Treci Kanhres daśledčykaŭ Biełarusi budzie aryjentavany na Bałtyju i Skandynaviju

Treci Mižnarodny kanhres daśledčykaŭ Biełarusi adbudziecca 11–13 kastryčnika ŭ Kaŭnasie.

Kancepcyja Kanhresa-2013 hučyć jak «Biełaruś. Paŭnočnaje vymiareńnie». Asablivaja ŭvaha budzie nadadziena pašyreńniu akademičnaha supracoŭnictva biełaruskich daśledčykaŭ z krainami Bałtyjskaha i Skandynaŭskaha rehijonaŭ, a taksama «pahłybleńniu rehijanalnych i paraŭnalnych daśledavańniaŭ Biełarusi i rehijona Bałtyjskaha mora ŭ šyrokim jaho razumieńni». «Najbolšuju zacikaŭlenaść ciapier prajaŭlajuć daśledčyki sa Šviecyi, Łatvii i Litvy, adnak my spadziajemsia na ŭdzieł i inšych navukoŭcaŭ rehijona — estoncaŭ, finaŭ, narviežcaŭ, datčan. My taksama chacieli b pryciahnuć uvahu navukoŭcaŭ z Kitaja i Japonii, jakija daśledujuć krainy postsavieckaj prastory», — skazaŭ Kazakievič.

Na padstavie dasłanych zajavak užo byli sfarmulavany papiarednija temy dyskusij, jakija ŭvajšli ŭ 8 siekcyj: ekanomika, sacyjalnyja navuki i fiłasofija, adukacyja i navuka, palityka i mižnarodnyja adnosiny, historyja, daśledavańnie relihii i Biblii, kultura i mastactva, psichałohija.

Zajaŭki padajuć i supracoŭniki dziaržaŭnych ustanoŭ, i nieźviazanyja z takimi ŭstanovami daśledčyki. Šmat zaležyć ad dyscypliny: u sacyjalna-palityčnych navukach šyroka pradstaŭlena niedziaržaŭnaja śfiera, ale ŭ historyi i inšych humanitarnych navukach šmat zajavak ad dziaržaŭnych daśledčykaŭ.

Arhanizatary taksama paviedamili, što

zajaŭki na ŭdzieł u Kanhresie prymajucca da 10 červienia na sajcie palityka.org.

Adkazvajučy na pytańnie karespandenta «NN» pra staŭleńnie dziaržavy da Kanhresa i mahčymyja pieraškody dla ŭdzieła navukoŭcaŭ-supracoŭnikaŭ dziaržaŭnych instytutaŭ, Andrej Kazakievič paviedamiŭ, što «pieršy Kanhres dziaržava faktyčna praihnaravała — delehavali adnaho čałavieka, jaki abaraniaŭ dziaržaŭnuju pazicyju. Padčas druhoha Kanhresa byli peŭnyja pieraškody, asabliva ŭ haradzienskim asiarodździ. Jašče, vidać, nakłalisia i parłamienckija vybary, što adbylisia za tydzień da Kanhresu. Adnak, zbolšaha, cisku nie było i ja spadziajusia, nie budzie dalej.

Kanhres nie praduhledžvaje palityzacyju, i važna adsutnaść padziełu pamiž dziaržaŭnymi, niedziaržaŭnymi i zamiežnymi navukaŭcami. Ad hetaha vyjhrajuć usie baki».

Novaŭviadzieńniem Kanhresa 2013 stanie konkurs na lepšuju navukovuju publikacyju. Arhanizatarami byli vyznačany try naminacyi: historyja, sacyjalna-palityčnyja navuki i humanitarnyja navuki. U kožnaj z naminacyj los lepšaj publikacyi budzie vyrašać ekśpiertnaja kamisija ź biełaruskich i zamiežnych navukoŭcaŭ i daśledčykaŭ.

«Hałasavańnie budzie tajemnym, a vyniki buduć abvieščanyja va ŭračystaj abstanoŭcy padčas Kanhresu. Miesca praviadzieńnia Kanhresu dakładna nie vyznačana, ale razhladajecca varyjant kaŭnaskaha Doma aficeraŭ, dzie ŭ mižvajenny pieryjad znachodziłasia Ministerstva biełaruskich spraŭ», — raskazaŭ Kazakievič.

Na siońnia žadańnie pryniać udzieł u Kanhresie vykazali i čatyry asablivyja hości: brytanski historyk i palitołah Endru Uiłsan, prafiesar palitałohii ŭniviersiteta Taronta Łukan Uej, biełaruski litaraturaznaŭca Adam Maldzis i Styvien Uajt, prafiesar palitałohii z Hłazha (Vielikabrytanija). Adnak arhanizatary ŭpeŭnieny, što ŭ Kanhresie voźmuć udzieł jašče bolš suśvietna viadomych navukaoŭcaŭ.

• 0
• 0
• 0
• 0
• 0
• 0
• 0
• 0