Pomnik narodnamu artystu SSSR Uładzimiru Mulavinu ŭstanoviać na jaho radzimie ŭ Jekaciarynburhu 29 vieraśnia. Ab hetym siońnia ŭ čas akcyi «Vianok pašany», pryśviečanaj zasnavalniku ansambla «Pieśniary», zajaviŭ ministr kultury Biełarusi Barys Śviatłoŭ/
Manumient uźviaduć pa prajekcie biełaruskaha skulptara, uładalnika załatoha miedala Akademii mastactvaŭ SSSR Siarhieja Łohvina. Pomnik ustanoviać u centry horada na alei, jakaja viadzie da biletnych kas kinakancertnaha teatra «Kosmas».
U toj ža dzień na radzimie Mulavina projdzie kancert Biełaruskaha dziaržaŭnaha ansambla «Pieśniary».
Siońnia spaŭniajecca 45 hadoŭ z dnia stvareńnia lehiendarnaha kalektyvu. Z hetaj nahody na Maskoŭskich mohiłkach adbyłasia akcyja «Vianok pašany», pryśviečanaja pamiaci zasnavalnika ansambla — Uładzimiru Mulavinu.
Aficyjnaj dataj stvareńnia kalektyvu ličycca 1 vieraśnia 1969 hoda, kali rašeńniem mastackaha savieta Biełaruskaj fiłarmonii hrupa «Lavony» (pieršapačatkovaja nazva kalektyvu) atrymała prava nazyvacca vakalna-instrumientalnym ansamblem. Z nazvaj «Lavony» hrupa praisnavała kala hoda, da IV Mižnarodnaha konkursu artystaŭ estrady, jaki prachodziŭ u kastryčniku 1970 hoda.
«Pieśniary» doŭhi čas zastavalisia adnoj z samych papularnych hrup Savieckaha Sajuza. «Biełaviežskaja pušča», «Vołahda», «Za paŭhadziny da viasny», «Kniažna» i mnohija inšyja pieśni, što hučali ŭ vykanańni lehiendarnaha ansambla «Pieśniary», daŭno pryznany lepšymi chitami XX stahodździa. Skład kalektyvu nie raz źmianiaŭsia. Usiaho ŭ ansambli prapracavała bolš za 50 muzykantaŭ. Mastackim kiraŭnikom ansambla «Pieśniary» z momantu jaho ŭtvareńnia i da svajoj śmierci ŭ 2003 hodzie byŭ Uładzimir Mulavin.
Ciapier čytajuć
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju2
Kamientary