Paratnikaŭ: Biełaruskamu nacyjanalizmu jak harantyi suvierenitetu alternatyvy nie było, niama i nie budzie

U adnym z ahresiŭna-­prapahandysckich artykułaŭ sajta Imperiya.by natyknuŭsia na cikavaje pryznańnie: «Ukry očień bojaťsia potieŕ svojej živoj siły» (pravapis aryhinała).

Taktyka ŭkraincaŭ hruntujecca na abłozie i pastupovym adstrele apornych punktaŭ bajevikoŭ.

Avijacyja i «Hrady» ŭžyvajucca mała, kab minimizavać straty mirnaha nasielnictva. Dyj hrošaj na avijacyju va ŭkraincaŭ niašmat.

Takim sposabam abłoha Słavianska zaniała va ŭkrainskaj armii amal try miesiacy.

Paśla spynieńnia pieramirja 1 lipienia za dva dni jany ścisnuli koła vakoł Słavianska, a za čatyry dni, paśla padzieńnia pasiołka Mikałajeŭka, kančatkova jaho zamknuli. Na piaty dzień, unačy z 4 na 5 lipienia, tysiača bajevikoŭ pajšła na praryŭ i źbiehła ŭ hustanasieleny Danieck.

Maskoŭskija ŚMI źnizili hołas. Jany vinavaciać lidara bajevikoŭ Strałkova. Na rasijskich sajtach šukajuć vinavatych.

Ci možna havaryć pra pierałom u vajnie? Pra heta my zapytalisia ekśpierta ŭ siłavoj tematycy, stvaralnika analityčnaha centra Belarus Security Blog Andreja Paratnikava.

— Jak pa-­Vašamu, ci padzieńnie Słavianska aznačaje kančatkovy pierałom u padziejach na Danbasie?

— Adnaznačna nie. Heta važny etap. Ale važny hałoŭnym čynam dziakujučy svajmu simvalizmu. Terarysty nazyvali Słaviansk svaim Stalinhradam. I voś, pryjšłosia ŭciakać. Druhi važny momant — heta toje, što ŭkrainskaje vojska faktyčna zaviazła značnaj častkaj svaich siłaŭ pad horadam. Tamu jaho vyzvaleńnie daje ŭkrainskamu kamandavańniu dadatkovyja siły dla apieracyj na inšych kirunkach.

— Jak dalej mohuć raźvivacca padziei? Ukraincy pasprabujuć atačyć i ŭziać šturmam Danieck i Łuhansk ci pasprabujuć zamknuć vialikaje koła ŭzdoŭž rasijskaj miažy i buduć čakać?

— Na heta dakładna mohuć adkazać 4 čałavieki: prezident Ukrainy, ministr abarony Ukrany, načalnik Hienštaba ZSU i kamandujučy Nachvardyjaj.

Ja spa­dziajusia, što ŭkraincy pieramohuć emocyi i pasprabujuć dziejničać racyjanalna. Na maju dumku, treba adkryć kalidor dla vychadu ŭsich achvotnych u Rasiju. I kab vychodzili abaviazkova sa zbrojaj. Dumaju, u ich buduć pytańni da pavažanaha Uładzimira Uładzimiraviča.

A aŭtamat Kałašnikava dadaść ich pytańniam dadatkovuju vahu. Jak heta «kavałak Russkoho Mira» «žyda­biendieram na paruhańnie» addali. Karaciej, u chłopcaŭ jość «niepaniatka». Dalej, palavym kamandziram siaredniaj ruki možna prapanavać hrošy i vyjezd u lubuju krainu śvietu. Miljon dalaraŭ — nievialikaja płata za mir. Dyj kamandziraŭ tych nie šmat. Chaj valać. Tolki spačatku zdaduć svaje bandy i saljuć infarmacyju adpaviednym ukrainskim słužbam.

— Hetuju vajnu kiraŭnik NATA Rasmusen nazvaŭ «vajnoj novaha typu». Jakija vysnovy možna zrabić pra jaje? Jak jana praciakaje?

— Pieršaja vysnova: raźličvać na ES u kryzisnaj situacyi — siabie nie pavažać.

Tam jość asobnyja krainy (Bałtyja, Polšča, Rumynija, skandynavy). Ź imi i možna mieć spravy i šukać supolny intares.

Druhaja vysnova: pad udaram znachodzicca nie tolki materyjalnaja infrastruktura, ale i psichika hramadzianaŭ krainy-­achviary.

Z hetym taksama treba niešta rabić. I pieršaje — supraćpastavić mocnuju ideju. U dadzienym vypadku — niezaležnaj sabornaj Ukrainy.

Treciaja vysnova: rana śpisvać tanki, u pryvatnaści, i kłasičnaje vojska, uvohule. Situacyja va Ukrainie prademanstravała, što kolkaść (vojska i techniki) nie mienš važnaja za jakaść.

Prafiesijnaje vojska, jak akazałasia, tupikovy varyjant dla kantynientalnaj krainy. «Nievialikaja mabilnaja» armija, ab jakoj lubić parazvažać A. Łukašenka, spracuje tolki suprać takoj ža maleńkaj.

Albo vialikaj, kali na tvaim baku łandšaft. Jak toje było ŭ Afhanistanie ci ŭ Finlandyi.

