Najbujniejšy zabudoŭščyk Biełarusi znoŭ akazaŭsia ŭ centry karupcyjnaha skandału
Śledčy kamitet pradjaviŭ abvinavačvańni pa niekalkich kryminalnych artykułach byłomu hałoŭnamu buchhałtaru DVA «Minskbud». Havorka znoŭ idzie pra chabarnictva i kradziažy srodkaŭ pradpryjemstva.
Dziaržaŭnaje vytvorčaje abjadnańnie «Minskbud», ź jakoha zusim niadaŭna staličnyja ŭłady vyrašyli stvaryć budaŭničy chołdynh, abjadnoŭvaje 21 arhanizacyju, u lik jakich uvachodziać najbujniejšyja prajekciroŭščyki i budaŭničyja tresty nie tolki Minska, ale i Biełarusi. Dastatkova skazać, što ŭ skład abjadnańnia ŭvachodziać takija hihanty budaŭničaj industryi krainy, jak AAT «MAPID», AAT «Budtrest № 1», AAT «Budtrest № 4», AAT «Budtrest № 7», AAT «Budtrest № 35», AAT «Trest № 15 «Śpiecbud», AAT «Minski domabudaŭničy kambinat» i inšyja.
Varta adznačyć, što dva hady tamu na DVA «Minskbud» užo razharaŭsia karupcyjny skandał. U kastryčniku 2011 hoda pravaachoŭnymi orhanami Minska byŭ zatrymany načalnik adździeła techničnaha nahladu za budaŭnictvam DVA «Minskbud». Pavodle dadzienych apieratyŭnikaŭ, jon vymahaŭ i atrymaŭ ad dyrektara padradnaj arhanizacyi chabar u pamiery 90 miljonaŭ rubloŭ za spryjalnaje vyrašeńnie pytańniaŭ ab padpisańni aktaŭ vykananych rabot pa abjekcie «Žyłaja zabudova ŭ miežach vuł. Matusieviča — vuł. P.Hlebki — pr-d Masiukoŭščyna — vuł. Masiukoŭščyna — vuł. Kaleśnikava — Mikrarajon «Masiukoŭščyna-3».
Novy karupcyjny skandał pryjšoŭ na DVA «Minskbud» z taho boku, adkul jaho nie čakali. Pačałosia ŭsio jašče ŭ krasaviku biahučaha hoda, kali ŭ Hałoŭnaje ŭpraŭleńnie pa baraćbie z arhanizavanaj złačynnaściu i karupcyjaj (HUBAZiK) MUS pastupiła zajava žychara Minska ab tym, što vajenny kamisar Červieńskaha rajona (Minskaja vobłaść) padpałkoŭnik Dźmitryj Dubaŭcoŭ padbuchtorvaje da dačy bujnoha chabaru słužbovym asobam najbujniejšaj budaŭničaj arhanizacyi «za spryjalnaje vyrašeńnie pytańnia ab zaklučeńni damovy dolevaha budaŭnictva žylla na terytoryi h. Minska». Havorka, viadoma, išła nie pra kamiercyjny žyllo, jakoje biez usialakich chabaraŭ možna pabudavać u Minsku. Padpałkoŭnik prapanoŭvaŭ, zapłaciŭšy ŭsiaho 8 tysiač dołaraŭ, stać udzielnikam vielmi pryvabnaha dolevaha budaŭnictva, što ažyćciaŭlajecca ź dziaržpadtrymkaj i pa sacyjalnych rascenkach. Ab schiemie pabudovy žylla ź dziaržpadtrymkaj padpałkoŭnik nie raspaŭsiudžvaŭsia, tolki zapeŭnivaŭ, što schiema hetaja nadziejnaja i što ŭ joj zadziejničanyja kiraŭniki najbujniejšaj u Biełarusi budaŭničaj arhanizacyi.
U chodzie praviadzieńnia apieratyŭnaha ekśpierymientu apieratyŭniki HUBAZiK MUS ŭziali vajennaha kamisara paśla pieradačy častki mierkavanaha chabaru, z 2 tysiačami paznačanych dalaraŭ u kišeni. Ale samaje cikavaje vyśvietliłasia paźniej, užo ŭ pracesie rasśledavańnia. Akazałasia, što blizkaja svajačka padpałkoŭnika pracuje hałoŭnym buchhałtaram i načalnikam upraŭleńnia buchhałtarskaha ŭliku, spravazdačnaści i finansaŭ DVA «Minskbud». Bolš za toje, u chodzie rasśledavańnia i pravierki finansava-haspadarčaj dziejnaści abjadnańnia vyśvietliłasia, što žančyna nie tolki vyrašała pytańni pa ŭvachodžańniu achvočych u lik dolščykaŭ, ale i z dapamohaj roznych schiem vykradała srodki DVA «Minskbud», pry hetym u schiemie kradziažu znoŭ ža byŭ zadziejničany padpałkoŭnik Dubaŭcoŭ.
Tak, pavodle dadzienych śledstva, hałoŭbuch abjadnańnia razam sa svaim svajakom aformili fiktyŭnyja damovy pastaŭki pamiž TAA «OMA» (najbujniejšaja ŭ Biełarusi sietka pa prodažy budmateryjałaŭ) i DVA «Minskbud», a taksama fiktyŭnyja davieranaści na atrymańnie materyjalnych kaštoŭnaściaŭ pa ŭkazanych dahavorach. Z dapamohaj hetych dakumientaŭ hałoŭny buchhałtar abjadnańnia ŭ červieni 2012 hoda ažyćciaviła bieznajaŭny pieravod hrošaj i vykrała bolš za 14,5 miljonaŭ rubloŭ. Pavodle anałahičnaj schiemy jana sa svaim svajakoŭ spracavała i ŭ sakaviku 2013 hoda, adnak tut jany nie paśpieli abnajavić i vykraści amal 11,5 miljonaŭ rubloŭ, bo imi ŭžo zacikavilisia supracoŭniki pravaachoŭnych orhanaŭ.
Pa chabaraŭ hałoŭbuch DVA «Minskbud» šukała i raskručvała klijenturu nie tolki z dapamohaj svajho svajaka-padpałkoŭnika, ale i mieniedžara pryvatnaj budaŭničaj kampanii, jaki taksama prachodzić pa spravie abvinavačanym.
U spravie fihuruje niekalki faktaŭ padbuchtorvańnia da dačy chabaraŭ i atrymańnia bujnych sum dla słužbovych asob DVA «Minskbud».
Tak, ź listapada 2010 hoda pa 11 lutaha 2012 hoda troje padazravanych za spryjalnaje vyrašeńnie pytańnia ab zaklučeńni damovy na budaŭnictva kvatery pa vuł. Matusieviča, 56 u niekalki pryjomaŭ atrymali ad žychara Minska C. 6 tysiač dalaraŭ. U kastryčniku 2012 hoda jany ž padbuchtorvali žychara Minska D. da dačy chabaru słužbovym asobam DVA «Minskbud» — znoŭ ža za spryjalnaje vyrašeńnie pytańnia ab zaklučeńni damovy na budaŭnictva kvatery pa toj ža vuł. Matusieviča, 56. U dva pryjomy z klijenta atrymali 2500 dalaraŭ. Cikava, što sama žančyna nie mieła adpaviednych paŭnamoctvaŭ vyrašać pytańni pa zaličeńni dolščykaŭ u toj ci inšaj ŽBK, i heta kaža ab tym, što jana kahości padklučała da hetaha. Adnak hety čałaviek tak i zastaŭsia nieŭstanoŭlenym.
Kamientary