičny muziej.
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary