У ЗША імкліва расце попыт на малодзіва — першае малако, якое выпрацоўваецца пасля родаў. Яго прадаюць у выглядзе дарагіх дабавак і рэкламуюць як падтрымку для імунітэту, стрававання і фізічнай формы. Выданне The New York Post высветліла, наколькі гэтыя сцвярджэнні пацвярджаюцца даследаваннямі.
Апошнія гады вакол груднога малака ўзнікла нечаканая камерцыйная цікавасць. У 2025 годзе адна з TikTok-блогерак заяўляла, што зарабіла больш за 13 тысяч даляраў, прадаючы сваё малако бодзібілдарам, перакананым, што яно дапаможа ім хутчэй набраць мышачную масу. У Аўстраліі журналісты фіксавалі выпадкі, калі анкалагічныя пацыенты праз фэйсбук шукалі грудное малако, мяркуючы, што яно дапаможа ім у лячэнні.
Асаблівы попыт — на малодзіва, першае малако, якое выпрацоўваецца ў апошнія тыдні цяжарнасці і ў першыя дні пасля родаў. Яго часта называюць «вадкім золатам» — за высокую канцэнтрацыю антыцелаў і пажыўных рэчываў, якія падтрымліваюць імунную сістэму немаўляці і развіццё яго кішэчніка. Малодзіва выпрацоўваюць усе самкі сысуноў.
Цяпер жа яно стала папулярным і сярод дарослых — у выглядзе харчовых дабавак.
Бум малодзіва
Як адзначаюць эксперты, большасць дабавак з малодзівам вырабляецца з сыравіны, атрыманай ад кароў. Такія прадукты прадаюцца ў выглядзе парашку або капсул. Кошт адной упакоўкі можа перавышаць 100 даляраў.
Паводле спецыялістаў у харчаванні, малодзіва кароваў утрымлівае тыя ж ключавыя кампаненты, што і чалавечае: імунаглабуліны (антыцелы), фактары росту і ахоўныя бялкі. Менавіта з імі звязваюць магчымую карысць для кішэчніка, імуннай сістэмы і аднаўлення пасля нагрузак.
Продажы імкліва растуць. За апошні год амерыканцы выдаткавалі каля 19 мільёнаў даляраў на дабаўкі з малодзіва. Паводле дадзеных аналітыкаў рынку, колькасць прадуктаў з гэтым інгрэдыентам павялічылася больш як на 150% — гэта самы хуткарослы сегмент у сваёй катэгорыі.
Эксперты мяркуюць, што рост папулярнасці тлумачыцца некалькімі фактарамі: новымі даследаваннямі пра карысць малодзіва і падтрымкай з боку знакамітасцяў.
Што кажуць даследаванні
Навуковыя высновы пакуль асцярожныя. Даследаванняў становіцца больш, але адназначнага кансэнсусу няма.
Агляд, апублікаваны ў 2022 годзе, паказаў, што малодзіва можа ўмацоўваць слізістую абалонку кішэчніка і зніжаць яго пранікальнасць, што спрыяе паляпшэнню стрававання і ўмацаванню імуннай абароны. Сістэматычны агляд 2024 года выявіў, што ў большасці прааналізаваных даследаванняў прыём малодзіва зніжаў частату дыярэі.
Ёсць таксама дадзеныя пра зніжэнне рызыкі інфекцый верхніх дыхальных шляхоў у студэнтаў і спартсменаў. У рандамізаваным даследаванні з удзелам студэнтаў-медыкаў — якія маюць павышаную рызыку праз стрэс і кантакт з пацыентамі — дабаўкі з малодзіва забяспечылі істотную імунную абарону.
Значная частка навуковых прац прысвечана спорту. Малодзіва можа дапамагаць падтрымліваць выніковасць падчас інтэнсіўных трэніровак і ў перыяд аднаўлення. Аднак доказаў таго, што яно істотна ўплывае на рост мышачнай масы або змяненне складу цела, пакуль няшмат.
Асобна згадваецца і магчымы эфект мясцовага прымянення — напрыклад, для змяншэння сімптомаў вагінальнай сухасці ў жанчын. Але ў цэлым меркаванне экспертаў такое: асноўныя патэнцыйныя перавагі датычацца кішэчніка і імуннай сістэмы, і яны, верагодна, аднолькавыя для мужчын і жанчын.
Пры гэтым частка гучных заяў — пра меншае ўздуцце, рост сілы і мышачнай масы, а таксама гусцейшыя валасы — грунтуецца на даследаваннях, ініцыяваных самімі вытворцамі.
Як выбраць і каму не варта
Пры выбары біядабавак з малодзіва кароў эксперты раяць звяртаць увагу на паходжанне сыравіны і спосаб апрацоўкі. Важна, у якіх умовах утрымліваюць кароў і ці выкарыстоўваюцца пры гэтым гармоны або генетычна мадыфікаваныя кармы, а таксама якім чынам атрымліваюць і сушаць малодзіва. Пры высокай тэмпературы частка біяактыўных злучэнняў можа разбурацца, таму вытворцы звычайна падкрэсліваюць выкарыстанне зберагальных метадаў апрацоўкі. З гэтай жа прычыны парашок не раяць змешваць з гарачымі напоямі.
Дабаўкі з каровінага малодзіва не пасуюць людзям з алергіяй на бялок каровінага малака. Яны таксама змяшчаюць лактозу, таму пры яе непераноснасці магчымыя ўздуцце і дыскамфорт.
Большасць экспертаў, з якімі размаўлялі журналісты The New York Post, адзначаюць: малодзіва — не чарадзейны сродак, а біялагічна актыўны прадукт, які ў пэўных сітуацыях — падчас стрэсу, інтэнсіўных трэніровак або падвышанай рызыкі інфекцый — можа даваць дадатковую падтрымку кішэчніку і імуннай сістэме.
Цяпер чытаюць
Рэдактара незалежнай баранавіцкай газеты «Інтэкс-Прэс» Янукевіча прысудзілі да 14 гадоў калоніі, яго намесніка Пакаленку — да 12 гадоў6
Каментары