Alaksandr Łukašenka ličyć, što raźvićcio ahraekaturyzmu ŭ krainie dapamoža reanimavać niepierśpiektyŭnyja vioski.
Takoje mierkavańnie jon vykazaŭ siońnia ŭ čas rabočaj pajezdki ŭ Minskuju vobłaść.
Kiraŭnik dziaržavy aznajomiŭsia z raźvićciom ahraekaturyzmu na prykładzie ahrasiadzibaŭ Vałožynskaha rajona.
«Jość u nas vielmi šmat viosak. Raniej ich nazyvali niepierśpiektyŭnymi. A jašče chutary, — adznačyŭ Łukašenka. — Čamu b čałavieku, jaki tam vyras ci prosta biznesoŭcu i lubomu achvotnamu nie pabudavać tam ahrasiadzibu? Reanimavaŭ by i viosku».
Na dumku kiraŭnika dziaržavy, miascovyja žychary mahli b akazać dapamohu, pryhladajučy za siadzibami, padtrymlivajučy paradak.
«Ja padšturchoŭvaju ludziej da taho, kab jany išli i raźvivali heta. Niekatoryja tak užo i robiać», - zaŭvažyŭ kiraŭnik dziaržavy.
Łukašenka ličyć, što paśla haspadary padobnych ahrasiadzibaŭ, pastupova raźvivajučy ich, mahli b farmavać fiermierskija haspadarki.
«Dapuścim, razvodzili poni, a moža, i dziasiatak karoŭ b trymali. Heta jašče pryjdzie, — adznačyŭ kiraŭnik dziaržavy.
— Ja chaču hetym reanimavać našy viosački. A to ahraharadki my pabudavali, heta dobra, ale heta, ličy, budučy horad, a voś hetyja vioski, chutary treba padniać, nakolki heta mahčyma».
Pa słovach kiraŭnika dziaržavy, niekatoryja biźniesmieny padtrymali hetuju prapanovu i pačali ŭkładać srodki ŭ raźvićcio tych miescaŭ, dzie kaliści naradzilisia.
Łukašenka źviarnuŭ uvahu na toje, što Biełarusi jak tranzitnaj dziaržavie varta bolš aktyŭna raźvivać i prydarožny servis, adnak nie uzvodziačy abjekty z nula, a zadziejničajučy bližejšyja da trasach nasielenyja punkty.
Na jaho dumku, heta daść šturšok da ŭzdymu nievialikich nasielenych punktaŭ.
«Nam nie treba ŭ čystym poli na darohach budavać hety servis. Bo na kožnaj darozie ŭ nas praz 35-50 km rajcentry, i davajcie pryviazvać da infrastruktury hetych rajcentraŭ punkty adpačynku, absłuhoŭvańnia, zapraŭki. Što takoje 35 km?
A čaściej nie treba, jany nie buduć zaniatyja. I kali tym samym my padymiem rajcentry, tady ŭžo budziem budavać na abočynach», - skazaŭ jon.
Kamientary