Doktar, jakaja akazvała dapamohu pamierłaj dziaŭčynie, maje ŭłasnuju kramu
Akušer-hiniekołah patłumačyła Jeŭraradyjo, što Irynie Tromzie «akazvali štosiekundnuju dapamohu». Pra ŭviedzieny preparat miedyk maŭčyć.
Jeŭraradyjo ŭdałosia adšukać akušera-hiniekołaha, jakaja maje dačynieńnie da trahičnaha zdareńnia ŭ bresckim filijale miedcentra «Łade».
Nahadajem, što 21-hadovaja pacyjentka Iryna Tromza pamierła paśla pryjomu. Jak paviedamlajecca, ad «anafiłaktyčnaha šoku». Chutčej za ŭsio, arhanizm takim čynam adreahavaŭ na niejki lekavy preparat.
«My ŭdvaich z doktaram akazvali nieadkładnuju dapamohu. Nieadkładnyja mierapryjemstvy byli praviedzienyja štosiekundna, — kaža Jeŭraradyjo doktar. — Ja pakul admaŭlajusia heta kamientavać, źviartajciesia da administracyi «Łade», — akušer-hiniekołah unikła razmovy z žurnalistam, spasłaŭšysia jašče i na toje, što nie moža razmaŭlać padčas kiravańnia aŭtamabilem.
Taksama doktar praihnaravała pytańnie, jaki preparat byŭ uviedzieny dziaŭčynie i ci apytvali Irynu Tromzu nakont mahčymych alerhičnych reakcyj.
Viadoma, što praktyku doktar raspačała ŭ 2006 hodzie, adrazu paśla zakančeńnia Homielskaha mieduniviersiteta. Žančyna pavyšała kvalifikacyju na majstar-kłasach i kursach u Maskvie i ŭ Biełarusi. Vodhuki na forumach pra jaje stanoŭčyja.
Ale, jak stała viadoma Jeŭraradyjo, doktar nie addaje ŭvieś volny čas miedycynie. Jana ŭznačalvaje…internet-kramu pa prodažy biełaruskaha trykatažu. Kantora maje filijał nie tolki ŭ Breście, ale i ŭ Maskvie.
U kramie Jeŭraradyjo paćvierdzili, što doktar sapraŭdy kiruje kramaj. Viedajuć tut i pra trahičny vypadak z pacyjentam u bresckim miedcentry.
Jeŭraradyjo: Jana ŭ vas tolki naminalny dyrektar ci sumiaščaje svaju dziejnaść ź biznesam?
Internet-krama: «Heta niavažna. Pa dadzienym pytańni my ničoha kamientavać nie možam. Vas cikavić doktarskaja dziejnaść, tamu źviartajciesia ŭ «Łade».
U pres-słužbie Minzdaroŭja cikavimsia, ci narmalnaja heta źjava dla biełaruskaj miedycyny, kali daktary paralelna zajmajucca biznesam. Ci nie zaminaje heta miedykam u płanie prafiesijnaha raźvićcia?
«Mnie składana heta kamientavać. Chutčej heta jurydyčnyja pytańni, — adkazvaje Volha Bartman, pres-sakratar Minzdaroŭja. — Ale majo mierkavańnie takoje, što doktaru składana čymści zajmacca paralelna».
Pytańni prafiesijnaha ŭzroŭniu daktaroŭ u «Łade» i ci moža tut być niejkaja suviaź ź jakaściu akazańnia mieddapamohi, razhledziać padčas słužbovaj pravierki va Upraŭleńni achovy zdaroŭja Bresckaha abłvykankama.
«Śledstva daručyła pravieści hetuju pravierku. Padčas jaje mohuć zakranacca pytańni i ab kvalifikacyi, i ab adukacyi. Heta moža paŭpłyvać niepasredna na našu pravierku pa fakcie śmierci dziaŭčyny, — tłumačyć Rusłan Makaruk, aficyjny pradstaŭnik upraŭleńnia Śledčaha kamiteta pa Bresckaj vobłaści. — My ž aceńvajem situacyju z punktu hledžańnia zakona, daśledčaj pravierki z metaj vyśviatleńnia pryčyny śmierci dziaŭčyny. Užo vyniatyja mieddakumienty, lekavyja preparaty, jakija vykarystoŭvalisia padčas daśledavańnia. Buduć vyvučanyja ŭsie mahčymyja abstaviny».
21-hadovaja dziaŭčyna pamierła paśla vizitu da hiniekołaha ŭ «Łade»
Kamientary