Siadzibu ŭ Padarosku vykupiŭ biełarus z Estonii za $120 tysiač

Aŭkcyjon pa prodažu siadziby ŭ Padarosku narešcie adbyŭsia.

27 śniežnia siadziba Bochvicaŭ, jakaja znachodzicca na poŭdni Vaŭkavyskaha rajonu pry darozie z Brestu ŭ Hrodna, była pradadzienaja rasiejskamu biznesmienu Paŭłu Padkarytavu.

U pratakole pieramožcy aŭkcyjonu paznačana suma 1,02 miljarda rubloŭ, heta kala $120 tysiač u ekvivalencie.

«Letaś była praviedzienaja novaja acenka, i siadzibu musili b vystavić na aŭkcyjon koštam bolš za $200 tysiač, — raskazvaje Padkarytaŭ. — Naŭrad ci ja pryniaŭ by ŭdzieł ŭ im u hetym vypadku». Potym, zhodna z prezidenckim ukazam, z ahulnaha cany byŭ vyklučany košt «zialonych nasadžeńniaŭ», i vynikovaja suma skłała kala $95 tysiač. Heta zdałosia «Hrodnavobłmajomaści» zamałym, tamu jany pavialičyli canu jašče amal na 20%. Choć pretendent na kuplu byŭ tolki adzin — Padkarytaŭ.

Płany novaha haspadara

Pavieł Padkarytaŭ — rasijski biznesmien, jaki ciapier žyvie ŭ Talinie.

Paśla niekalki sprobaŭ pieradziełu majomaści ŭ 2005 hodzie častka menedžeraŭ i akcyjanieraŭ kampanii, siarod jakich byŭ i Padkarytaŭ, byli aryštavanyja. Biznesmien vyjšaŭ na volu tolki ŭ 2010 hodzie.

Majučy pa babuli biełaruskija karani, jon, znachodziačysia ŭ SIZA, vyvučyŭ biełaruskuju movu, staŭ siabram TBM.

Pa jaho słovach, najpieršaje, što treba zrabić — heta adnavić siadzibu i park vakoł jaje, nakolki heta mahčyma ŭ aŭtentyčnym stanie. Padkarytaŭ kaža, što budzie imknucca zrabić tak, kab hetaje miesca było pryvabnym dla turystaŭ jak ź Biełarusi, tak i ź Jeŭropy i Rasii.

Jon maje płany zrabić «muziej siadzibnaha pobytu, a kali atrymajecca, taksama adkryć nievialiki hatel i, mahčyma, karčmu tradycyjnaj biełaruskaje kuchni».

Pažarnyja zamiest kałhaśnikaŭ

Siadziba Bochvicaŭ znachodzicca na samym poŭdni Vaŭkavyskaha rajona, na miažy Brestčyny i Hrodzienščyny. Padarožnik, jaki rušyć pa trasie R44 (asnoŭnaja pamiž Brestam i Hrodna), nie moža nie zaŭvažyć vieličny park i vysačeznuju bramu. Trochi dalej u parku staić i sama dvuchpaviarchovaja siadziba.

Jana pustuje ŭžo amal dziesiać hadoŭ, kali ź jaho vyjechała praŭleńnie miascovaha kałhasu. Ad poŭnaha zaniapadu histaryčny budynak ratuje tolki toje, što pobač znachodzicca post miascovych pažarnych.

Svaim stvareńniem siadziba abaviazanaja rodu Bochvicaŭ.

U 1854 hodzie majontak u Padarosku nabyŭ syn viadomaha fiłosaafa Fłaryjana Bochvica, Raman. Jon i pierabudavaŭ siadzibny dom u styli poźniaha kłasicyzmu ŭ 1854—1856 hh.

Darečy, Vaŭkavyski rajon — lidar pa paśpiachovych prodažach zaniadbanaj histaryčnaj spadčyny. Niekalki hadoŭ tamu inšy rasijski biznesmien, Vadzim Sielichaŭ, nabyŭ za $105 tysiač siadzibu ŭ Kraskach. Pamiž jahonaj ułasnaściu i siadzibaj, jakuju ciapier naležyć Padkarytavu, usiaho kala piaci kiłamietraŭ.

• 0
• 0
• 0
• 0
• 0
• 0
• 0
• 0