Z sakavika hetaha hoda ŭ pryhraničnych punktach propusku było vyjaŭlena 17 čałaviek z pavyšanaj tempieraturaj cieła. Ab hetym paviedamiŭ načalnik adździeła hihijeny, epidemijałohii i prafiłaktyki Ministerstva achovy zdaroŭja Juryj Fiodaraŭ.
Nahadajem, z sakavika ŭ Biełarusi dziejničaje sanitarna-epidemijałahičny kantrol dla praduchileńnia ŭvozu ŭ krainu infiekcyjnych zachvorvańniaŭ, u tym liku lichamanki Eboła.
Jak adznačyŭ Fiodaraŭ, u aeraportach, čyhunačnych i aŭtamabilnych punktach propusku vykarystoŭvajucca prybory dystancyjnaha kantrolu tempieratury cieła (ciepłavizary), jakija dazvalajuć vydzielić z patoku pasažyraŭ čałavieka z pavyšanaj tempieraturaj cieła.
«Z sakavika pa 1 žniŭnia praz taki kantrol va ŭsich punktach propusku prajšło 4,5 młn. čałaviek. Vyjaŭlena 17 čałaviek z pavyšanaj tempieraturaj, ale pry apytańni było ŭstanoŭlena, što heta nie źviazana ź lichamankaj Eboła», — raskazaŭ śpiecyjalist.
Jon padkreśliŭ, što pavyšeńnie tempieratury ŭ vyjaŭlenych vypadkach było źviazana z prastudaj, hrypam i kišačnymi infiekcyjami pasažyraŭ.
Pavodle słoŭ pradstaŭnika Ministerstva achovy zdaroŭja, u aeraportach ciepłavizaram achopleny ŭvieś patok pasažyraŭ, jakija prybyvajuć, u toj čas jak u aŭtamabilnych punktach propusku vykarystoŭvajucca pieranosnyja ciepłavizary i tolki ŭ tym vypadku, kali ŭ transpartnym srodku jeduć pasažyry sa skarhami na niedamahańnie abo hramadzianie, jakija naviedvali krainy, dzie zarehistravany vypadki lichamanki Eboła. «Ludziej z tempieraturaj prosiać prajści na miedahlad, ź imi razmaŭlajuć, źbirajuć anamniez», — raskazaŭ Fiodaraŭ.
Na čyhuncy za stanam zdaroŭja pasažyraŭ sočać pravadniki, jakija ŭ vypadku padazreńniaŭ na niebiaśpiečnaje zachvorvańnie mohuć paviedamić ab hetym na najbližejšuju stancyju pa chodu ruchu ciahnika, adznačyŭ śpiecyjalist. Akramia taho, vizualnuju acenku stanu zdaroŭja hramadzian, jakija prybyvajuć u Biełaruś, pravodziać pamiežniki.
Jak padkreśliŭ Fiodaraŭ, Biełaruś maje nizkuju ryzyku praniknieńnia i raspaŭsiudžvańnia virusu Eboła, bo ŭ krainie niepadychodziačyja klimatyčnyja ŭmovy i adsutničajuć asnoŭnyja pieranosčyki zachvorvańnia — niekatoryja vidy raspaŭsiudžanych u Afrycy kažanoŭ i małpaŭ. «Tamu ŭsie miery nakiravany na prafiłaktyku zavozu i raspaŭsiudžvańnia», — skazaŭ pradstaŭnik Ministerstva achovy zdaroŭja.
Dla prafiłaktyki zachvorvańnia jon rekamiendavaŭ u pieršuju čarhu vykonvać praviły asabistaj hihijeny: myć ruki pierad ježaj, nie ŭžyvać ježu i vadu nieviadomaha pachodžańnia, a ŭ vypadku padazreńnia na zachvorvańnie nieadkładna źviartacca da ŭrača.
Pavodle źviestak Suśvietnaj arhanizacyi achovy zdaroŭja, virus užo zabraŭ žyćci bolš čym tysiačy čałaviek, a ŭsiaho zarehistravana bolš jak 1.800 vypadkaŭ zachvorvańnia ŭ Hviniei, Libieryi, Śjera-Leonie i Nihieryi. 12 žniŭnia ŭ madrydskim špitali ad lichamanki Eboła pamior 75-hadovy ispanski śviatar Mihiel Pachares, jaki zaraziŭsia ŭ Libieryi i byŭ pieraviezieny ŭ Ispaniju dla intensiŭnaha lačeńnia.
Kamientary