Apazycyjnaja kaalicyja j «Hramada» stvaryli aperatyŭnyja štaby dapamohi palitviaźniam. U abjadnanaj apazycyjnaj kaalicyi i ŭ Biełaruskaj sacyjał-demakratyčnaj partyi («Hramada») zajaŭlajuć, što ich hałoŭnaja zadača ciapier – jurydyčnaja i materyjalnaja dapamoha sotniam palitviaźniaŭ, u tym liku byłomu kandydatu na prezydenta Alaksandru Kazulinu, jakomu pahražaje kryminalny pieraśled.
Jak zaznačyŭ kiraŭnik jurydyčnaj słužby štabu Alaksandra Milinkieviča Ŭładzimier Łabkovič, ciapier usie subjekty apazycyjnaj kaalicyi aktyŭna zajmajucca arhanizacyjaj materyjalnaj i charčovaj dapamohi palitviaźniam.
(Łabkovič: ) «Budzie składacca śpis zvolnienych z universytetaŭ, z pracy. Budzie rabicca ŭsio mahčymaje, i ja ŭpeŭnieny, što nivodzin čałaviek nie zastaniecca biez dapamohi, jaje atrymajuć usie zvolnienyja z pracy pavodle palityčnych matyvaŭ. Upeŭnieny, što ni adzin student nie zastaniecca biez adukacyi».
Akramia taho, jak paviedamiŭ spadar Łabkovič, składuć śpis amapaŭcaŭ, jakija ździekavalisia ź ludziej, i ŭsich sudździaŭ, jakija vynosili prysudy ŭ palityčnych spravach. Usie vypadki źbićcia i katavańniaŭ buduć zafiksavanyja pa vychadzie palitviaźniaŭ z turmaŭ, i skarhi skirujuć u prakuraturu. Spadar Łabkovič taksama paviedamiŭ, što apazycyjnaj kaalicyjaj stvarajecca stała dziejny kamitet u abaronu palitviaźniaŭ, dziejnaść jakoha ciapier kaardynuje Viktar Karniajenka. Analahičnuju strukturu ŭtvarajuć i ŭ BSDP, paviedamiŭ namieśnik kiraŭnika partyi Ŭładzimier Niściuk:
(Niściuk: ) «Ciapier budziem źbirać aperatyŭny štab dziela vyzvaleńnia Kazulina i astatnich palitviaźniaŭ, a taksama dla arhanizacyi ŭsioj pracy, źviazanaj z padziejami apošnich tydniaŭ».
«Hramada» ŭžo raspačała zbor podpisaŭ pad zvarotam da Hieneralnaha prakurora za vyzvaleńnie Kazulina i inšych palitviaźniaŭ. Uładzimier Niściuk spadziajecca sabrać sotni tysiač podpisaŭ, jak heta było padčas zboru podpisaŭ za vyłučeńnie Kazulina kandydatam na prezydenta.
Što da padtrymki studentam, jakich mohuć vyklučyć z VNU za ŭdzieł u akcyjach pratestu, to Alaksandar Milinkievič ličyć, što hetaja prablema vyrašajecca paśpiachova:
(Milinkievič: ) «My davali abiacańnie, što budziem kłapacicca pra kožnaha represavanaha. I heta sapraŭdy zadača numar adzin, kali my kamanda, kali my supolnaść. I adna z samych asnoŭnych – heta padtrymka studentaŭ, jakich užo pačynajuć vykidvać z universytetaŭ. Hetuju prablemu my ŭžo viedajem, što vyrašym, tamu što premjer-ministry Polščy, Słavaččyny i Čechii ŭžo vykazalisia, što buduć specyjalnyja prahramy. U Polščy prahrama budzie nazyvacca «Volnaja adukacyja imia Kastusia Kalinoŭskaha».
Alaksandar Milinkievič siońnia nakiroŭvajecca ŭ Varšavu dla padpisańnia damovy na biaspłatnaje navučańnie represavanych biełaruskich studentaŭ z rektarami polskich universytetaŭ. Sustreča adbudziecca pad ehidaj Senatu Polščy i ź inicyjatyvy premjer-ministra. Spadar Milinkievič kaža, što budzie taksama vyvučać mahčymaść pracaŭładkavańnia za miažoj zvolnienych za palityčnyja pierakanańni.
Ciapier čytajuć
Alaksandru Milinkieviču patrabujecca ekstrannaja dapamoha2
Kamientary