Staršynia bresckaj arhanizacyi Biełaruskaj partyi levych «Spraviadlivy śviet» Ludmiła Dzienisienka, jakaja bałatavałasia ŭ Brescki haradski saviet pa vybarčaj akruzie № 13 na vybarach u miascovyja saviety ŭ sakaviku 2014 hoda, abskardziła ŭ abłasnym sudzie admovu suda Leninskaha rajona Bresta ŭ raspačynańni hramadzianskaj spravy pa jaje skarzie na niepravamiernyja dziejańni vybarčych kamisij i dziaržaŭnaha orhana.
«Sudździa rajonnaha suda vyniesła pastanovu ab admovie ŭ raspačynańni hramadzianskaj spravy pa majoj skarzie, abhruntavaŭšy jaje niepaviedamnaściu, — paviedamiła Dzienisienka. — Ja liču dovady nieabhruntavanymi. I ŭ paćviardžeńnie hetamu ŭ skarzie, nakiravanaj 27 žniŭnia ŭ abłasny sud, pryvodžu artykuły Hramadzianskaha pracesualnaha kodeksa, Kanstytucyi Biełarusi i prašu admianić pastanovu sudździ Leninskaha rajona Bresta».
Pavodle słoŭ Dzienisienki, praz rajonny sud jana chacieła damahčysia atrymańnia śpisa vybarščykaŭ učastka № 44, jakija prahałasavali doma.
Z pratakoła hetaj učastkovaj kamisii vynikaje, što 23 sakavika doma prahałasavała 168 čałaviek. Na dumku Dzienisienki, za dzień abyści takuju kolkaść damoŭ niemahčyma na vybarčym učastku ŭ siektary pryvatnych žyłych zabudoŭ, i eks-kandydat ŭ deputaty chacieła pravieryć, ci sapraŭdy hetyja 168 čałaviek hałasavali pa miescy žycharstva.
Zajavu ŭ rajonny sud Dzienisienka padała paśla biespaśpiachovych zvarotaŭ u Bresckuju abłasnuju i Bresckuju haradskuju vybarčyja kamisii z prośbaj dać śpis vybarščykaŭ učastka, jakija prahałasavali doma, a taksama ŭ prakuraturu Bresta — pravieści pravierku pa hetym fakcie i abaviazać adpaviednyja orhany padać taki śpis. Paśla taho jak z prakuratury joj adkazali, što śpis vybarščykaŭ, jakija hałasavali doma, znachodzicca ŭ administracyi Leninskaha rajona Bresta, źviarnułasia tudy. I taksama biezvynikova.
15 žniŭnia Dzienisienka padała skarhu ŭ sud Leninskaha rajona Bresta i patrabavała pryznać admovy vybarkamaŭ niepravamiernymi, što parušajuć č. 4 art. 49-1 Vybarčaha kodeksa, u adpaviednaści ź jakim oj zajaŭnik maje prava znajomicca z materyjałami, źviazanymi z razhladam jaho zvarotu, a taksama abaviazać administracyju Leninskaha rajona Bresta padać śpis vybarščykaŭ učastka № 44, jakija prahałasavali na damu, dla aznajamleńnia i vyrabu kopii.
«Pahladzim, što adkažuć mnie z abłasnoha suda. Ale ciapier ja ŭsio bolš prychodžu da vysnovy: adciahvajučy čas, sprabujuć schavać mahčymuju falsifikacyju vynikaŭ vybaraŭ na hetym učastku. Tamu što praz paŭhoda paśla praviadzieńnia vybaraŭ śpisy vybarščykaŭ, jakija prahałasavali, źniščajucca», — zajaviła Dzienisienka.
Kamientary