Čaćviortaja i hałoŭnaja vysnova: asnoŭny resurs krainy — heta hramadzianie­-patryjoty. Jakija ŭ ciažki momant zdolnyja sami arhanizavacca i pačać dziejničać.

Prykład bataljona «Danbas» vielmi krasamoŭny, jak i ŭ dobraachvotnikaŭ­hvardziejcaŭ. Nacyjanalny duch u baraćbie z bolšym voraham — hałoŭnaja ćviardynia i apiryšča. Jaho treba hadavać uvieś čas.

— Jakaja była rola rasijskich siłaŭ śpiecpryznačeńnia ŭ danbaskich padziejach?

— Chutčej treba kazać pra rolu śpiecsłužbaŭ.

Uvohule, pieršy šerah abarony (ci ahresii) dziaržavy zaraz — heta efiektyŭnyja śpiecsłužby. Śpiecsłužby — heta vočy.

Ślapomu navat vialikija kułaki nie dapamohuć.

— Čamu ŭkraincy niasuć takija vialikija straty — zahinuła ŭžo bolš za 300, a paraniena, imavierna, bolš za tysiaču ŭkrainskich vajskoŭcaŭ?

— Heta adnosna nievialikija straty. Čamu? Adkazaŭ šmat.

Nichto nie rychtavaŭsia vajavać z Rasiejaj.

Nichto ŭvohule nie rychtavaŭsia tam vajavać. 23 hady vojska raskradali. Strašennaja karupcyja na ŭsich uzroŭniach. I zdrada z samaha vierchu. Pieršapačatkova va ŭkraincaŭ navat suviazi nie było. Tamu va ŭmovach tatalnaj dehradacyi dziaržavy hetyja straty jašče minimalnyja.

— Čamu ŭsio-­taki Rasija nie pasłała vojski ŭ adkrytuju, čamu nie pasprabavała ŭstanavić biespalotnuju zonu prynamsi?

— Rasiei niama čym vajavać. I kim. Na piku jany sabrali ŭ suchaputnych siłaŭ, avijacyi i fłotu hrupoŭku 220 tys. Vidać, heta amal ŭsio, što jość.

Možna dabavić jašče pamiežnikaŭ, FSB, Unutranyja vojski. Ale razam tam budzie nie bolš za 300 tys. suchaputnych siłaŭ.

Jość raźliki brytanskich admysłoŭcaŭ: dla kantrolu nad akupavanaj terytoryjaj na kožny miljon miascovaha nasielnictva treba mieć 20—25 tysiač ułasnaha akupacyjnaha vojska. Takim čynam, dla akupacyi ŭsioj Ukrainy treba 900 tys. — 1,15 młn suchaputnaha vojska. Dla akupacyi Danbasa —120—150 tys.

A treba ž jašče Krym trymać i na froncie suprać ukrainskaha vojska mieć siły. Pryjšłosia b pravodzić mabilizacyju. Ale ciapier, u mirny čas, ukłanistaŭ u Rasiei bolš, čym pryzyvajecca ŭ vojska.

«Ruś Śviatuju» ŭsie tam lubiać, ale ž čamuści słužyć joj asabliva nie chočuć.

Takaja zahadkavaja rasiejskaja duša. Darečy, niastača ludskoha resursu vymusiła i zachodnikaŭ «zharnuć vudy» ŭ Iraku i Afhanistanie. Tak, u tych prafiesijnaje, dobra ŭzbrojenaje vojska. Ale jaho mała. Fizična mała. Vysnovy z hetaha pakul zrabili tolki palaki.

— Kali što, Biełaruś moža raźličvać na niejkich sajuźnikaŭ?

— U hetym śviecie kožny sam za sabie. I raźličvać my možam tolki na ŭłasnyja siły. Nijakija Zachady i Rasiei, kali što, nas nie abaroniać. Biełaruskamu nacyjanalizmu — takomu, jak jon byŭ sfarmiravany ŭ 1900-­20­-ja hady minułaha stahodździa ŭ jakaści dziaržideałohii, alternatyvy nie było, niama i nie budzie.

Tolki jon u stanie harantavać našu moc i mabilizacyju hramadstva, kali toje, barani boža, spatrebicca.

* * *

Andrej ParAtnikaŭ (proźvišča vymaŭlajecca z naciskam na druhoje «a», Paratnikaŭ.) Naradziŭsia ŭ 1978 u Babrujsku. Pracavaŭ u Śledčym aparacie MUS. Stvaralnik analityčnaha centra Belarus Security Blog

***

Ukrainskija vojski

Imavierna, kala 35 tysiač čałaviek. Nieabmiežavanaja kolkaść artyleryi i bieśpiłotnikaŭ. Abmiežavanaja kolkaść tankaŭ. Nievialikaja kolkaść dziejnych samalotaŭ i viertalotaŭ.

Bajeviki

Imavierna, kala 12 tysiač čałaviek. Nieabmiežavanaja kolkaść strałkovaj zbroi, hranatamiotaŭ, zienitna­-rakietnych kompleksaŭ. Abmiežavanaja kolkaść BTRaŭ i BMD, niekalki dziasiatkaŭ tankaŭ i samachodak «Nona».

Pavialičyć

• 0
• 0
• 0
• 0
• 0
• 0
• 0
• 0