1 krasavika Viarchoŭny sud pačaŭ razhladać isk Ministerstva justycyi suprać mižnarodnaha hramadskaha abjadnańnia «Dobraja vola». «Spačatku vynieśli papiaredžvańnie, potym prypynili dziejnaść arhanizacyi, a ciapier likvidujuć», — raskazaŭ «Našaj Nivie» staršynia arhanizacyi Leanid Skarabahaty.
«Dobraja vola» była zasnavana ŭ 1998 hodzie jak dabračynny fond.
Da 2007 hoda arhanizacyja zajmałasia azdaraŭleńniem dziaciej za miažoj.«Naprykład, u 2005 hodzie z dapamohaj našaj arhanizacyi kala 1500 dziaciej zmahli źjeździć za miažu», — raskazvaje Skarabahaty.
Z časam dziejnaść «Dobraj voli» źmianiła napramak.«Najbolš my zajmalisia pravavoj padtrymkaj dziaciej i baćkoŭ», — kaža staršynia arhanizacyi.
Naprykład, «Dobraja vola» zajmałasia spravaj Nadziei Dudarenki z pasiołka Paryčy (Śvietłahorski rajon), u jakoj u vyniku kanfliktu sa školnymi nastaŭnikami adabrali piać pryjomnych dziaciej.
Taksama «Dobraja vola» zajmałasia antyałkaholnaj prapahandaj, źbirała humanitarnuju dapamohu. Siarod inšaha, arhanizacyja pasłała i naziralnikaŭ za vybarami na 10 vybarčych učastkaŭ Kurasoŭščyny, dzie žyvuć jaje aktyvisty.
Pravierka arhanizacyi Miniustam pačałasia sa skarhi Ministerstva adukacyi. Minadukacyi vinavaciła «Dobruju volu» ŭ niestatutnaj dziejnaści (pravavaja padtrymka sirataŭ i šmatdzietnych siemjaŭ) i vykarystańni niezarehistravanaj simvoliki (paštovych kanviertaŭ z nadpisam «Dobraja Vola»). Paźniej Minadukacyi adklikała svaje pretenzii, ale Miniust nabraŭ siem parušeńniaŭ (vialikaja litara «V» zamiest małoj na piačatcy, «niezarehistravanyja» kanvierty, pamyłka ŭ naźvie arhanizacyi, jakaja biazvypłatna zdaje «Dobraj voli» ofis u Ratamcy i inš.). Hetych «litaraŭ zakona» chapiła, kab spynić dziejnaść arhanizacyi z 26 listapada 2012 hoda pa 27 studzienia 2013.
U pazovie na likvidacyju Miniust naźbiraŭ abvinavačvańniaŭ na 16 punktach.Vystup pradstaŭnika Miniusta Alaksandra Charytona (mienavita jon zajmaŭsia taksama spravami «Viasny» i dziasiatkaŭ zakrytych arhanizacyj) doŭžyŭsia bolš za try hadziny, usie pretenzii Miniusta zaniali 200 staronak. U pazoŭ uvajšli ŭsie mahčymyja parušeńni, jakija čynoŭniki zmahli znajści: «nikčemnaja ŭ jurydyčnym płanie» damova na arendu ofisa arhanizacyi, niapravilnaje afarmleńnie listoŭ, parušeńnie arhanizacyjnych praceduraŭ, niavypłata dziaržpošliny, niepradastaŭleńnie infarmacyi, parušeńnie statuta arhanizacyi…
Skarabahaty kaža, što «na kožnuju pretenziju ŭ jaho jość dakumientavana abhruntavanaje abviaržeńnie». Pamyłka ŭ damovie arendy ŭžo vypraŭlena, vialikaje «V» na piačatcy pierapraŭlena na maleńkaje, źmieny ŭ statut čakajuć rehistracyi ŭ Miniuście.
Viadoma, Leanid Skarabahaty nie juryst. U sudzie jon bolš havaryŭ pra dziejnaść arhanizacyi, chiby zakanadaŭstva, cisk na «Dobruju volu». Jon cytavaŭ Bibliju, pryvodziŭ za dovad hramadskuju karyść ad pracy supołki.
