De-fakta roznyja hrupy ŭdzielnikaŭ vyrašali svaje zadačy, jakija słaba karelavalisia ź "lehiendaju" mierapryjemstva. Piša ŭ svaim błohu Alaksandar Kłaskoŭski.
"Sacyjalny marš" pavodle maštabu (nia bolej za dźvie-try tysiačy ŭdzielnikaŭ) skłaŭ u lepšym vypadku pałovu "Eŭrapiejskaha". Pry tym što niadaŭniaje apytańnie NISEPD śviedčyła pra zaŭvažna bolšuju papularnaść mienavita sacyjalnaha šeścia.
Ahladalnik hazety "Tovariŝ" Mikałaj Toŭścik, ź jakim ja sustreŭsia na akcyi, ličyć, što narod jašče nie paśpieŭ sierbanuć vialikaj łyžkaj ekanamičnych niahodaŭ. Jak zruch kaleha adznačyŭ, što hetym razam na vulicu vyjšaŭ užo trochi inšy kantynhient, nia tolki zaŭsiodniki.
Zrešty, druhi moj surazmoŭca, palitolah Valer Karbalevič, miarkuje, što novaj publiki akazałasia niašmat, a voś stały aktyŭ častkova prainharavaŭ akcyju, "nie paličyŭšy jaje zmahańniem za kaštoŭnaści".
Va ŭsiakim razie, vidavočna, što mitynh na Banhałory nie natchniŭ pravych i asabliva radykalnuju moładź. Faktyčna jana zładziła svoj maleńki praryŭ na płošču Niezaležnaści, piśmienna skarystaŭšysia prykryćciom dazvolenaj "darosłaj" akcyi.
Ciaham spantannaha šeścia maładzionaŭ ad Kastryčnickaha placu paŭz budynak KHB da Domu ŭradu vakoł mitusilisia ludzi ŭ cyvilnym, ale adčuvałasia, što zahadu "brać" niama. Infarmacyi ab zatrymańniach niama i na toj momant, kali ja ŭžo doma pišu hetyja radki.
Ułada pradublavała taktyku, užytuju padčas "Eŭrapiejskaha maršu". Pierakanałasia, što realnaj niebiaśpieki taki "razhuł liberalizmu" nie stvaraje, a miž tym Zachad strymana chvalić chaj sabie j hetki prahres. Zrešty, siońnia za razhon "maršu pracoŭnych" było b niajomka i pierad kamunistami ŭsiaho śvietu, što źjechalisia ŭ Miensk na forum. Tak što i tavaryšu Ziuhanavu dziakuj! :)
Što ž pakazała akcyja?
Da stadyi "pustych rondalaŭ" narodu, kaniešnie, daloka (i dziakuj bohu!). Ale kali i nadydzie čas sapraŭdy masavych sacyjalnych pratestaŭ, to zusim nia fakt, što napieradzie na biełym kani apyniecca tytulnaja apazycyja. Siońnia dla jaje byŭ, kali chočacie, treninh. I arhanizacyja akcyi całkam adpaviadała vysłoŭju "chto ŭ les, a chto pa drovy".
De-fakta roznyja hrupy ŭdzielnikaŭ vyrašali svaje zadačy, jakija słaba karelavalisia ź "lehiendaju" mierapryjemstva. Tak, Ihar Rynkievič z kupkaj adnadumcaŭ naładziŭ na Kastryčnickim placy całkam aŭtanomnuju imprezu ź zialonaj rydloŭkaj pad lozunham vyzvaleńnia Kazulina. Svaju misiju, musić, paličyli vykananaj i udzielniki našumiełaj bojki (dumaju, hety siužet my jašče pabačym pa televizii). Narešcie, daviała svoj nonkanfarmizm taja moładź, što dapiała pad bieł-čyrvona-biełymi štandarami da pomnika pravadyru ŭsiaśvietnaha praletarjatu dy praśpiavała "Mahutny Boža" pad voknami Sidorskaha.
Karaciej, takoj idejnaj eklektyki na mienskich vulicach daŭno nie było :) Pad markaj "Sacyjalnaha maršu" roznyja farmalnyja i niefarmalnyja supołki ładzili svaje maleńkija śviaty niepasłušenstva.
Kaniešnie, takaja voś spantannaja, paŭzučaja advajova mikraplacdarmaŭ svabody taksama maje svoj sens. Ale kazać pra mocnuju stratehiju dy arhanizacyju navat u miežach asobnaj akcyi nie vypadaje. Miž tym apanenty režymu majuć patrebu ŭ doŭhaterminovaj stratehii hulni na sacyjalnym poli. Bo tut pazycyi ŭłady prasiadajuć kapitalna. Zaraz tytulnaja apazycyja skončyła vuličny sezon sa ścipłym mabilizacyjnym patencyjałam. Miž tym za zimu ŭ nastrojach masy šmat što moža źmianicca.
Narada ŭ pytańni lhotaŭ, namiečanaja na 6 listapada, pakaža, nakolki tam, naviersie, nervujucca i što majuć u rezervie, kab zamartyzavać niepaźbiežnyja ŭdary ekanamičnych čyńnikaŭ.
Kamientary