«Больш за год Святлана цяжка хварэла, але нават падчас хваробы не скардзілася» — Катынскі музей адгукнуўся на смерць Святланы Курс
Старшыня Беларускага ПЭН Таццяна Нядбай прывяла ў сваім фэйсбуку спачуванні ад Катынскага музея, у якім працавала Святлана Курс.
«Можа здавацца, што гэта неверагодна, але бязмежна добрыя людзі існуюць. Гэта людзі, якія ніколі не наракаюць, не гавораць кепскага пра іншых, не скардзяцца на свой цяжкі лёс, заўсёды гатовыя дапамагчы, не выхваляюцца сваімі поспехамі і шчыра радуюцца дасягненням іншых. Часам яны сустракаюцца на нашым шляху і робяць так, што свет здаецца лепшым месцам.
Апошнія гады побач з нашым невялікім калектывам была менавіта такая асоба. Гэта была Святлана Курс — выбітная беларуская пісьменніца, журналістка, грамадская дзяячка, а для нас — калега з-за суседняга стала.
Больш за год Святлана цяжка хварэла, але нават падчас хваробы не скардзілася. Яна верыла — і мы разам з ёй, — што вернецца да сваёй пачатай, але не завершанай працы. Спусціцца ў экспазіцыю, распавядзе пра ахвяр Курапатаў. Святлана як ніхто іншы ўмела працаваць з архіўнымі дакументамі — не толькі дзякуючы дасканаламу валоданню польскай, беларускай і рускай мовамі ды глыбокаму разуменню гістарычнага кантэксту, але і таму, што з вялікай эмпатыяй умела прачытаць чалавечыя эмоцыі.
Пра ахвяр Катынскага злачынства, якіх яна ведала па дакументах, яна расказвала цудоўнай польскай мовай з крэсавым акцэнтам — такім, якім гаварылі многія ахвяры і іх родныя.
Мы смуткуем разам з роднымі і сябрамі Святланы, асабліва з яе сынам Феліксам.
Яна пайшла ад нас, пакінуўшы вялікую пустэчу. Але мы верым, што яе дух яшчэ доўга будзе побач з намі», — напісаў музей, які займаецца памяццю ахвяр Катыні.
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм
«Вялікая страта для ўсёй Беларусі». Ціханоўская адгукнулася на смерць Святланы Курс
«Ні пра што не шкадуй, Света. Жыве Беларусь». Святлана Курс напісала ліст самой сабе, 15‑гадовай
Каментары