Сузаснавальнік буйнога брытанскага інтэрнэт-рэтэйлера Asos, 58‑гадовы Квентын Грыфітс загінуў у Тайландзе. Паводле паведамленняў СМІ, 58‑гадовага бізнэсмена знайшлі мёртвым пасля таго, як ён выпаў з балкона сваёй кватэры на 17‑м паверсе кандамініума ў Паттаі.
Мясцовая паліцыя не выключае магчымасці крымінальнага следу, хаця ў жыллі не знойдзена прыкметаў узлому ці барацьбы. Канчатковую прычыну смерці павінна вызначыць судова-медыцынская экспертыза, якая можа працягвацца некалькі месяцаў.
Трагедыя адбылася на фоне судовага канфлікту мільянера з былой жонкай. Яна абвінавачвала Грыфітса ў незаконным прысваенні 500 тысяч фунтаў стэрлінгаў з іх сумеснага бізнэсу, сцвярджаючы, што ён падрабіў дакументы і без яе ведама прадаў зямлю і акцыі кампаніі. Летась прадпрымальніка затрымлівалі, аднак пасля допыту адпусцілі. Сам ён абвінавачванні адмаўляў, а справа на момант яго смерці яшчэ разглядалася.
Грыфітс стаў адным з заснавальнікаў Asos у 2000 годзе. З цягам часу кампанія ператварылася ў міжнароднага гандлёвага гіганта з абаротам каля 3 мільярдаў фунтаў стэрлінгаў. У кампаніі ён працаваў да 2005 года, пасля чаго прадаў частку сваіх акцый, зарабіўшы мільёны. Пазней ён судзіўся з бухгалтарамі, сцвярджаючы, што з-за няякасных падатковых кансультацый панёс значныя фінансавыя страты.
У Тайланд бізнэсмен пераехаў у 2007 годзе, дзе другі раз ажаніўся. Некалькі гадоў таму гэты шлюб распаўся.
Каментары