U aŭtorak antymanapolnaja ŭłada Litvy nakłała na «Hazprom» štraf u pamiery 123 młn litaŭ (kala 50 młn dalaraŭ) za stvareńnie pieraškody dla litoŭskaj firmy impartu z Zachodniaj Jeŭropy hazu, tańniejšaha za rasiejski.
Spravu suprać «Hazpromu» litoŭskaja Rada ŭ pytańniach kankurencyi pačała ŭ 2012, paśla skarhi firmy Lietuvos Energijos Gamyba. Taja firma damoviłasia z zachodniejeŭrapiejskim enierhietyčnym kancernam pra pastaŭki tannaha hazu na ŭmovach abmienu. Toj kancern prapanavaŭ, kab uzamien na peŭnuju kolkaść rasijskaj syraviny, jakaja dastaŭlajecca jamalskim hazapravodam praz Polšču ŭ Hiermaniju, litoŭskaja firma atrymała takuju samuju kolkaść syraviny. A Lietuvos Energijos Gamyba zapłaciła b za tuju syravinu tańniej, čym za haz, kupleny ŭ «Hazproma». Damova mieła dziejničać u 2013—15.
Adnak tranzakcyja patrabavała ŭzhadnieńnia z rasijskim kancernam, jaki trymaje manapoliju na pastaŭku haza Litvie, a taksama dastaŭlaje haz u Hiermaniju praz Polšču. Adnak «Hazprom» admoviŭsia razmaŭlać z Lietuvos Energijos Gamyba na temu takoha abmienu.
Na dumku litoŭskaj antymanapolnaj słužby, heta pieraškodziła Lietuvos Energijos Gamyba stvaryć umovy svabodnaj kankurencyi. Taksama, na dumku Vilni, «Hazprom» parušyŭ umovy damovy pra nabyćcio akcyj litoŭskaj hazavaj firmy Lietuvos Dujos. U 2004 litoŭskaja antymanapolnaja słužba pahadziłasia, kab «Hazprom» kupiŭ 34% akcyj Lietuvos Dujos, pry ŭmovie, što rasijski kancern nie budzie pieraškadžać litoŭskim firmam kuplać haz u inšych pastaŭščykoŭ.
«Hazprom» sychodzić ź Litvy?
Arbitražny sud u Stakholmie taksama razhladaje pazoŭ suprać «Hazproma», jaki ŭ kastryčniku 2012 padaŭ urad Litvy. Vilnia vinavacić «Hazprom» u šmathadovym zavyšeńni cany na haz dla Litvy i patrabuje viartańnia 2 młrd dalaraŭ (potym kvotu źnizili da 1,8 młrd dalaraŭ).
U aŭtorak premjer Litvy Alhirdas Butkiavičus paćvierdziŭ, što razhlad u Stakholmie praciahvajecca. Toj razhlad Vilnia moža vykarystać, kab zmusić «Hazprom» admovicca ad inviestycyj u Lietuvos Dujos. U minułym miesiacy ŭrad Litvy vykupiŭ akcyi Lietuvos Dujos u niamieckaha kancerna E.ON i viarnuŭ kantrol nad svajoj nacyjanalnaj hazavaj kampanijaj.
Ciapier čytajuć
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju5
Kamientary