Najbolšy konkurs na «kamunikatyŭny dyzajn» -- 14, 8 čałavieka na miesca.
Sioleta ŭ Biełaruski dziaržaŭny univiersitet abituryjenty padali 5 tys. 805 zajaŭ na 1.810 miescaŭ na dzionnaje biudžetnaje navučańnie (biez uliku vajennaha fakulteta), a taksama 780 zajaŭ — na 435 miescaŭ na zavočnuju biudžetnuju formu navučańnia.
Jak paviedamili BiełaPAN u pres‑słužbie BDU, siaredni konkurs na dzionnuju biudžetnuju formu navučańnia skłaŭ bolš za try čałavieki na miesca.
Samy vialiki konkurs u sioletniuju pryjomnuju kampaniju na dzionnaje biudžetnaje adździaleńnie zafiksavany na humanitarnym fakultecie na śpiecyjalnaść «Dyzajn» (kirunak «Kamunikatyŭny dyzajn») — 14,8 čałavieka na miesca. Na hetym ža fakultecie na śpiecyjalnaść «Psichałohija» («Sacyjalnaja psichałohija» i «Mietadałohija i mietady psichałahičnych daśledavańniaŭ») sprabujuć siły 13 čałaviek na miesca.
Stabilna vysokaj zachoŭvajecca cikavaść abituryjentaŭ da niekatorych śpiecyjalnaściaŭ fakulteta mižnarodnych znosinaŭ, dzie konkurs na śpiecyjalnaść «Mižnarodnyja znosiny» sioleta skłaŭ 10,2, «Mižnarodnaje prava» — 11 čałaviek na miesca.
Na śpiecyjalnaść «Dyzajn» («Dyzajn pradmietna‑prastoravych kompleksaŭ») Dziaržaŭnaha instytuta kiravańnia i sacyjalnych technałohij BDU konkurs skłaŭ 9,1 čałavieka, na śpiecyjalnaść «Mieniedžmient» («Kiravańnie piersanałam» i «Mieniedžmient nieruchomaści») — 9,7.
Konkurs na śpiecyjalnaści tych fakultetaŭ, na jakija letaś było padadziena niedastatkova zajaŭ ad abituryjentaŭ (bijałahičny, chimičny, fizičny, radyjofiziki i elektroniki, miechanika‑matematyčny), sioleta vyras i skłaŭ: 4 čałavieki na miesca na bijałahičnym fakultecie, 1,4 — na miechanika‑matematyčnym, 2,1 — na fakultecie radyjofiziki i elektroniki, 1,6 — na chimičnym, 1,7 — na fizičnym.
31 lipienia ŭ Biełdziaržuniviersitecie pačnucca ŭstupnyja ekzamieny, jakija buduć prachodzić pa 4 žniŭnia. Profilny ekzamien abituryjentam treba zdać na fakultetach: miechanika‑matematyčnym, fizičnym, chimičnym, hieahrafičnym, bijałahičnym, fiłałahičnym, prykładnoj matematyki i infarmatyki, radyjofiziki i elektroniki, histaryčnym, žurnalistyki, a taksama na śpiecyjalnaść «Dyzajn» u Dziaražŭnym instytucie kiravańnia i sacyjalnych technałohij i na humanitarnym fakultecie. Zaličeńnie na biudžetnuju formu navučańnia projdzie pa 6 žniŭnia.
Kamientary