Demakratyčnyja siły Biełarusi pryniali zajavu pra rasijska-ŭkrainski kanflikt

Demakratyčnyja siły Biełarusi pryniali zajavu pra rasijska-ŭkrainski kanflikt. Jany rašuča vystupajuć za terytaryjalnuju cełasnaść Ukrainy i asudžajuć rasijskaje vajennaje ŭmiašańnie ŭ Krymie.

Taksama demsiły zajaŭlajuć pra niedapuščalnaść uciahvańnia našaj krainy ŭ rasijska-ŭkrainski kanflikt. Dakumient padpisali Abjadnanaja hramadzianskaja partyja, Biełaruskaja sacyjał-demakratyčnaja partyja (Hramada), arhkamitet pa stvareńni partyi «Biełaruskaja chryścijanskaja demakratyja», kampanija«Havary praŭdu», ruch «Za Svabodu», Partyja BNF.

«Ukrainski narod spraviadliva padniaŭsia suprać sistemy tatalnaj karupcyi, poŭnaj niepadkantrolnaści čynoŭnikaŭ i biazdarnaj ekanamičnaj palityki ŭrada źbiehłaha z krainy prezidenta Viktara Janukoviča i adchiliŭ ad ułady kiraŭnikoŭ, jakija šmat krali i šmat chłusili, — cytuje zajavu BiełaPAN. — Adnak ciapier my źjaŭlajemsia śviedkami novaha etapu baraćby ŭkrainskaj nacyi za prava być svabodnaj i samastojna vyrašać svoj los. Hrebujučy normami Chielsinkskaha akta pra nieparušnaść pavajennych miežaŭ u Jeŭropie i Budapiešckaha miemaranduma, što harantuje terytaryjalnuju cełasnaść Ukrainy, jakaja dobraachvotna admoviłasia ad jadziernaj zbroi, kiraŭnictva Rasijskaj Fiederacyi raspalvaje sieparatysckija nastroi ŭ paŭdniova-ŭschodnich abłaściach Ukrainy i z vykarystańniem vajennaj siły faktyčna anieksavała Krym».

U demakratyčnych sił Biełarusi vyklikaje «surjoznuju zakłapočanaść» toj fakt, što ŭ kanflikt moža być uciahnutaja Biełaruś. 

«Raźmiaščeńnie na terytoryi našaj krainy dadatkovaha kantynhientu Uzbrojenych sił RF niedvuchsensoŭna śviedčyć pra najaŭnaść takoj pahrozy», — padkreślivajuć aŭtary zajavy.

«Ź situacyi, što skłałasia va Ukrainie, palityčnym i ekanamičnym elitam, usim hramadzianam Biełarusi nieabchodna zrabić vysnovy, jakija majuć surjoznaje značeńnie dla dalejšaha palityčnaha i sacyjalna-ekanamičnaha raźvićcia našaj krainy, umacavańnia jaje suvierenitetu i nacyjanalnaj biaśpieki. Ukrainskija ŭroki pavinny być vykarystanyja biełaruskim hramadstvam z karyściu dla Biełarusi», — adznačajecca ŭ zajavie.

Demakratyčnyja siły ličać, što Biełarusi patrebnyja:

•  kansalidacyja nacyi, spynieńnie padzialeńnia biełaruskich hramadzian, palityčnych partyj i hramadskich arhanizacyj, ŚMI na «svaich» i «čužych», «česnych» i «niačesnych»;
• narmalizacyja adnosin z krainami Jeŭrapiejskaha sajuza i ZŠA, uklučajučy šyrokuju ekanamičnuju intehracyju, pastupovaje spraščeńnie i admienu vizavaha režymu z krainami ES;
•  terminovaje vyzvaleńnie palitviaźniaŭ, zabieśpiačeńnie palityčnych pravoŭ i svabod hramadzian;
•  praviadzieńnie ekanamičnych reform, jakija harantujuć prazrystyja i roŭnyja ŭmovy dziejnaści ŭsich haspadarčych subjektaŭ, raźvićcio pradprymalnickaj aktyŭnaści hramadzian, źnižeńnie padatkovaj nahruzki i nieapraŭdanaha administratyŭnaha ŭmiašańnia, stvareńnie pryvabnaha inviestycyjnaha klimatu;
•  adnaŭleńnie prazrystaści i spraviadlivaści vybarčych pracedur, pierachod da vybarnaści kiraŭnikoŭ miascovaj vykanaŭčaj ułady usim nasielnictvam adpaviednaj terytoryi;
•  zabieśpiačeńnie zaležnaści ŭłady ad naroda, padkantrolnaści i padadkaznaści čynoŭnikaŭ i deputataŭ roznych uzroŭniaŭ hramadzianam;
•  realnaje zabieśpiačeńnie kanstytucyjnaha statusu Biełarusi jak niejtralnaj dziaržavy, jakaja nie maje na svajoj terytoryi jadziernaj zbroi, zamiežnych vajennych abjektaŭ i nie nakiroŭvaje svaich vajskoŭcaŭ dla ŭdziełu ŭ bajavych dziejańniach za miežami krainy.

Aŭtary dakumienta adznačajuć, što jon adkryty dla padpisańnia ŭsimi žadajučymi.

• 0
• 0
• 0
• 0
• 0
• 0
• 0
• 0