Sudździu rytoryka staršyni «Dobraj voli» cikaviła mała. Pavodle acenak pravaabaroncaŭ, ad 2001 hoda ŭ Biełarusi metaskiravana začyniajuć niezaležnyja hramadskija arhanizacyi, jakija brali ŭdzieł u nazirańni za padlikam hałasoŭ na vybarach. Rašeńnie 2003 hoda pa «Viaśnie», naprykład, taksama prymaŭ Viarchoŭny sud.
Leanid Skarabahaty — pryvatny pradprymalnik, pratestant i viadomy ŭ Kurasoŭščynie aktyvist. U jaho z žonkaj dzieviać dziaciej, tamu prablemy šmatdzietnych siemjaŭ viedaje na ŭłasnym dośviedzie. Skarabahaty ŭvachodzić u arhkamitet pa stvareńni partyi Biełaruskaja chryścijanskaja demakratyja (BCHD),i partyja navat razhladała jaho ŭ jakaści patencyjnaha kandydata ŭ prezidenty ad BCHD. Taksama jon byŭ kandydatam ad Kurasoŭščyny na vybarach u Minski harsaviet deputataŭ u 2010 hodzie, a ŭ 2012 udzielničaŭ u vybarach u pałatu pradstaŭnikoŭ. Na debaty Skarabahaty pryjšoŭ ź Biblijaj i partretam ministra adukacyi Maskieviča. Skarabahaty adstojvaje chryścijanskija kaštoŭnaści.
«Prablemy „Dobraj voli“ mahli być vyklikany aktyŭnaj palityčnaj dziejnaściu Skarabahataha, — miarkuje były sustaršynia BCHD Alaksiej Šein.— Kali b jon prosta zajmaŭsia ałkaholikami, naŭrad ci što zdaryłasia b. Likvidacyja sapraŭdy ŭnikalnaj arhanizacyi, jakaja akazvaje vialikuju dapamohu, moža być sprobaj adpomścić Leanidu».
U paniadziełak sud nie zadavoliŭ prośby Skarabahataha ab pierapynku da piatnicy dla padrychtoŭki ŭsich nieabchodnych dakumientaŭ. Vyniasieńnie prysudu pryznačana na 13:00 sierady 3 krasavika.
* * *
3 krasavika Viarchoŭny sud zadavoliŭ pazoŭ Ministerstva justycyi ab likvidacyi «Dobraj voli». Taksama arhanizacyja pavinna vypłacić dziaržpošlinu ŭ pamiery 300 tysiačaŭ.
Sud pryznaŭ, što arhanizacyja niasvoječasova ŭniesła źmieny ŭ statut, nie prypyniła dziejnaści ŭ adpaviednaści z prysudam, nie paćvierdziła svajho mižnarodnaha statusa, mieła chiby ŭ spravavodstvie, nie padavała Miniustu zapatrabavanych źviestak.
«Zrazumieła, ja nie znachodžu prysud spraviadlivym», — prakamientavaŭ vyrak staršynia «Dobraj voli» Leanid Skarabahaty.
Skarabahaty bačyć niekalki varyjantaŭ praciahu dziejnaści. «My možam dałučycca da niejkaj inšaj arhanizacyi, a možam dziejničać jak inicyjatyŭnaja hrupa hramadzianaŭ — u nas jość vopyt. Možam pasprabavać zarehistravacca ŭ Polščy, dzie znachodzicca naša adździaleńnie. Ludziej, jakija pracujuć z nami, nie likviduješ», — kaža jon.
Ciapier čytajuć
Ci mahčymy druhi Čarnobyl? I što ciapier robiać ludzi na toj AES? Navukoŭka adkazvaje na važnyja pytańni4
Ci mahčymy druhi Čarnobyl? I što ciapier robiać ludzi na toj AES? Navukoŭka adkazvaje na važnyja pytańni
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»2323
Irłandziec, da jakoha małaja Cichanoŭskaja jeździła ŭ 1990-ja: «Kali b niechta skazaŭ, što adnoje z hetych dziaciej stanie palitykam, ja b pakazaŭ na Śvietu»23
«Pra ciažarnaść viedali tolki jana i jaje chłopiec». Stali viadomyja padrabiaznaści historyi ź miortvym niemaŭlom, znojdzienym u Baranavičach u pakiecie
Kamientary